Ўзбекистон: Блогер Шабнам Оллошкурованинг отаси қизининг тақдиридан хавотир билдирди

Бош прокуратура блогер Шабнам (Нафосат) Оллошкурованинг мажбуран руҳий шифохонага ётқизилганини тасдиқлади. Блогернинг отаси қизининг тақдиридан қаттиқ хавотирланмоқда. Яқинлари Оллошкуровага кучли таъсир қилувчи дорилар берилганидан шубҳа билдирди.

Блогернинг яқинларига ҳам босимлар бўлаётгани айтилмоқда.

Хоразм вилоят руҳий асаб касалликлари диспансерида мажбуран сақланаётган Шабнам (Нафосат) Оллошкурова 4 сентябр куни бир дақиқа акаси билан кўриштирилган.

Бир дақиқалик учрашувда ака-сингил ҳоли гаплаша олмаган. Учрашув Боғот туман ИИБ бошлиғи ва фуқаро кийимидаги хоразмлик бўлмаган шахс назорати остида бўлган.

Би-би-сига маълум бўлишича, блогер ноодатий ҳолатда кўринган. У кучли психотроп дори қабул қилгандек таассурот қолдирган.

Шабнамнинг ташқи кўринишида қийноқ излари кўринмаган. Шунга қарамасдан, ҳар доим хушчақчақ юрадиган Оллошкурова доридан ҳуши жойида эмасдек ҳолатда ўтирган.

Блогернинг яқинлари у мажбуран шифохонага олиб кетилган кунда жуда хушчақчақ ва эс-ҳуши жойида бўлганини таъкидламоқда.

"Қизимни у ерда ё ўлдириб юборишади ёки наркоман қилиб чиқаришади. Бугун Урганч милицияси катта ўғлимни олиб кириб қўрқитишибди. Нафосат ҳақида журналистларга хабарни сен бергансан, деб видеоларга тушириб олибди. Хабарни мен берганман", дейди блогернинг отаси Болтабой Оллошкуров.

Бош прокуратура матбуот котиби Ҳаёт Шамсуддинов xabar.uz сайтига Нафосат Оллошкурованинг руҳий шифохонага мажбуран ётқизилганини тасдиқлаган.

Хабарда айтилишича, 26 сентябр куни қамоқ жазосини ўтаётган Оллошкурова руҳий ҳолатида ўзгаришлар сезилган.

Тез ёрдам чақиртирилиб, психиатрнинг тавсияси билан уни вилоят руҳий асаб касалликлари диспансерида кўрикдан ўтказиш учун олиб кетишган.

"Вилоят руҳий асаб касалликлар диспансери томонидан фуқаролик ишлари бўйича Урганч туманлараро судига мурожаат қилиб, фуқаро Н.Оллашукурова руҳиятида ўзгаришлар содир бўлаётганлигини, унда «Психоподобний синдром, поронаяльный синдром» касаллиги аломатлари кузатилганлиги, ўзи ёки атрофдагилар учун бевосита хавф туғдириши, унинг ночорлиги, асосий ҳаётий эҳтиёжларини мустақил равишда қондиришга лаёқатсизлиги сабабли, психиатрия муассасасига жойлаштиришни сўраган", дейилади хабарда.

Шундан сўнг фуқаролик ишлари бўйича Урганч туманлараро судининг 30 сентябрда ҳал қилув қарорига асосан, Нафосат Оллашкурова ғайриихтиёрий тартибда Хоразм вилоят руҳий асаб касалликлари диспансерига юборилган.

Хабарда блогерга қандай дорилар берилаётгани айтилмаган. У нима сабабдан яқинлари билан эркин ҳолатда эмас, балки ҳуқуқ-тартибот идоралари масъуллари назоратида кўриштирилганига изоҳ берилмаган.

Блогернинг яқинлари Бош прокуратура изоҳига ишонмаяпти.

Уларга кўра, Шабнам (Нафосат) Оллошкурова блогерлик фаолияти учунгина руҳий шифохонага ётқизилган.

Нафосатнинг руҳий ҳолати яқинларида ҳеч қачон шубҳа уйғотмаган.

Би-би-си манбасининг айтишича, Бош прокуратура хабарида айтилган 26 сентябр куни Шабнам (Нафосат) Оллошкурованинг руҳий ҳолати ва соғлиғи жойида бўлган.

У гўёки тез тиббий ёрдам машинаси билан шифонага олиб кетилгани айтилаётган 26 сентябр куни тушдан сўнг телефон орқали адвокати билан гаплашган.

"Нафосат адвокатга унга нисбатан жиноий иш очишлари мумкинлигини, шундай бўлса ҳимоя қила олиш ёки олмаслигини сўраган. Қамоқ жазосини ўтаётган вақти Нафосатдан Наманганда снос масаласи бўйича ёритган ишларини батафсил сўрашган. У телефон орқали адвокати билан ҳазил-ҳузул қилиб, кўтаринки руҳда гаплашган", дейди Би-би-си манбаси.

Қизим руҳий хаста бўлиши мумкин эмас

Блогернинг отаси Болтабой Оллошкуров Тошкентда ижарада яшайди. Унинг юрак хасталилиги бўйича жарроҳлик амалиётидан чиққанига ҳали бир ой бўлгани йўқ.

"Қизим руҳий хаста бўлиши ва Бош прокуратура хабарида айтилаётганидек асосий ҳаётий эҳтиёжларини мустақил равишда қондира олмаслиги ёлғон. Агар ўзини бошқара олмаса қизим мени даволатармиди? Бугун икки эгизак қизининг туғилган куни. Невараларим учга киришди. Улар ҳар куни йиғлаб онасини сўраяпти. Биз кўчага чиқишга ҳам қўрқиб ўтирибмиз", дейди у.

31 ёшли блогер Шабнам (Нафосат) Оллошкурова ёлғиз она. Унинг 3 ёшли икки эгизак қизи бор.

Отаси қизи журналистик фаолияти учун қамалгани ва шу сабаб руҳий хастахонага мажбуран ётқизилганига ишонади.

"Қаттиқ хавотирланяпман. Чунки у ердан қизимнинг ё жасади чиқади ёки турли дорилар бериб наркоман қилиб чиқаришади. Расмийлардан уни зудлик билан болницадан чиқариб, менинг олдимга олиб келишларини талаб қиламан", дейди Болтабой Оллошкуров.

Шабнам Оллошкурова номи билан ёзадиган Нафосат асли ўқитувчи ва у ўзининг Facebook даги саҳифасида Ўзбекистонда бўлаётган воқеаларга фаол фикр билдириши билан машҳур бўлган.

Оллошкурова Facebookдаги саҳифаси орқали 22 сентябр куни адолат излаб Тошкентга, ИИВ вазири билан учрашиши учун яқинлари билан Хоразмдан пиёда йўлга чиқган шоир ва журналист Маҳмуд Ражабнинг ҳаракатларини ёритган эди.

Жонли тарзда эфирга узатилган видеоларда у номаълум аёллар томонидан ҳужум бўлганини айтган.

Шундан сўнг Хоразмда «Эрк» партияси фаоли, шоир ва журналист Маҳмуд Ражаб ва асосан унинг қариндошларидан иборат экани айтилган 20 кишидан ортиқ намойишчилар куч билан автобусга ўтқазилиб, номаълум томонга олиб кетилгани хабар қилинган.

Кейинчалик Маҳмуд Ражаб ва Нафосат Оллошкуроваларнинг 10 суткага қамалгани маълум бўлди.

3 октябр куни Маҳмуд Ражаб жазосини ўтаб бўлганидан сўнг очиқликка чиқарилган.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek