Россия-Ўзбекистон, мигрантлар: билетлар бунча қиммат? - Видео Rossiya, O‘zbekiston, dunyo, yangiliklar, migrant video

Ниҳоят, авиақатновлар тикланди. Ўзбекистонликлар ҳозирча ҳафтада икки марта - шанба куни "Ўзбекистон Ҳаво йўллари" ва якшанба куни Аэрофлот рейслари орқали Россияга чекловларсиз кириб келишлари мумкин.

Бу Россияга ишлашга келишни кутаётган минглаб ўзбекистонликлар учун хушхабар бўлди. Аммо билет масаласи аллақачон муаммо бўлаётганини айтишмоқда.

Самарқанддан Москвага ишлаш учун келмоқчи бўлган Севара 1200 долларга билет олишга қурби етмаётганини билдирди.

"Ишлай десанг иш бўлмаса, кетай десанг пул. Нима қилишини билмайди одам", дейди у.

"Россия бўлмаса, контракт тўлолмаймиз"

- Авиакассаларга борсам, билет йўқ дейишади. Баъзиси аэропортга телефон қилинг, дейди. Телефон қилсам, ҳали сотмаймиз, деб жавоб беришди, - дейди Москвага учадиган мунтазам рейсга билет излаётган самарқандлик аёл.

42 ёшли Севара 6 йил Москвада меҳнат муҳожирлигида бўлганини, карантин чекловлари бошлангач, ишсиз қолиб ватанга қайтишга мажбур қолганини гапириб берди.

- 2 фарзандимни ёлғиз катта қилаяпман. Бири институтда контрактда ўқийди. Россияда ишламасам, бу пулни тўлай олмаймиз, - дейди аёл.

Россия, мигрантлар: Ўзбекистонликлар нега ҳалиям келолмаяпти?

Севара танишларидан суриштириб мунтазам рейсларга авиабилетлар 1200 долларга сотилаётганини эшитганини айтади.

"Буни эшитиб кайфиятим тушиб кетди. Оддий халқ учун жуда-жуда қиммат", дейди у.

"Кимдан қарз сўрашни билмайман"

Севара Москвага ишлашга кетиш учун бунча пулни топа олмаётганидан хуноб.

- Бу ерда ҳам иш йўқ, пул йўқ. Кимдан қарз сўрашниям билмайман. Ҳамманинг ўз ташвиши ўзига етарли. Ўз рўзғорларини зўрға тебратаяпти. Қарз беришмаса уларниям тушунаяпман, хафамасман.

Ўзбекистонлик аёл йўл очилишини ойлаб кутиб, билет нархини кўриб ҳафсаласи пир бўлганини гапирди.

"Жуда қийин аҳволга тушдик-да!", дейди у.

"1200 доллар - 3 ойлик иш ҳақим"

Биз мунтазам рейсларга билет олишга қийналаётган 6 нафар ўзбекистонлик билан суҳбатлашдик. Уларнинг кўпчилиги билетга пул топишда яқинлари кўмагига таянишини, бири билетлар арзон бўлишини кутишини, бири эса Ўзбекистонга қайтгандаёқ Россияга қайтиш учун йўлкирага 600 доллар пул асраб қўйганини билдирди.

Аудиоёзувга рози бўлган суҳбатдошимиз эса ҳалигача йўлкира излаётганини айтди.

- Ноилож, 1200 долларга ҳам рози бўлдим. Ўғлимнинг контрактини тўлаш учун Россияга боришга мажбурман. 1200 доллар топсам, 3 ойлик иш ҳақимдан воз кечиб тўлайман. Болаларим учун боришим, ишлашим керак, - ҳасрат қилди Севара.

Самарқандлик аёл йўлкира учун кредит сўраб банкка ҳам мурожаат қилганини гапирди.

- Пул топа олмагач, банкка бордим. Кредит олишнинг ўзи ҳам жуда қийин масала экан. Ҳеч ишим тушмаганди, билмасдим. Ҳаракат қилдим ололмадим. Бунинг устига 1000 долларни 1 йилда 1500 доллар қилиб қайтаришим керак. Бу жуда катта фоиз. Шундай сиқилиб кетдим - дейди Севара.

"Ишлай десанг иш бўлмаса, кетай десанг пул"

Севара Россияга меҳнат муҳожирлигига чиқмасдан аввал мактабда ўқитувчи бўлиб ишлаганини айтди. Оз маош билан 2 бола билан кун кўришга қийналишган, айниқса ўғли институтга ўқишга киргач, контракт бўлса ҳам ўқитиш учун Россияга ишлашга кетишга қарор қилган. Ўтган йилги пандемия чекловлари ортидан ишсиз қолиб ватанга қайтишга мажбур бўлганини гапиради.

"Энди йўллар очилиб, Москвага қайтай деганимда эса билетларнинг нархи осмонда", дейди у.

- Абдулла Қаҳҳорнинг бир гапи бор: «Бошингга ишинг тушиб турганда шилиш - ўликдан кафанни ечиб олишдек гап». Ҳозир ҳаммамизга қийин. Банкларда аҳвол бу бўлса, ишлай десанг иш бўлмаса, кетайлик десак билетлар бундай бўлса, нима қилишни билмайман, куйинади Севара.

"Россия кўчиб кетдими?"

Собиқ муҳожир 6 йилки, Россияга қатнаб ишлагани боис, авиабилетлар нархларидан ҳамиша хабардор бўлганини айтади.

- Аввалдан шундай: билетлар Россияга қиммат. Билетлар аввал 200-300 доллар ҳам бўлган. Бу сафаргиси 1200 доллар - ҳаддан ташқари. Тушунмайман, бирданига нарх бунча кўтарилди? Россия билан Ўзбекистон орасида масалан 5000 километр бўлса, ҳозир 15 минг километр бўлиб кетдими? Россия узоққа кўчиб кетдими? Бу нима деган гап? - хуноб бўлди аёл.

Севара Россия учун йўллар очилишини кутиб, кета олмаётгани алам қилаётганини айтди.

Ушбу мақолани ёзишдан олдин авиакомпанияларнинг расмий сайтларига кириб кўрдик. Билетлар бор. У ерда кўрсатилган нархлар 500 доллар атрофида. Аммо биз боғланган 2 та авиакасса ходимлари Аэрофлот рейси учун апрел ва май ойларига билет тугаб бўлганини билдиришди.

Ҳафта давомида қатнови давом этадиган чартер рейсларга ҳам билетлар одатий даврдагидан анча юқори нархларда сотилаётган бўлса-да, авиабилетлар сотувида ҳозирча танқисликлар кузатилмаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek