Ўзбекистон коронавирус чўққисидан ўтди, Америка ўлим чўққисига яқинлашмоқда - Koronavirus, O'zbekiston

Ўзбекистон Соғлиқни сақлаш вазирлиги яна бир вилоятни "коронавирусдан ҳоли ҳудуд" деб эълон қилди.

"Навоий вилояти ҳам коронавирус инфекциясидан ҳоли ҳудудга айланди. Бугун вилоят юқумли касалликлар шифохонасидан коронавирус инфекциясига чалинган сўнгги бемор буткул соғайди. У вилоят соғлиқни сақлаш бошқармаси масъуллари иштирокида реабилитацияга кузатилади", дейилади ССВ 4 май куни тарқатган хабарда.

Аввалроқ Жиззах ва Қашқадарё вилоятлари коронавирус инфекциясидан буткул халос бўлгани хабар қилинганди.

2020 йил 4 май соат 15:00 ҳолатига кўра, 32 нафага ошиб, мамлакатда коронавирус инфекцияси қайд этилганлар сони 2181 нафарга етган.

Бу бир кун олдингидан 32 нафарга кўпдир.

Коронавирус инфекциясидан бутунлай соғайганлар сони 1370 нафарга етган.

'Пасайиш бошланди'

Айни пайтда Ўзбекистонда коронавирус инфекцияси тарқалишининг чўққиси ўтилган ва пасайиш бошланган.

Бу ҳақда Ўзбекистон Соғлиқни сақлаш вазирлиги ҳузуридаги Вабо, карантинли ва ўта хавфли инфекциялар профилактикаси республика марказининг лаборатория мудири Маъруфжон Мадаминов маълум қилган.

"Биз эпидемия чўққисидан ва текислигидан (плато) ўтдик. Энди касаллик юққанлар сони камайиши кутилмоқда", дея Мадаминовдан иқтибос келтирмоқда Спутник нашри.

Унинг сўзларига кўра, ушбу жараён турли ҳудудларда турлича юз бермоқда.

"Аҳоли сони кўп бўлган Тошкент, Бухоро, Самрқанд ва Фарғона водийсида - касаллик юқиш ҳолатлари учрамоқда. Четдан олиб келиш ҳолатлари бутунлай тўхтатилган. Шу сабабли босқичма-босқич чекловларни олиб ташлашга қарор қилинди", деб айтган ўта хавфли инфекциялар бўйича мутахассис.

Айни пайтда Ўзбекистоннинг бош санитария инспектори Нурмат Отабеков икки кундан кейин пойтахтда карантин тугаши ҳақидаги хабарларни рад этиб чиққан.

Унинг душанба куни Тошкентда ўтган брифингда айтишича, ижтимоий тармоқларда тарқатилган, Тошкент шаҳрида карантин икки кундан кейин тугайди деган хабарлар асоссиз.

"Карантинни ўрнатиш ва уни бекор қилиш Республика мувофиқлаштириш комиссиясининг ваколати ҳисобланади", деб айтган Отабеков.

Ўзбекистон 30 апрелдан айрим карантин чораларини юмшатишни бошлаган.

Соат 07:00 дан 10:00 гача ҳамда 17:00дан 20:00 гача фуқароларнинг шахсий ва хизмат енгил автотранспортларидан фойдаланишларига рухсат берилган.

Қишлоқ хўжалик маҳсулотларини етиштирувчи тадбиркорларга барча турдаги енгил автотранспорт воситаларида ҳудудлараро ҳаракатланишига рухсат берилган.

4 май куни ИИВ Миграция ва фуқароликни расмийлаштиришҳамда йўл ҳаракати хавфсизлиги бўлинмалари фуқароларга хизмат кўрсатишни бошлаган.

Бунда, фуқароларни қабул қилишда уларнинг карантин қоидаларига тўлиқ риоя қилинишларига алоҳида эътибор берилиши таъкидланган.

Иқтисодий ўсиш ҳам пасайди

Айни пайтда Марказий банк коронавирус пандемияси сабабли 2020 йилда мамлакат ялпи ички махсулотининг ўсиш суръатлари кўзланган 5,2−5,5 фоиздан 1,5−2,5 фоизгача пасайиши кутилаётганини маълум қилган.

Бу Ўзбекистоннинг янги тарихида энг катта пасайишдир.

МБ мигрантларнинг пул ўтказмалари 30-35 фоизга қисқаришини прогноз қилмоқда.

Марказий банк карантин даври тугаганидан сўнг пандемиядан энг кўп зарар кўрган соҳаларни тиклашга ўртача 3−12 ой керак бўлади.

"Бунда, туризм, хизматлар ва чакана савдо ҳамда йўловчи ташиш соҳаларида иқтисодий фаоллик нисбатан секин тикланиши кутилмоқда", дейилади Марказбанк хабарида.

Вакцинагача 100 минг қурбон

АҚШдаги Жон Хопкинс университети душанба куни ҳолатига эълон қилган маълумотларга кўра, дунёда коронавирусга чалинганлар сони 3,5 миллион кишини ташкил этмоқда. 247 ярим минг инсон вафот этган.

Президент Дональд Трампнинг айтишича, АҚШда коронавирусдан ўлганлар сони 100 минг кишига етиши мумкин.

Айни пайтда у ўз маъмурияти эпидемияга ўз вақтида муносабат кўрсатмагани ҳақидаги айбловларни рад этган.

Қўшма Штатлар коронавирусга чалинганлар ва ўлганлар сони бўйича дунёда етакчилик қилмоқда.

1 миллион 100 минг одам вирусни юқтирган, 67 минг инсон ҳаётдан кўз юмган.

Ўзининг икки соатлик онлайн орқали чиқишида Трамп вакцина шу йилнинг охирига тайёр бўлишини айтган.

Шифокорлар ва олимлар вакцинага бир-бир ярим йил кетишини айтиб келишади.

Минтақадаги вазият

Тожикистонда коронавирусга чалинганларнинг умумий сони 230 кишига етган.

Расман коронавирусдан қурбон бўлганлар сони 3 нафар эканлии айтилган.

Зотилжамдан қурбонлар сони ўнларча экани ҳам маълум бўлган.

Коронавирус мамлакатнинг барча вилоятларига тарқалган.

2 май куни Тожикистон шифохоналарида коронавирусга гумон қилинган 2 минг 782 киши қайд этилган, уларнинг 217 нафари тиббий кўрикдан сўнг уйларига юборилган.

Мамлакатга "коронавирус инфекцияси кириб келиши муносабати билан" Душанбе шаҳар ҳокими Рустам Имомали пойтахтда уч минг кишига мўлжалланган махсус вақтинчалик шифохона қуришга буйруқ бергани хабар қилинади.

Коронавирус: Ўзбекистон вакцина устида ишламаяпти. Нега?

Коронавирус ва масофадан ишлаш – Ўзбекистонда ҳам интернет тезлашадими?

Коронавирус аслида АҚШ ва Хитой ўртасидаги урушми? Koronavirus, AQSh, Xitoy

Душанба куни Тожикистон пойтахтида соғлиқни сақлаш расмийлари билан Жаҳон Соғлиқ ташкилоти ҳайъати ўртасида музокаралар бўлиб ўтган.

ЖСТ коронавирус билан боғлиқ рискларни баҳолаш бўйича тожикистонлик мутахассисларга кўмак бериши айтилмоқда.

Қозоғистонда 44 та янги ҳолат аниқланиб, умумий касалланганлар сони 3964 кишига етгани айтилмоқда.

Энг кўп касаллар мамлакатнинг жанубий пойтахти Олма-Отада.

Қирғизистонда душанба куни 35 та янги ҳолат қайд этилган. Вирусга чалинганларнинг умумий сони 830 кишини ташкил этмоқда.

Соғлиқни сақлаш расмийларига кўра, вирусга чалинганлар орасида Қирғизистон Ички ишлар вазирлигининг 27 ходими ҳам бор.

Россияда охирги 24 соатда 10 минг 581 та янги ҳолат аниқланган. Бу бир кун олдингидан камроқ.

Пойтахт Москвада вазият мураккаблигича қолмоқда. Кунига ўртача 1700 нафар бемор шифохонага олиб келинаётгани айтилади.

Москва ҳокими Сергей Собянин хали инфекция чўққисисига чиқмаганини айтган.

Охирги суткада Россияда 76 киши вирусдан вафот этган.

Ўзбекистоннинг жанубий қўшниси Афғонистонда коронавирусга чалинганлар сони кескин ошгани боис мамлакат бўйлаб карантин 24 майга қадар узайтирилган.

Дунёда

Италияда душанбадан бошлаб одамларга ўзлари яшаб турган ҳудудга қўшни минтақадаги яқинларини бориб кўришга рухсат берилган.

Минтақалар орасидаги алоқа ҳануз чекланган. Италияликларга шунингдек, ижтимоий масофа сақлаган ҳолда спорт билан шуғулланиш учун кўчага чиқишга изн берилган.

Мактаб, кинотеатр ва аксарият дўконлар ёпиқ қолмоқда.

Ўтган дам олиш кунлари Испаниянинг катта ёшдаги аҳолиси охирги 7 ҳафтада илк бор спорт билан шуғулланиш учун кўчага чиқишга муваффақ бўлган.

Бунгача фақат озиқ-овқат харид қилиш ва итни сайр қилдириш учун чиқиш мумкин эди.

11 майдан Франция карантинни юмшатишга бошлаши кутилмоқда. Болалар мактабга қайтиши мумкин бўлади, аммо буларнинг барчаси босқичма-босқич амалга оширилади.

Германияда черковлар, музей ва гўзаллик салонлари очилмоқда.

Британия ҳукумати эса келаётган якшанба локдаундан чиқиш бўйича батафсил редани очиқлашини айтган.

Душанбадан Португалия ҳам локдаундан чиқишни бошлаган. Шаҳардаги парк ва кийим-кечак дўконлари очилган.

Энг кўп одам карантинда ўтирган Ҳиндистонда карантиндан чиқишнинг учинчи босқичи бошланган. Унда фаррошлар, ошпаз ва чилангарларнинг ишга қайтишига рухсат берилади.

Мисрда меҳмонхоналар ички туризм учун очилмоқда, аммо меҳмонлар сони умумий ўринларнинг 25 фоизидан ошмаслиги керак.

Японияда эса фавқулодда ҳолат май охирига қадар узайтирилган.

Йирик шаҳарлардаги шифохоналар касаллар оқимига бас келолмаётгани хабар қилинади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek