Ўзбекистон: “Даҳшатли” коронавирусли ёз эҳтимоли ҳақида ва қизи билан “жинсий алоқа қилган” ота жазоланди O‘zbekiston koronavirus dunyo yangiliklar

"Даҳшатли" ёз

Ўзбекистон Соғлиқни сақлаш вазирлиги карантин тартиб ва чекловларига қўшимчалар киритилгани тўғрисида маълум қилган.

"Сўнгги кунларда мамлакатимизда коронавирус инфекцияси билан касалланиш ҳолатлари ортиб бораётганлигини инобатга олиб, Соғлиқни сақлаш вазирлигининг таклифига биноан, бугунги кунга қадар Республика махсус комиссиясининг қарорлари билан жорий этилган тартиб ва чекловларга қўшимчалар киритилди:

жорий йилнинг 28 июнидан 12 июлига қадар Тошкент шаҳрига қўшни вилоятлардан автотранспорт (автобус, автомобиль) воситалари орқали ўта зарурат бўлмаган ҳолларда кириш бўйича чекловлар ўрнатилди;

хавф ости гуруҳига мансуб аҳоли қатламлари билан биргаликда Тошкент шаҳри аҳолисининг 18 ёшдан катта бўлган барча қатламини ўзлари бириктирилган оилавий поликлиникаларда коронавирус инфекциясига қарши Давлат бюджети маблағлари ҳисобидан ихтиёрий тарзда оммавий эмланиши белгиланди;

жорий йилнинг 28 июнидан бошлаб республика бўйлаб кўнгилочар объектлар - ресторан, тунги клублар, дискотека, караоке, бильярд заллари ва компьютер ўйинлари марказлари ҳамда умумий овқатланиш объектлари - кафе, ошхона, чойхоналарни ишлашига соат 8:00дан 20:00гача рухсат берилади;

кўнгилочар ва умумий овқатланиш объектларида ташриф буюрувчиларга ушбу муассасаларнинг умумий сиғимининг 50 фоизидан қатъий оширмаган ҳолда хизмат кўрсатиш белгиланди".

Сан-эпидемиология хизмати расмийси Ўзбекистонда жорий ёз ўтган йилдагидек оғир ўтиши эҳтимоли тўғрисидаги хабарларга изоҳ берган.

20 июнь куни бухоролик шифокор Азизбек Болтаев мамлакатда коронавирус билан боғлиқ ҳолат яна жиддийлашиб бораётгани сабаблари борасида ўз қарашларини маълум этган.

Шифокорнинг фикрича, бу ҳолатга жамоавий иммунитетнинг табиий равишда йўқолиб бораётгани сабаб бўлмоқда.

Болтаев ўзининг Telegram каналида коронавирусга чалинган бемор танасида 7 ойга қадар вирусга қарши иммунитет пайдо бўлиши, сўнг эса қонда антитаналар миқдори кескин камайиб, қайта касалланиш хавфи яна ортиши ҳақида ёзган.

"Тахминимча, (Ўзбекистонда ушбу гипотезани тасдиқловчи тадқиқотлар ўтказилмаган) ўтган йили аҳолининг аксарияти коронавирус билан касалланди ва бизда жамоавий иммунитет шаклланди. Эндиликда бу иммунитет табиий равишда йўқ бўлмоқда, худди грипп ва бошқа кўплаб юқумли касалликларга нисбатан иммунитет вақт ўтиши билан йўқолганидек", фикр билдирган Болтаев.

Шифокор, ҳозирда, аҳолини эмлаш жараёни "паст даражада" экани ҳамда ниқоб тақаётганлар сони камайиб бораётгани ҳисобга олинса, яқин ойлар ичида Ўзбекистонни ўтган йил ёзда кузатилган "даҳшат" кутаётганини таъкидлаган.

Ушбу иддаоларга изоҳ берган Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбоновнинг маълум қилишича, мамлакатда эпидемиянинг хавф гуруҳига кирувчи аҳолига кенг тарқалишининг олдини олиш бўйича "махсус чоралар кўрилган".

Шунингдек, мулозим шифокор Болтаевнинг антитаначалар борасидаги хавотирлари "асоссиз" эканини билдирган.

"Биолог сифатида, мана шу касалликка қарши 2 йилдан бери ишлаб келаётган Коронавирусга қарши кураш штаби аъзоси сифатида 7 ой муддат асоссиз ёзилган, деб бемалол айта оламан.

Чунки антитаналар пайдо бўлиши, уларнинг қанча муддат сақланиши фақат Ўзбекистонда эмас, ўйлайманки, бутун дунёда ўрганилмоқда. Ҳеч қайси илмий текшириш институти ёки илмий марказ томонидан аниқ, илмий асосланган исбот ҳозирги кунгача йўқ", таъкидлаган расмий.

У касалликдан кейинги иммунитет шаклланиши ва унинг йўқ бўлиб кетиши барча илмий текшириш институтлари учун мавҳумлигича қолаётганини қўшимча қилган.

Қурбонов баёнот берган айни 24 июнь куни мамлакатда йил бошидан бери янги коронавирус антирекорди қайд этилган.

Соғлиқни сақлаш вазирлиги шу куни 476 инсонда коронавирус инфекция аниқлангани, икки бемор вафот этганини хабар қилган.

Кўп лавозимли депутат

Rost24 нашрида депутат Акмал Саидовнинг касбий фаолияти саволга тутилган мақола эълон қилинган.

Мақолада ёзилишича, Олий Мажлис Қонунчилик палатаси Спикерининг биринчи ўринбосари Акмал Саидовнинг Инсон ҳуқуқлари бўйича Ўзбекистон Республикаси Миллий маркази директори лавозимида ҳам фаолият юритиши қонун талабларига зид бўлиши мумкин.

Нашр Миллий марказ директори мақоми президент қарори билан вазир даражасига тенглаштирилганини эслатиб ўтган.

Мақолада Саидов Миллий марказ директори ўлароқ тиббий хизмат ва транспорт таъминоти дохил вазирларга хос имтиёзлардан фойдаланиб келаётгани тўғрисида сўз боради.

"Маълумки, "Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида"ги Қонунига кўра, Қонунчилик палатаси депутатлари ўз ваколатлари даврида илмий ва педагогик фаолиятдан ташқари ҳақ тўланадиган бошқа турдаги фаолият билан шуғулланишлари мумкин эмас.

Аммо, депутат Акмал Саидов маош олмаса-да, ҳақ тўланадиган, вазир билан тенглаштирилган, турли имтиёзларга эга лавозимда ишлаб келмоқда, таъкидланади Rost24 мақоласида.

Kun.uz нашри мазкур ҳолатга аниқлик киритиш мақсадида Миллий марказга мурожаат қилганини маълум этган.

Нашрнинг ёзишича, Миллий марказ матбуот котиби Акмал Саидов директор ўлароқ Миллий марказдан маош олмаслиги, шу сабабдан, юқоридаги қонун талаби бузилмаганини билдирган.

"Очиқлик" қўмитаси

Олий Мажлис Сенатининг Ахборот сиёсати ва давлат органларида очиқликни таъминлаш масалалари қўмитаси ташкил этилди.

25 июнь куни иш бошлаган Сенатнинг ўн олтинчи ялпи мажлисида бу борадаги тегишли қарор қабул қилинган.

Хабар қилинишича, қўмита давлат органлари ва ташкилотлари фаолиятининг очиқлигини таъминлаш соҳасини мувофиқлаштириб боради ҳамда бу борада доимий назоратни амалга оширади.

Шармандагарликдан қочган ота

Навоийда ўз қизи билан жинсий алоқада бўлиб келганликда гумонланган ота жиноий жавобгарликка тортилган.

Олий суднинг хабар беришича, 62 яшар шахснинг ўз қизи отаси у билан жинсий алоқада бўлиб келганини иддао этиб, ҳуқуқ-тартибот органига мурожаат қилган.

Шармандагарликдан чўчиган ота эса қизининг мурожаати бўйича ишни ижобий ҳал қилиб бериш учун суриштирувчига бир миллион сўм пора таклиф этган.

Хабарда ушбу шахс суриштирувчига 800 минг сўм бераётган вақти қўлга олингани айтилади.

Олий суд матбуот хизмати 62 яшар отага нисбатан 1 йилу 9 ойга озодликдан чеклаш жазоси тайинланганини маълум қилган.

Поезд йўлини тўсганлар судга тортилди

Чироқчида электр таъминотидаги узилишлардан норозилик ўлароқ Афросиёб поезди йўлини тўсган одамларнинг 13 нафари судга чақирилган.

Daryo.uz нашри маҳаллий профилактика инспектори маълумотларига таяниб, мазкур иш бўйича 50 нафар фуқарога чора кўрилаётганини ёзган.

7 июнь куни Чироқчидаги Айритом қишлоғи аҳли светсизликдан норози бўлиб, темир йўлга устига йиғилиб тургани тасвирланган видео тарқалган эди.

Ўшанда, туман ҳокими Хуррам Жўраев норози аҳоли билан учрашиб, муаммога "шу куннинг ўзида ечим белгилангани" расман маълум қилинган эди.

Эндиликда, темир йўлга йиғилганларнинг 37 нафарига огоҳлантириш берилиб, "13 инсоннинг хатти-ҳаракатига судда баҳо берилиши" хабар қилинмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek