Ўзбекистон: Сув йўқ, совун йўқ, свет йўқ - чортоқликлар карантин шароитларидан шикоят қилмоқда - O'zbekiston

Наманган вилоятининг Чортоқ туманида шанба куни карантинга олинган фуқаролар карантин марказидаги шароитлардан шикоят қилмоқда.

Би-би-сига етиб келган видеотасвир ва суратларда "Айқирон" маиший хизмат касб-ҳунар коллежи биносидаги абгор ҳолат акс этган.

Карантинга олинганлардан бирининг сўзларига кўра, шанба куни улар коллеж биносига олиб келинганида бинонинг иккинчи қаватида электр энергияси ҳам бўлмаган. Қўл ювиш учун сув йўқ.

"Кеча хонамизда ҳатто свет хам йўқ эди. Тўполон қилганимиздан кейин кечаси келиб, электр энергиясини ёқиб бериб кетишди. Ҳалиям иккинчи қаватдаги ҳамма хонада ҳам электр энергияси йўқ", дейди карантиндаги чортоқликлардан бири.

Би-би-сига маълум бўлишича, 4 июль куни Чортоқ яшовчиларидан бири коронавирус инфекцияси юқтирганликда гумон қилиниши ортидан у билан алоқада бўлган 40 га яқин одам турли манзиллардан маҳаллий коллеж биносига олиб келиб жойлаштирилган.

"Акфа" деразалари ясовчи уста экани айтилган коронавирус гумондорининг ўзи вилоят юқумли касалликлар шифохонасига жойлаштирилгани айтилади.

Ундан олинган таҳлил натижалари ҳануз маълум эмас.

Карантиндагиларнинг айтишича, улардан ҳозиргача таҳлил олинмаган, кеча ва бугун уч маҳал тана ҳароратлари ўлчанган, холос.

Би-би-си суҳбатлашган чортоқликлар карантин марказидаги санитария талабларига жавоб бермайдиган шароитлар боис касаллик орттириб олишдан қўрқаётганликларини айтишди.

Уларнинг маълум қилишларича, ўз хавотирларини туман ва вилоят соғлиқни сақлаш расмийларига етказишган.

"Ҳожатхона, ванна деган нарса йўқ. Гигиена талабларига умуман жавоб бермайди. Сув фақат кранда бор. Аммо уни ичиб бўлмайди. Қайнаган сув ичяпмиз фақат. Чой қилишга ҳам шароит йўқ. Бугун обедда амаллаб бир пиёладан чой ичдик. Хоналарда кроватлар синиб ётибди. Эрталаб, обедда ва кечқурун иситмамизни ўлчашди, бошқа ҳеч қандай муолажа йўқ. Медсестралардан савол сўрасак, врачдан сўрайсиз, дейди. Аммо бу ерда беморларга бириктирилган врачнинг ўзи йўқ. Вирус юқтирган дейилган одамни машинада олиб келган врач ҳам шу ерда карантинда экан. Ҳатто қабулхона йўқ. Кўчада дарахтнинг тагида иккита медсестра қабул қиляпти. Бир хонада иккитадан одам ётибди. Бугун эрталаб хамир овқат еган бир кишининг тоби қочди. Аммо ҳеч ким кўргани йўқ. Облздравга шикоят қилганимиздан кейин озиқ-овқатимиз сал ўзгариб қолди. Лекин шароит ўша-ўша. Ҳеч ким хабар олмаяпти", - дейди Би-би-си билан суҳбатда номи очиқланишини истамаган карантиндагилардан бири.

Би-би-си вазият юзасидан изоҳ олиш мақсадида вилоят Соғлиқни сақлаш бошқармаси бошлиғи Солижон Мўминовга боғланди, аммо Мўминов саволни эшитгани заҳоти телефон алоқаси узилди ва бошқа боғланишнинг имкони бўлмади.

Соғлиқни сақлаш вазирлиги ҳануз Би-би-сининг бу борадаги сўровига жавоб қайтаргани йўқ.

3 июль куни Ўзбекистон COVID-19 инфекциясига қарши шошилинч чоралар доирасида Жаҳон Банкидан 95 миллион АҚШ доллари миқдоридаги қарз маблағлари олаётгани маълум қилинган.

Ҳозирга қадар коронавирус ва унинг оқибатларига қарши кураш мақсадлари учун хорижий молия ташкилотларидан олинган қарзлар 1 миллиард доллардан ошиб кетган.

Ҳукумат карантин чекловлари шароитида аҳолига тўғридан-тўғри ёрдам тарқатиш ҳақидаги чақириқларни рад этган.

Ўзбекистон: Коронавирус беморлари сони 10 мингга яқинлашди, ҳукумат бош инфекционист билан маслаҳатлашмаган

Коронавирус иқтисоди: Ўзбекистон яна ярим миллиард доллар қарз олмоқда, пуллар қаерда?

Коронавирус тарқалиши бўйича янгилаб бориладиган харита Koronavirus

Айрим мустақил иқтисодчилар пандемияга қарши кураш учун ажратилаётган маблағларнинг мақсадли сарфланаётганини савол остига олишган ва Соғлиқни сақлаш вазирлигини барча молиявий ҳисоботларни очиқлашга чақирганлар.

5 июлдан Ўзбекистонда коронавирус беморларини даволаш бўйича янги тартиб кучга кирган.

Унга мувофиқ, касаллик аломатларсиз кечаётган енгил шаклдаги беморлар шифокор тавсиялари асосида, санитария-гигиена қоидалари ҳамда парвариш учун зарур шароитлар мавжуд бўлганда, уй шароитида даволанишига рухсат этилади.

Республика махсус комиссиясининг 30 июндаги қарорида Миллий гвардия ҳамда Маҳалла ва оилани қўллаб-қувватлаш вазирлиги ходимлари яшаш манзили бўйича қатъий назорат олиб бориши айтилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek