Беларусь: Лукашенко, “истеъфо бер” – газни одамлар юзига пуркади, Belarus, Rossiya, yangiliklar

Беларусь: Лукашенко, "истеъфо бер" - ўн минглаб одам яна кўчага чиқди. Хабарларга кўра, милиция ўнлаб намойишчиларни ҳибсга олган. Кўздан ёш сиздирувчи газни шундоққина одамларнинг юзига пуркаган. Лукашенко куни-кеча яширинча қасамёд келтирган.

Беларусь, еттинчи ҳафтадирки, намойишлар ичида.

Улар сўнгги президент сайлови натижаларидан норози.

Натижалар Александр Лукашенко фойдасига сохталаштирилган, демоқда.

Лукашенконинг президентликдан истеъфо беришини талаб қилаётир.

Беларусдаги президент сайлови 9 август куни бўлиб ўтган.

Кеча, якшанба кунгиси ўшандан буён ўтказилган 50 инчи намойиш бўлган.

Лукашенконинг яширинча инаугурация маросими ўтган чоршанба куни бўлиб ўтган.

Бунинг ортидан, АҚШ ва қатор Европа давлатлари Лукашенкони қонуний президент, деб тан олмасликларини айтиб чиқишган.

Намойишлар

Кеча, якшанба куни оммавий намойишлар пойтахт Минскдан ташқари, Беларуснинг яна қатор шаҳарларида кузатилган.

Милиция Гомелда "қайсар намойишчилар"ни тарқатиш учун кўздан ёш сиздирувчи газ ва овозли махсус гранаталар қўллаганини эътироф этган.

Ижтимоий тармоқларда тарқалган видеотасвирларда эса, уларнинг газни шундоққина одамларнинг юзларига пуркашгани кўрилган.

Намойишчиларнинг аксарияти хотин-қизлар бўлган.

Улар ортга қайтаркан, милиция ходимларини "фашистлар", деб аташган.

Пойтахт Минскдаги намойишчилар сони эса, бир неча ўн мингга етган.

Еттинчи ҳафтадирки, одамлар дам олиш кунларида яна намойишга чиқишган.

Уларни тарқатиш учун махсус милиция кучлари ташланган.

Хабарларга кўра, бу ерда милиция дуч келган намойишчини ушлаган, куч билан машинага солиб, олиб кетган.

Лукашенко Беларусни 26 йилдан буён бошқариб келади.

Четда Европанинг "сўнгги диктатори" сифатида кўрилади.

Ўзининг яширинча инаугурация маросими чоғида сўзларкан, Лукашенко "беларусларни ташлаб қўйишга ҳаққи йўқлиги, бундай қилолмаслиги"ни айтган.

Аммо ўзининг истеъфосини талаб қилаётган оммавий намойишларни тилга олмаган.

Афтидан, глобал коронавирус пандемиясини назарда тутиб, "башарий инқироз ёқасида" Беларусга хавфсизлик ва муроса лозимлигини айтган.

Унинг сайловдаги асосий рақиби Светлана Тихоновская ва бошқа қатор мухолифат етакчилари Беларусдаги оммавий ҳибсла ортидан, қўшни давлатларга чиқиб кетишган. Ўз ихтиёрлари билан муҳожиратга юз тутишган.

Ими-жимида ўтказилган инаугурация маросимидан кейин Тихановская "Лукашенко ортиқ Беларуснинг қонуний президенти эмас"лигини айтиб чиққан.

"Ўзи мамлакатнинг ягона сайланган президенти бўлиб қолиши"ни баён қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek