Мирзиёев автобусда ёниб кетганларнинг оила аъзоларига ҳамдардлик билдирди

Президент Мирзиёев Қозоғистонда ёниб ҳалок бўлган Ўзбекистон фуқароларининг яқинларига ҳамдардлик билдирди. Ақтўбе вилоятида ёниб, 52 кишининг умрига зомин бўлган автобуснинг йўловчи ташиш учун лицензияси бўлмаган.

"Шавкат Мирзиёев ҳалок бўлганларнинг оила аъзолари ва яқинларига чуқур ҳамдардлик билдиради", - дейилди «Ўзбекистон» телеканали «Ахборот» дастурида.

1989 йилда ишлаб чиқарилган автобус сўнгги бор 2015 йили техник кўрикдан ўтган.

Бу ҳақда Қозоғистон инвестиция ва ривожланиш вазирлиги матбуот хизмати маълум қилди.

Интерфакс агентлигининг вазирликдан иқтибос келтириб ёзишича, 1989 йили ишлаб чиқилган, 59 кишига мўлжалланган, давлат рақами Х335РСМ бўлган KassbohrerSetra русумли автобус Чимкент - Қозон йўналиши бўйлаб халқаро қатновни амалга оширган.

"Биздаги маълумотларга кўра, ушбу автобус мунтазам қатновлар рўйхатида йўқ, номунтазам йўловчи ташиш бўйича лицензия олмаган. Ижара асосида ишлатилган бўлиши мумкин", дейилади хабарда.

Автобуснинг эгаси сифатида Ордухан Мехтиев кўрсатилган. Автобус мажбурий техник кўрикдан 2015 йилнинг 17 августида ўтказилган. Техник кўрик муддати 2016 йилнинг 17 августида тугаган.

Пайшанба куни маҳаллий вақт билан эрталабки соат 10:30 да Чимкентдан Россиянинг Қозон шаҳрига йўналган автобус ёниб кетган.

Натижада аксари Ўзбекистон фуқароси бўлган 52 киши ҳодиса жойида нобуд бўлди. 5 киши ёнғиндан қутилиб қолишнинг уддасидан чиққан.

Автобус нима учун тез ёнган?

Автобуснинг тез ёниб кетиш сабаблари борасида турли тахмин ва фаразлар айтилмоқда.

Ички ишлар вазирлиги томонидан ташкил қилинган махсус телефон рақамидаги ходимнинг BBCUZBEK.COM га айтишича, автобус ичида пропан гази бўлган бўлиши мумкин.

Автобуснинг бу қадар тез ёниб кетишига турли фараз ва тахминлар ёзилмоқда.

Бироқ ёнғиннинг нима учун бу қадар тез тарқалиб кетгани бўйича расмий хабар берилгани йўқ.

BBCUZBEK.COM Қозоғистонда бир неча йил автобус ҳайдаган ҳайдовчи билан боғланди.

Унинг айтишича, бошқа собиқ совет ўлкалари каби Қозоғистонда ҳам автобусларнинг техник кўрикдан ўтиши пора ва таниш-билишчиликка асосланган.

"Халқаро рейсларга чиқадидан аксар автобуслар хусусий ширкатларга тегишли. Шунинг учун ҳар ким хавфсизлик масаласини ўз чўнтаги ва виждонига қараб ҳал қилаверади. Мен ҳайдаган автобусда кичик камчилиги бўлса ҳам дарров эгасига айтардим. У янгисини олиб берарди. Бироқ ҳамма ҳам бундай қилмайди", - дейди у.

Суҳбатдошнинг айтишича, автобуслар эски бўлгани боис унинг ичидаги автоном иситиш тизими ишдан чиққан ҳоллар кўп учрайди. Бундай ҳолатда айрим автобуслар унинг ичини пропан газ баллонлар ёрдамида иситиши ёки музлаб қолган тормоз ёки бошқа мосламаларнинг йўлларини эритади.

Натижада ёнғин келиб чиқиши ва у зудлик билан бутун автобусга ёйилиши мумкин.

Эшик очилмагани учун йўловчилар автобусдан чиқолмаган

Автобуснинг ён эшиги очилмаган. Бу қолган одамларнинг ёнаётган автобусдан вақтида чиқиб кетишига тўсқинлик қилган. Бу ҳақда Ақтўбе вилоят Фавқулодда вазиятлар қўмитаси матбуот котиби Виталий Синев Спутник нашрига маълум қилган.

"Автобус тўхтаган, ҳамма ҳайдовчилар ундан қочиб чиққан. Одамлар эшикка қараб югурган, бироқ ён эшик очилмаган", деган Виталий Синев.