Ўзбекистон: “Мен қўғирчоқ номзод эмасман” – Жаҳонгир Отажонов билан суҳбат, video, Мирзиёев, O‘zbekiston, Mirziyoyev, dunyo, yangiliklar

Таниқли собиқ қўшиқчи Жаҳонгир Отажонов 2021 йилда ўтиши режалаштирилган президент сайловида ўз номзодини илгари суражагини эълон қилган. Би-би-си, эндиликда, сиёсатчи эканини таъкидлаган собиқ хонанда билан суҳбатлашди.

Олдинроқ санъатни тарк этган Жаҳонгир Отажонов 20 январь куни Instagram саҳифаси орқали мухлисларига мурожаат қилган.

У президент бўлиш ниятида экани ҳақида гапирган.

Собиқ қўшиқчининг бу қарори ўзбекистонликлар томонидан турлича кайфиятда кутиб олинган.

Аксар одамлар Отажонов сиёсатга қадам қўйиш мақсадини жиддий қабул қилмаган.

Шунга қарамай, у, айни дамда, фаоллар қаторида "Халқ манфаатлари" сиёсий демократик партиясини рўйхатдан ўтказишга ҳаракат қилмоқда.

Би-би-си билан суҳбатда Жаҳонгир Отажонов ўзининг бошланаётган сиёсий фаолияти, режалари ва мақсадлари тўғрисида сўзлаб берди.

"Ўзбекистондан бутунлай кетгандим"

Мамлакатда навбатдаги президент сайлови жорий йилнинг октябрь ойида бўлиб ўтиши кутилмоқда.

Жаҳонгир Отажонов мазкур сайловда қатнашиш бўйича тугал қарорга келишидан аввал хорижда яшаб қолиш ниятида бўлгани ҳақида гапиради.

"Санъатни тарк этганимдан кейин тадбиркорлик билан шуғулланиш учун Туркияга кетгандим. Лекин асл орзуларимизни очиқ айтишга бўлган шароит ва давлат раҳбари бу ишларни бемалол қилишимиз мумкинлигини айтгандан кейин менга у иш кичкиналик қилди", сўзлайди Отажонов.

Собиқ хонанда мамлакат президенти бўлиш режаси билан узоқ йиллар яшаганини маълум қилади.

"Тўғриси, тан оламан - ўша пайтлар буни очиқ айтишга қўрққанман", билдиради у.

"Энди сиёсатчиман"

Отажонов ўзининг сиёсий ниятлари одамлар томонидан кулги остига олинаётганига ҳам тўхталиб ўтди.

"Очиғи, аввал сиёсатчи бўлмаганман, сиёсатшуносликда ўқимаганман. Лекин энди сиёсатчиман".

Ҳеч кимни ҳақорат қилмоқчимасман, аммо сиёсат билан шуғулланмаган одам сиёсатни тушунмайди ёки бўлмаса, санъаткордан президент чиқмайди, дейишнинг ўзи катта билимсизлик", дея таъкидлайди у.

Нияти "мухолифат фаолига айланиш эмас"лиги ҳақида гапирган собиқ қўшиқчи Ўзбекистонни Марказий Осиёдаги энг ривожланган мамлакатга айлантириш ниятида эканини маълум қилади.

Аммо яқинлашиб келаётган сайловга ташкилий жиҳатдан тайёр эмаслигини қўшимча қилади.

"Мен доим очиғини айтганман - на сайловолди кампаниям, на дебатларга тайёргарлигим бор. Лекин бу ишни албатта қиламан".

Шунингдек, Жаҳонгир Отажонов ўзининг президент сайлови демократик руҳда ўтажагини "кўз-кўз" қилиш йўлидаги "лойиҳа" экани борасидаги фикрларни ҳам изоҳлайди.

"Баъзи бир изоҳларда бу ҳаммаси ўйин, ҳаммаси тайёрланган, деган қарашларни кўряпман. Ундай эмас - мен қўғирчоқ номзод эмас".

Бир вақтнинг ўзида у сиёсий фаолиятга киришиши ортидан юзага келган нохуш ҳолатлар ҳақида ҳам гапиради.

"Куни кеча партиямиз етакчилари ҳақида нотўғри маълумотлар тарқатилди. Бу ишларни ортида ким турибди, нимани мақсад қилишган - хабарим йўқ".

"Яна Хоразмдаги қариндошларимни ҳам кучишлатар тизимлар суҳбатга чақирибди. Сиёсатга кирганимдан кейин саволлари пайдо бўлиб қолган бўлса керак", дейди у.

Президент оиласи билан яқинлик

22 январь куни президент Шавкат Мирзиёевга ижтимоий тармоқ орқали йўллаган мурожаатида Отажонов амалдаги давлат раҳбари оиласи билан дўст эканини ҳақида сўзлайди.

Би-би-си билан суҳбатда у бу сўзларини шундай изоҳлайди:

"Президентнинг куёвлари билан яқин алоқадаман. Санъаткор бўлган пайтларим мени таклиф қилишар эди. Борардим, хизмат қилардим, ҳурмат-иззатимни жойига қўйиб кузатишарди".

Би-би-сининг "амалдаги президент оиласи билан бундай яқинлик сиёсий мақсадларингизга таъсир қилмайдими", деган саволига Отажонов шундай жавоб қайтаради:

"Ҳеч қанақасига таъсир қилмайди. Мен улар билан рақобат қилмоқчи эмасман. Керак бўлса, нималардир ўрганарман".

Ўзбекистонда сайловларга оид қонунларга ўзгартириш киритилиши ортидан навбатдаги президент сайлови 2021 йил октябрь ойи сўнггида бўлиб ўтиши кутилмоқда.

Ҳозирга қадар Жаҳонгир Отажонов жорий сайловда иштирок этажагини очиқ эълон қилган илк ўзбекистонлик бўлиб қолмоқда.

Амалдаги президент Шавкат Мирзиёев ўз номзодини илгари суриши ёки йўқлиги, ҳозирча, маълум этилмаган.

Мавжуд қонунчиликка кўра, Ўзбекистон Республикаси Президенти лавозимига ўттиз беш ёшдан кичик бўлмаган, давлат тилини яхши биладиган, бевосита сайловгача камида ўн йил Ўзбекистон ҳудудида муқим яшаётган Ўзбекистон Республикаси фуқароси сайланиши мумкин.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek