Ўзбекистон: Келаётган совуқ пиёз ҳосилини хавф остида қолдириши мумкин, аммо бозор бундан ютади – экспертлар

Ҳафтанинг иккинчи ярмида кутилаётган совуқ эртаги пиёз ҳосилининг бир қисми йўқотилишига олиб келиши, бир вақтнинг ўзида эса, бу бозор учун ижобий ҳолатга айланиши мумкин, дея ёзмоқда EastFruit нашри.

Нашр экспертлари ҳафтанинг иккинчи ярмида келиши кутилаётган совуқ ҳаво оқими Ўзбекистондаги эртаги пиёз ҳосилига жиддий таъсир қилишидан огоҳлантирган.

Аввалроқ, 16-19 февраль кунлари мамлакатнинг айрим жойларида ҳарорат кечаси 13-16, кундузи 5-8 даражагача совиб кетиши хабар қилинган эди.

EastFruit нашрининг ёзишича, ҳавонинг бундай совиб кетиши нафақат аллақачон ўсиб чиққан эртаги пиёз, балки карам, сабзи каби эртапишар сабзавотлар, данакли мевалар ва ёнғоқлар ҳосилининг бир қисмини хавф остида қолдириши мумкин.

Маълум қилинишича, ҳавонинг бирдан совиб кетиши Ўзбекистон қатори йирик пиёз экспортчилари ҳисобланмиш Қозоғистон ва Тожикистонда ҳам хавотирли вазиятни юзага чиқарган.

"Яқин вақт ичида Тожикистоннинг, ҳатто, жанубий ҳудудларида ҳам ҳароратнинг -7-10 даражагача кескин совиб кетиши кутилмоқда. Ҳарорат кечаси -12-13 даражагача совиб кетиши ва совуқ кундузи ҳам сақланиб қолиши прогноз қилинаётган Ўзбекистон ва Қозоғистонда вазият янада ёмонроқ", дея хавотир билдирган нашр.

Бир вақтнинг ўзида нашр юзага келиши мумкин бўлган хавотирли ҳолатнинг ижобий тарафлари мавжудлигини ҳам тилга олган.

Ёзилишича, ҳозирда Марказий Осиёдаги омборларда йирик миқдорда пиёз сақланмоқда, шу сабабдан ушбу маҳсулотнинг бозордаги нархи паст.

"Шундоқ ҳам кўп бўлиши кутилаётган эртаги пиёз ҳосили бир қисмининг йўқотилиши ва ҳосилни йиғиб олиш ишларининг қўшимча бир неча кунга чўзилиши омборларда тўпланиб қолган йирик захиранинг бозорга чиқарилишига олиб келади".

"Шунингдек, ҳарорат совиши иситилмайдиган омборларда сақланаётган ҳосилнинг йўқотилишини камайтиради. Ҳар қандай вазиятда ҳам бу ҳолат [ҳавонинг совиб кетиши] бозор учун ижобий бўлиб, охирги пайтда аста-секин қимматлаб бораётган пиёз нархининг мустаҳкамланишига олиб келиши мумкин", хулоса қилган EastFruit нашри.

Очиқ хабарларга қаралса, ҳозирда Ўзбекистон бозорларида пиёз ўртача 4-5 минг сўм оралиғида сотилаётганини кўринади.

Ўтган йил январи ўртасида кузатилган аномал совуқ вақтида омборлардаги ҳосилнинг маълум қисми музлаб қолиши ортидан пиёзнинг нархини қарийб тўрт баробарга қимматлашиб кетган, нарх айрим ҳудудларда 10 минг сўмлик маррани кесиб ўтган эди.

2021 йилда эса мутлақо ўзгача манзара кузатилган — пишиқчилик мавсумида пиёзнинг улгуржи нархи 300 сўмга тушиб кетга, оқибатда, тонналаб маҳсулот аҳлатга ташланган эди.

Ўтган йилнинг декабрида EastFruit нашри Ўзбекистон хорижга пиёз экспортини кескин ошираётгани, ўзбек пиёзининг асосий манзиллари орасида Латвия биринчи ўринга чиққани ҳақида ёзган.

Январь ойида Қишлоқ хўжалиги вазирлиги ўзбек пиёзи "Полша бозорларини тўлдираётгани"ни маълум қилган.

Европага экспорт ортиши шарофати билан январь ўртасидан бери Ўзбекистонда пиёзнинг улгуржи нархи 28 фоиз ёки 4 центга қимматлади, дея ёзган EastFruit 2 февраль куни.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.