Ислом Каримов ҳоким тайинлашдан чарчадими?

Наманган вилояти ҳокимини алмаштирар экан, Ўзбекистон президенти айни вазифа ўз фаолиятидаги “энг оғир иш” эканини айтган.

"Мен кўп марта айтган бир фикрни бугун яна бир бор такрорлашни ўринли деб биламан. Менинг мамлакат раҳбари сифатида зиммамга юкланган энг катта, энг оғир, шу билан бирга, ўта масъулиятли вазифа ҳақида гапирганда, бу аввало кадрларни раҳбарлик лавозимларига - бу вазирлик ёки тармоқ етакчиси бўладими, вилоят ёки туман раҳбарлари бўладими - танлаш ва тавсия қилишдан иборат. Бу сафар ҳам ана шундай оғир масъулиятли ишни бажаришга тўғри келганини ўзим учун яна бир синов деб биламан. Лекин бу синов, очиқ айтадиган бўлсам, барчамизнинг зиммамизга тушадиган синовдир."

Би-би-си Ўзбек ижтимоий тармоқлардаги саҳифалари ўқувчиларига "Ўзбекистонда ҳокимлар сайланиши керакми? Президент Каримов ўз таъбирича, "энг оғир иш" бўлган ҳоким тайинлашни халқ ихтиёрига бериши лозим деб ўйлайсизми?" саволлари билан мурожаат қилган ва қатор фикру мулоҳазалар олган.

Афтидан, президентнинг бу “энг оғир иши” Ўзбекистон ҳолатида самара бермаётган кўринади. Кузатувчилар ҳозирга қадар Ислом Каримовнинг ҳокимларни танқид қилиб, ишдан олиши вилоят ва ёки туманлардагитуб муаммоларнинг бирортасини ҳам ҳал қилмаганига эътибор қаратишади.

Ўзбекистонлик журналистнинг айтишича, вилоятларда коррупция жуда кенг тарқалган, газ, электр энергияси тақчиллиги йилдан йилга ёмонлашиб бормоқда.

Эҳтимол, Ислом Каримов айнан ана шу "битмас муаммолар"дан чарчагани учун ҳоким алмаштиришни "оғир иш" деб таърифлаётгандир?

Ўзбекистон президенти ҳоким тайинлаш каби "синов" барчанинг зиммасида эканини урғулаши, балки ҳокимларни ҳам дастурамалига қараб, халқ сайлаши керакдир деган таклифларга туртки бермоқда.

(Ўқувчиларимизнинг фикр-мулоҳазалари аксарият ҳолатларда таҳрирсиз берилмоқда –BBCUZBEK)

Би-би-си Ўзбекнинг Facebook саҳифасида изоҳ қолдирган Farkhod Abdurakhmonov: "Вилоят ва туман ҳокимлари сайлангани яхши, албатта. Бироқ, ҳокимлар сайланиши учун база, яъни демократияга асосланган кучли фуқаролик жамияти шаклланган бўлиши керак. Умуман, ҳозирги бизнинг шароитимизда мулозимларни сайлашнинг ва тайинлашнинг ҳам ижобий ҳамда салбий томонлари бор. Жойларда турли ижтимоий-иқтисодий муаммоларнинг юзага келаётганлигига фақат ҳокимлар айбдор эмаслар, чунки улар кўпинча ижрочилардир. Ушбу масалада комплекс, тизимли ёндашиш керак. Ҳокимликка ҳар томонлама лойиқ бўлган инсонлар тайинланиши учун номзодни Президентга тавсия қиладиганлар ҳалол, ўз ишининг билимдони, принципиал ва ватанпарвар бўлишлари жуда муҳим. Жамиятдаги камчиликларга ҳокимлар билан бирга тармоқ вазирликларининг раҳбарлари ҳам жавобгар бўлишлари ўринлидир", дея фикр билдирган.

Dil Dor: "...нима президент сайловидаги театр камми? Яна шундай театрлар сонини кўпайтириб халқни сарсон бўлишини томоша қилмоқчимисиз?"

Nodirbek Nodirbek: "prezident saylagani yaxshi"

Мухаммед Угизхан Угли: "Яхши бўларди, зора ҳисобдорлиги ошса, шу йул билан", деб ёзишган.

Ali Khan эса: Qogʻozda oʻzgargan bilan amalda nimadir oʻzgarishiga umuman ishonmiman. Koʻpchilikni allaqachon "saylov jarayoni"dan xafsalasi qogan. Hozir saylov bilan qanaqadir yaxshi tarafga oʻzgarishiga hech kim ishonmaydi. Faqat hozirgi turgʻunlikka shukur chidab yashashga majbur", дейди.

Абдулла Усманов: "Ҳоким ким бўлиши ҳозир халққа қизиқ эмас, газ билан свет бўлиши бўлмаслиги қизиқ. Газ йўқ, инсонлар ўтин билан дори-дармонга пул қидириши қизиқ"

Abdulloh Moziy: "Halqning fikri bilan hozirda hech bir amaldor qiziqmay qoygan, chunki yuqoridagi katta dodanggiz halqnig fikriga nopisand qaragandan keyin uning qo'lostidagi amaldorlardan nimani kutish mumkin?"

Алиев Шерзод эса: "Кичкинагина зиррача ҳам ОЛЛОҲнинг изни билан киради. ОЛЛОҲ бизга Ислом Каримовни юртбоши этиб тайинлабдими, бунга бўйин сўнамиз. Юртфурушлар ҳеч кимни фикрини ўзгартира олмайсизлар, бошқа иш топинглар", дея ёзғирган.

Пулат Турон: "Энг аввало, Каримов ўзини тўғирлаб олсин! Чунки, карвон бошига қараб саф тортади. Бу ҳокимлар ўзгаргани билан фақат одами ўзгаради, кимки ўзи ўнгланмай ва яратгандан тақво қилмас экан, унинг сўзи ҳеч кимга таъсир қилмайди..." дейди.

Dilshod Tulyaganov: "Оллоҳ назари тушган Ўзбекистонимизга, Оллоҳ суйган бандасини юртбоши қилиб сайлайди. Юрбошимиз соғ-омон босилла умирали узоқ .Оллоҳ куч-қувват берсин".

Farhod Rahmonov: "Hammasi bobomizning ixtiyorida bo'lgani yaxshi. Chunki, bobomiz xalqini asrab-avaylab kelmoqda..."

Husan Chutbaev: "90чи йиллар нима аҳволда эдик, энди нима аҳволда сабрлик билан ҳамма нарсага етишамиз свет, газ ҳам бўлади, яхши томонга ўзгарайлик, дўстлар".

"Одноклассники" даги BBCUZBEK гуруҳимиздан С Т Р Е Л E Ц: "Бизда маҳаллийчилик кучли, сайлаш имконияти халққа берилса, агар номзод бошқа вилоятлик тажрибали кадр бўлса-да, халк ўз "ареалига" мансуб, лекин тажрибасиз кадр бўлса ҳам танлаш эҳтимоли юқори. Шунинг учун, бизни халкимиз бундай демократик сайловга ҳали тайёр эмас, менимча", дейди.

Jahongir Xasanov: "Balki berish kerakdir, balki yoq. Uza ((Ўзбекистон, дейилмоқчи - таҳририят) ahli hali unday demakratiyaga tayor emas. Ishonamanki, tayyor bolganimizda, albatta, oz qolimizga berishadi. Afsuski, yangi hokim ham yangilik olib kelishiga ishonolmayman. Namanganda svet, gaz muammosini birinchi galda hal qilishi kerak, deb oylayman..."

алю мин: "Демократик сайлов йўлига ўтмаганимизгача, орзу қилган жамиятни кўролмаймиз".

Shuhratbek Rahmatullayev: "Бу демократиянинг энг яхши тури бўлади. Лекин, бизда йўл беришмайди...", дея фикр билдирган.

Элдорбек Бекмуродовнинг фикрича эса: "Каримов бу ишни ҳеч қачон ҳокимни халқ сайласин, деб айтмайди ва бунга йўл ҳам қўймайди, сабаби, ҳокимни халқ сайлайдиган бўлса, Каримов режимига катта зарба бўлади".

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

ТЕЛЕГРАМДА ЭСА каналимиз -telegram.me/bbcuzbek ёки BBCUZBEK

Instagram - BBC UZBEK

Twitter - BBC UZBEK

Odnoklassniki - BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio