Феруза Раҳмон: Тақдири Қодирию Шекспирчасига йўрғалаб кетган Марадона - хотира ўрнида, видео, Ўзбекистон, O‘zbekiston, Maradona, futbol, yangiliklar

Аргентина афсонавий футболчиси Диего Марадона ўлими ортидан илк бор жаҳон чемпионлигини қўлга киритди. Терма жамоа сўнгги бор 1986 йилда айнан Диего Марадона билан бирга бу каби ютуққа эришганди.

Мазкур мақола эса, Марадона Бош мураббийлиги остида Аргентина миллий терма жамоаси ҳам жаҳон чемпионлиги учун беллашган футбол бўйича 2010 йилги жаҳон чемпионати пайтида ёзилган.

Футбол афсонаси 2020 йилнинг 25 ноябрь куни 60 ёшида ҳаётдан кўз юмганди.

Афсона, энг зўр, ғайриодатий - Марадона энди йўқ, футбол олами қайғуда, O'zbekiston, Maradona, dunyo

Пеледан фарқли тарзда Марадона кўз ўнгимда афсонага айланган эмасми, қилт этган "гап"ига кўзим ҳам, кўнглим ҳам бефарқ эмас, тушдими, сўроқсиз, истоқсиз чопиб кетаверарди.

Хотира ўрнида - 2010 йил

Ўзбекистон мисолида бўладими ёки Англия, каттаю кичик футбол беллашувларидаги ҳар қандай "бало"га мураббийнинг балогардон бўлишига этим анча пишиб қолган. Униси бўлмаса, бунисидир-да, дейишга бориб қолганимга ҳам анча йиллар бўлган.

Номи Дунгаю шогирдларини қайтиб чемпион қилолмаган Липпи-ку, хўш, хўш, афсонавий Диего Марадона бўлмайдими, сўнгги Жаҳон чемпионатидаги шунча вой-войларимдан сўнг, "балогардонлар" рўйхатининг яна ким-кимлар ҳисобига узайишини кутганим ҳам рост.

Аммо, сизга тўғрисини айтишим керак, воқеаларнинг бунчалик драматик тус олиши хаёлимнинг тор кўчаси уёқда турсин, кенгининг ҳам бир четига келган эмас.

Бир ойлик куйишу кулишлардан энди енгил тин олаётган футбол оламидаги сўнгги хабарлар динамикаси, романтикаси ва фожеаси нақ ўлмас адиб Абдулла Қодирийнинг "Ўтган кунлар" романидагиси дейсиз.

Аҳвол "Айрилиқ" куйини чалишни буюрган Отабекларнинг кўплигидан машшоқнинг жонига баракалла дейиш даражасига бориб қолган.

Бир томондан Франция мураббийси қолиб, бутун бошлик жамоаси билан "Айрилиқ" куйига маст бўлса, кетганми-кетгизилгани номаълум кимсан Марадона федерациясининг ҳамлетона ультиматуми касрига ким кимлар ҳавас қилмаган юлдуз жамоаси ҳажрида куйган.

Бразилия миллий терма жамоаси эса, Дунгаси билан баробарида янги мураббийси деб, дунёнинг ҳар қандай наҳанги ўз сафларида кўришни, чўнтагидаги сўнгги тийинини ҳам қоқиб беришга рози бўлган Какаю Фабианоларининг доғида қолган.

Айниқса, Франция учраган "жудолик"нинг ақл бовар қилмас драмасини айтмайсизми: менинг 20-30 йиллик онгли ҳаётим-ку майли, бунақасига ўзининг, эҳ-ҳееей, неча асрлик тарихи ҳам гувоҳ бўлмаган бўлса керак.

Мишель Платиниси бўладими ё Зайниддин Зидани, айниқса, бу каби жудоликнинг ким-кимлар чиқмаган Францияда юз бераётгани унга янада фожеий тус берган.

Жанубий Африкада қиёмига етган футбол олами не-не наҳанглари можаросининг Қодирийчасига ечилган бугунги ечими бовар қилишни истамаган ақлга ҳам бовар қилишдан бошқа чора қолдирмаган.

Бунча машмашанинг ўнгингизда кечаётгани "Ҳа, бу китобдаги гап-ку", деган тасаллини ҳам фақат тушингизга қолдирган.

Тақдири Шекспирчасига йўрғалаб кетган Марадона

Мен англиялик ёки испаниялик спорт журналисти эмасман. Мавзу танламайман. Аммо ҳар қандай оддий инсон сифатида ўз қизиқишларим бор.

Спорт, айниқса, футбол деганда "ўлиб қоламан". Ишқибозликнинг эса, лўттибозлиги бўлмайди. Чунки ишқибоз ўз номи билан ишқибоз.

"Ишқибоз" журналистлигим эса, ярим тунда қоғоз, қалам пайпаслаб, "кўнглимдаги дардим"ни тўкиб солмасам, кўзимга уйқу келмайдиган даражада.

Табиатан мукаммаллик тарафдори эмасманми, ҳар қандай жамоа ёки футболчига ишқибозлик қилиш одатим йўқ.

Мени тан олдирганини мен ҳам тан оламан. Шунинг учун ҳам "куйсам" қаттиқ "куяман".

Ишқибозлик деб, қанча "қурбонлик" ва "маҳрумиятлар"га боришим сизга аввалги мақолаларимдан яхши аён.

Фақат бармоқ билан санарли бўлгани учунми, айниқса, даҳо футболчиларга бўлган ҳурматимнинг чекини ўзим ҳам билмайман.

Ҳар қандайи ҳақида гап очилса, бўлди, қозондаги кўпикни ҳам ортда қолдириш даражасида тошиб кетаман.

Назаримда, ҳақиқий футболга бўлган чин "муҳаббат"ни фақат ана шундай футболчилар яшатади.

Пеледан фарқли тарзда Марадона кўз ўнгимда афсонага айланган эмасми, қилт этган "гап"ига кўзим ҳам, кўнглим ҳам бефарқ эмас, тушдими, сўроқсиз, истоқсиз, чопиб кетаверади.

Марадонанинг эса, "гап"и тугаса, кошки! Гапирилмаган гап қолмади, деганда ҳам, чиқиб келаверади, хуллас, босган ҳар қадами гап!

Ўпкаси, юраги, олмос кўзли зирагининг гапи энди тугади деганда, Мессидек номи билан юлдуз шогирдларининг чорак финалдаёқ қовун туширишидан, бир ойдирки, Марадонанинг гапи яна қизиган.

"Ҳеч тинчимаган" Марадонанинг кутилмаганда тинчиб, ҳар қандай манаман, деган санъаткор ҳавас қилгудек алфозда бошини ушлаб қолишиданоқ "кетиши" аён бўлган эса-да, "Эй, барибир бу Марадона-ку!" деган ишонч ўзимни қанчалар ишонтириб юборганини фақат ўтган душанбага келиб билдим.

Жаҳон чемпионати тугаган шунча кун давомида кундалик газеталарга кўзни ним очиб югуртириш тактикаси ҳам иш бермади.

Аргентина Футбол Федерациясининг ҳамлетона талаби Ҳамлетдек ҳамиятли Марадонага "кетиш"дан ўзга чора қолдирмаганди.

Тақдирнинг ҳазилини қарангки, "Барча замонларнинг энг зўр футболчиси" бўлган Марадонанинг ўз миллий терма жамоасига мураббийлиги Аргентина футбол тарихидаги энг қисқаси бўлганди.

Марадона деган номи бор эмасми, гапни гапга уриштиришдан чарчамайдиган ҳаммамизни буёғига унинг "кетган"ми "кеткизилган"и қизиқтирган. Худди Ҳамлетнинг "ҳаёт ва мамоти", асрларки, қанчадан қанча файласуфларнинг сочини оқартираётгани каби.

Аргентина Футбол Федерациясининг изоҳидан бир нарсани чақиб олишнинг иложи бўлса, айтинг! Ҳар мақомга солиб, йўрғалатиб юбормаса, мен кафил. Нақ "Мажолисун нафоис," дейсиз....

Лекин, нима бўлган тақдирда ҳам, "кетган"ми ёки "кеткизилган" Марадонанинг ўрнига аллақачон Серхио Батистанинг тайинланиши афсонавий мураббийга айланолмаган футбол афсонасига яна ток шоусига қайтишу Италия полициясига тутқич бермасликдан ўзга машғулот қолдирмаганди....

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek