Коронавирус: Россия вакцинасига ишонч йўқми? – O’zbekiston, Rossiya,koronavirus

Коронавирус: Россия вакцинасига ишонч йўқми? - Маълум бўлишича, аксарият россиялик шифокорлар бу вакцинага ишонишмаяпти.

Уларга кўра, "Россия вакцинаси самарали эканининг далили йўқ".

"Коронавирусга қарши вакцина жуда қисқа фурсатда ишлаб чиқилган".

Ярмидан ортиқроғи эса, ўзини ҳатто эмлатмоқчи эмас.

Бунга эса, яқинда ўтказилган сўров натижалари далолат қилмоқда.

Россия вакцинаси фойдаланишга тайёр экани ва расман қайддан ўтказилганини 11 август куни шахсан Россия президенти Владимир Путиннинг ўзи маълум қилган.

Путиннинг чиқишидан унинг ўз қизи ҳам Россия яратган вакцина билан эмлангани маълум бўлган.

Россия расман бундай даъво билан чиққан дунёдаги биринчи давлатга айланган.

Аммо Россия президентининг баёноти четда жиддий шубҳа билан қарши олинган.

Жаҳон Соғлиқни сақлаш ташкилоти ҳам Россияни эҳтиёт бўлишга чақирганди.

Сўров

Сўров "Справочник врача" хизмати томонидан ўтказилган.

Унда уч мингдан ортиқ шифокорнинг фикри сўралган.

Сўров иштирокчиларининг ярмидан кўпи ўзини эмлатиш нияти йўқлигини айтган.

Вакцинацияга рози шифокорларнинг сони чорак фоизга ҳам етмаган.

Бор-йўғи 20 фоиз иштирокчи бу вакцинани беморлари, ҳамкасблари ва яқинларига тавсия этишларини айтишган, холос.

Россиянинг коронавирусга қарши вакцинаси 2021 йил 1 январь куни истеъмолга чиқарилиши кутилмоқда.

Шу йил октябр ойидан бошлаб айнан шифокорлар ва касалликка мойил одамларни эмлашни бошлаш режасида.

Британия, АҚШ ва Хитой яратаётган вакциналар эса, ҳалича учинчи босқич синовлари остида.

Сўров натижаларига баҳо бераркан, Россия Соғлиқни сақлаш вазири муовини бунинг ҳеч бир шов-шувли ери йўқлигини айтган.

Сергей Салагайга кўра, "бу - одатий ҳол". "Ишонч - узоқ йиллик амалиёт ортидан келади".

Россия вакцинаси, Ўзбекистон ва ўзбекистонликлар

Россиянинг вакцинаси билан боғлиқ янгилик аксарият ўзбекистонликларнинг диққат-эътиборидан четда қолмагани ҳам кўрилган.

Бунга, бир маънода, кибер фазодаги акс-садолар ҳам далолат қилган.

11 август куни ушбу янгиликка оид постлар энг кўп ўқилган, шарҳланган, муносабат билдирилган ва улашилгани бўлган.

Аммо Россия вакцинаси борасидаги фикрларнинг анчайин зиддиятли экани англашилган.

Бундан хурсанд бўлганлари қаторида, эҳтиёт бўлишга чорлаб қолган ўзбекистонликларнинг ҳам оз эмасликлари кузатилган.

Қозоғистон ва Қирғизистон Россия вакцинасини сотиб олиш тараддудида.

Тожикистон аллақачон бу хусусда "Россия томони билан музокараларини ҳам бошлаб юборган".

Ўзбекистон эса, "COVID-19 вакцинаси клиник синовларининг барча босқичи якунланмагунича Ўзбекистон уни сотиб ололмаслиги"ни айтган.

"Коронавирусга қарши ишлаб чиқарилган вакциналар ҳар томонлама ўрганилиши, Ўзбекистонда ишлатиш бўйича ишчи гуруҳ хулоса берса, вакцинани олиб келиш, ишлатиш тартиблари ва муддатлари белгиланиши"ни маълум қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek