Журналистларни таҳдид қилган Ортиқхўжаев: Ёшлигимда журналист бўлишни хоҳлаганман - O'zbekiston

Тошкент шаҳар ҳокими Жаҳонгир Ортиқхўжаев ёшлигида халқаро журналист бўлишни хоҳлаган.

Бу ҳақда у пойтахт битирувчи ёшлари билан учрашув чоғида гапирган.

"Мен итнинг боласи эмасман" - kun.uz нинг икки журналисти истеъфо берди

Прокуратура Тошкент ҳокими Ортиқхўжаевга чора кўришга ожизми?

Мирзиёев мақтаманг деса, Ортиқхўжаев мақтанг дейдими?

"Халқаро журналистлар бўларди. Кондратъев, Пономарев... Фуқаролар уруши жойларидан тўғридан-тўғри оларди. Кейин Япониядан, Америкадан, Германиядан... Кейин энг кучлиларидан яна Шаҳноза Ганиева ва Мухтор Ганиев.. эшитганмисизлар, йўқми, биздан чиққан... Улар Афғонистондан, оғир-оғир журналистик фаолиятини олиб боришарди. Ман уларни жуда кўп. котта бир.. ҳавасим келарди. Менам уларга ўхшаб халқаро журналист бўлишни чин дилдан, қатту хоҳлаганман, жудаям хоҳлаганман..." деб айтган ҳоким.

У мактабни битириб, дипломатия университети (ҳоким институт деб айтган - таҳр.)га ҳужжат топширгани, аммо киролмаганини айтиб, афсус билдирган.

'Итнинг боласи, принципсиз, қашшоқ...'

Ўтган йил ноябрида интернетга сиздирилган аудиода Ортиқхўжаев журналистларни "итнинг боласи" деб атаган ва уларни "гейга чиқариш" ва йўқотиб юбориш билан таҳдид қилган эди.

"Ўзи улар ким? Улар учига чиққан махлуқлар! Онанинг боласими булар ё итнинг боласими?! Принцип йўқ, ифлос, қашшоқ. Мен шундай қилишим мумкинки, сизлардан маҳаллада бош кўтариб юролмайсизлар. Бу қўлимдан келади...

Икки-уч кун биттанг бесабаб уйдан чиқиб кетларинг, йўқолиб қолларинг… Уч кун! Бесабаб биттанг уйдан чиқиб кетларинг! Сизлар буни истайсизларми? Уч кун йўқ бўлиб қолса, ҳамма жимжит! Ў-ў-ў, сан тирикмисан, ҳеч ким хабар олмайди, айтиб қўяй, сани! У ер - бу ерда ёзишади, бир ҳафтадан кейин унутишади. Бўлди! Қаердадир чўкиб ўляпти-да чўмилаётганда дейишади. И всё. Ҳаёт шунақа!", деган Жаҳонгир Ортиқхўжаев.

Кун.уз нашри ҳоким ўзининг журналистларига таҳдид қилганини тасдиқлаган, аммо орадан бир кун ўтиб, Ортиқхўжаев билан "муросага боргани"ни эълон қилган.

Таҳририят ҳокимнинг можаро юзасидан изоҳини қониқарли, деб топган.

Kun.uz нинг икки журналисти Зафарбек Солижонов ва Баҳодир Аҳмедовлар ҳокимнинг таҳдидларига норозилик белгиси сифатида ишдан кетган.

"Мен итнинг боласи эмасман ва последняя тварь ҳам эмасман. Мен журналистлик билан шуғулланган юристман. Шунчаки, бу давлатда қонун ишлашини хоҳлагандим холос", деб ёзган Зафарбек Солижонов.

'Любая бизнес хороша'

Тошкент шаҳар ҳокими қилган таҳдидлари учун ҳеч қачон узр сўрамаган.

Бош прокуратура Би-би-сига ҳодисани ўрганаётганини айтган, аммо унга ҳозиргача ҳуқуқий баҳо бермаган.

Сенат Ортиқхўжаев билан журналистлар можаросида сукуит сақлагани учун танқид қилинган.

2018 йилда Ортиқхўжаев маҳаллий журналистлардан салбий хабарларни тарқатмасликни сўраган, унга кўра, салбий хабарларни ўқиган инвестор мамлакатга келмайди.

Лондондаги Open Democracy журналистлари Ортиқхўжаев ҳокимлик лавозимидан ўз бойлигини кўпайтириш йўлида фойдаланаётган бўлиши мумкинлигини айтишган ва унга алоқадор ширкатлар пул ювишда иштирок этаётган бўлиши мумкинлигидан хавотир билдиришган.

45 ёшли ҳоким ва сенатор Жаҳонгир Ортиқхўжаевнинг бойлиги қанча экани маълум эмас, аммо у Ўзбекистоннинг энг йирик тадбиркори деб ишонилади.

Ортиқхўжаев асос солган Akfa ва Artel ширкатлари қурилиш ва маиший техника соҳасида монопол мавқеъга эга.

Унинг "любая бизнес хараша" ибораси машҳур бўлиб кетиши ортидан ўтган йилнинг 16 августида Ўзбекистонда айни номдаги ширкат рўйхатдан ўтказилган.

"Lyubaya biznes xorosha" масъулияти чекланган жамиятининг низом жамғармаси 3 млрд сўм ва муассис аёл киши экани маълум қилинган.

BBCUZBEK.COM билан Telegram орқали +44 7858860002номери билан боғланинг.

Telegram каналимиз: @bbcuzbek