Ўзбек футболи: Хайр Рио, алвидо Рио...

Ўзбекистон Oлимпия терма жамоаси Рио де Жанейрога бориш ҳуқуқидан маҳрум бўлди. Осиё чемпионати гуруҳ босқичи иккинчи турида Ироқдан 2:3 ҳисобида мағлубиятга учраган жамоа ижтимоий тармоқларда роса танқидларга учрамоқда. Футбол мухлислари анчагина "қонларини қайнатишди”

Ҳатто Ўзбекистон халқ ёзувчиси Тоҳир Малик ўз китоб тақдимоти маросимида "думбул футболчиларимиз" ҳақида фикр билдириб ўтди.

Ёзувчининг "Уларнинг барчасининг бўйнига омоч боғлаб, далада қўш ҳайдатиш керак. Сизлар шулар каби танбал бўлиб қолманглар!" дея "танбеҳ" бергани хабар қилинган.

Ўзбекистон U-23 ҳимоячиси Максимилян Фомин Ироққа қарши ўйиндаги мағлубиятдан кейин Фейсбукдаги ўз саҳифасида мухлисларга нисбатан ҳақорат сўзлар ишлатилган мурожаатни қолдирди, деб хабар берди uff.uz.

Сайтга кўра, Фомин шундай деб ёзган: "Биз қанчалик ёмон футболчилар эканлигимиз ҳақида комментларда ёзаётганлар ва постлар қолдираётганлар, чакагингни ўчиринг! Сиз ўзи кимсизлар? Ҳаётда ҳеч нарсага эришолмаган, ҳеч нарсани кўрмаганларсиз. Қиладиган ишингиз мониторнинг у тарафида ўтириб, бировларнинг устидан мағзава ағдаришдан иборат". Ўз хатоси ва қўполлигини тушуниб етган Фомин бир кун ўтар-ўтмас мухлислардан узр сўради ва ҳақоратомуз изоҳини ўчириб ташлади.

"Ижтимоий тармоқ кучи"га қойил қолган Хайрулла Ҳамидов эса Максимилян Фоминнинг Facebook ижтимоий тармоқда мухлисларни ёппасига ҳақорат қилганига ўз фикрини билдирган.

"Мен Фоминнинг ишини оқламайман, сўкиш ва ҳақоратларни оқлаб бўлмайди. Лекин йигитларнинг куйиб-пишиб, ижтимоий тармоқда ёзишаётганига хурсандман. Нега, дейсизми? Бир пайтлари терма жамоамиз билан бирга кўпгина мамлакатларга борганман ва мағлубиялардан сўнг футболчиларнинг ҳолатини кўрганман. Енгилган ўйинларидан сўнг ўзларини қўярга жой топа олмасалар керак, деб ўйлаганимда, улар хотиржам, гўё ҳеч нарса бўлмагандек автобусга чиқиб келишганини кўриб, жаҳлим чиқиб кетганди," деб ёзади Ҳамидов ўзининг Gol.uz вебсайтидаги мақоласида.

Умуман олганда Ўзбекистон олимпиячилари мағлубияти ҳақида биргина uff.uz вебсайтида қолдирилган изоҳлар сони 18 январ кунига қадар 1,600 дан ошган.

Жумладан, вебсайт фаоллари қуйидаги фикрларни билдиришган:

"CHEF-D'OEUVRE": "Шавкат Мирзиёевни шахсан ўзлари шуғулланишлари керак федерация фаолияти билан. Фақат Мирзиёев айбдорларни жазолаши мумкин. Кадрларни янгилаб, ПФЛни фаолиятини назоратга олишлари керак. Ҳамма кирдикорлар аслида ПФЛда".

"NEFTCHIREALMADRID": "Эҳҳҳ эссииззз! Ҳар сафар шундай, бундай футболда виждони бор одам қолдими ози, деярли бутун ўзбек ҳалқининг пешона териси эвазига бунёд этилаётган пахта, буғдой умуман, барча соҳалардаги тинимсиз меҳнат эвазига шакллантирилган даромадлар ҳисобидан шунча шарт шароитлар яратилса...буларга Худонинг ўзи бас келмаса, биз мухлисларнинг гапи заррача ҳам аҳамияти йўқ улар учун!..." (изоҳ таҳрир қилинган - Би-би-си)

"AKADEMIYA": "Бизга ҳақиқий мутахассис - профессионал бош мураббий керак! Бор гап шу!". (таҳрир қилинган)

"FENIX-8990": " Жонга тегди бунақа мағлубиятлар. Қачонгача чидаш керак буларга. Сабрни ҳам охири бор-ку ахир. Бабаян мураббий эмас, четдан қачон кучли мураббий келади. Миллий терма жамоа хам Бабаян билан кейинги босқичдан ўта олмаслигига 99 фоиз ишонаман. Чунки унда аниқ ишланган рақибни чалғитадиган тактика йўқ. Менимча,Мироброр Усмонов кетмагунча бу ишлар тугамаса керак".

"SARDORTEMUR": "Бир эътибор беринг, Ироқда, Сурияда аҳвол кандай. Уларда уруш. Бизни ватанимизда Худога минг қатла шукр тинч ва осуда ҳаёт кечирмоқдамиз. Мана шу тинч ҳаётни қадрига етиб майдонга ватан ғурури учун уйнамайсанлами"...

"ACMILANCOMGALLIANI": "Хайр,Олимпиада, хайр ЖЧ-2018! Ниманидир ўзгартириш вақти келди жаноб МУЗ. Ҳалоллик бор жойда барака булади. Бу омадсизликлар чемпионатимиздаги ва футболимиздаги кинғирликлар учун муносиб жавобдир. Жаноб МУЗ уйғонинг энди...".

Twitter ижтимоий тармоғида эса қуйидаги фикрлар тарқалган:

"@Dilshodff": "Бугунги ўйин - Футболимизи юзи! Буни журналистларимиздан эшитишни, тушунишни хоҳламаётган футболимиз раҳбарларига Ироқ тушунтириб қўйди!". "Ухлаётганда, даласифат майдонлада машғулот қилаётганда бомба овозини эшитилиб турган юрт футболчилари, бизнинг осойишта юртнинг эркатойларини ютди," деб қўшимча қилган ушбу фаол.

Ўзбек футбол ишқибозлари, хусусан, Хайрулла Ҳамидов "Риога алвидо" шеърини улашган.

"@X_Hamidov":

Бўлди бизга сабр ҳафтаси, Етди бизга шу бир ҳафтаси... Учта ўйин - қайтиш чиптаси... Хайр, Рио, алвидо, Рио!

Шеърни ёздим эринмасдан мен, Сенга бир бор кўринмасдан мен: Ўзи, бизни кутганмидинг сен? Хайр, Рио, алвидо, Рио!

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

ТЕЛЕГРАМДА ЭСА каналимиз - https://telegram.me/bbcuzbek ёки BBCUZBEK

Instagram - BBC UZBEK

Twitter - BBC UZBEK

Odnoklassniki - BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio