Соипов ‘ҳужуми’дан кейин Ўзбекистон-АҚШ ўртасида илк мулоқот
Сурат манбаси, president.uz
Икки томон ўртасидаги расмий мулоқот Ўзбекистон пойтахти Тошкентда бўлиб ўтган.
Шавкат Мирзиёев АҚШ президенти маслаҳатчиси ўринбосари Лиза Кёртисни шахсан қабул қилган.
Кёртис Америка Миллий хавфсизлик кенгашининг Жанубий ва Марказий Осиё бўйича катта директори ҳам бўлади.
Тошкентдаги учрашув Нью-Йоркдаги ҳужумдан саноқли кунлар ўтиб бўлиб ўтган.
Бу ҳужумда Ўзбекистон фуқароси Сайфулло Соипов "асосий гумондор" сифатида қўлга олинган.
Соиповга қарши аллақачон расман айбловлар ҳам илгари сурилган.
У "террорчилик" ва ИШИД гуруҳини "молиявий жиҳатдан қўллаб-қувватлашда" айбланган.
Сайфулло Соипов ҳужумдан кун ўтиб, 1 ноябрь куни бўлиб ўтган дастлабки маҳкама тингловида қилган ишидан "пушаймон эмаслиги"ни айтган.
Унинг ҳужум сатҳига яқин ерда қорнидан олган жароҳати сабаб касалхонада жарроҳлик амалиёти ўтказгани хабар берилган.
Маҳкама қаршисида ҳам ногиронлар аравачасида ҳозир бўлгани айтилган.
Америкалик шифокорлар унинг олган жароҳатларидан оёққа туриб кетишига ишонч билдиришган.
Сайфулло Соиповнинг ҳозирги аҳволи ва айнан қаерда сақланаётгани борасида расмий маълумотлар имконли эмас.
Президент Мирзиёев Нью-Йоркдаги ҳужумдан саноқли соатлар ўтиб, Америка томонига расман ҳамдардлик билдирган.
Ўз мактубида тергов ишларида "барча куч ва воситалар" билан кўмак беришга тайёр эканликларини маълум қилган.
АҚШ Президенти Дональд Трамп орада Соиповга ўлим жазоси берилиши кераклигини айтиб, твит ҳам қилган.
Лиза Кёртиснинг журналистларга баён қилишича, президент Мирзиёев билан "жуда самарали мулоқот ўтказган".
"Нью-Йоркдаги нохуш террористик хуруж муносабати билан Америка халқига ҳамдардлиги учун миннатдорчилик билдирган".
Учрашув чоғида "Ўзбекистон ва АҚШ ҳукумати халқаро терроризмга қарши кураш борасида якдил ҳаракат қилишда ҳамфикр эканлигига алоҳида эътибор қаратилган".
"Биз бундай таҳдидлар ва хуружларнинг олдини олиш, уларга қарши курашда биргаликда ҳаракат қилишимиз керак", - деб айтган Лиза Кёртис.
У бугун Самарқандда бошланган халқаро анжуманда иштирок этаётган АҚШ делегациясига бошчилик қилмоқда.
Мазкур анжуман "Марказий Осиё: ягона тарих ва умумий келажак, барқарор ривожланиш ва тараққиёт йўлидаги ҳамкорлик", деб номланади.
БМТ, Европа Иттифоқининг нуфузли мулозимлари ва қатор минтақа давлатларидан келган юзлаб иштирокчилар экстремизмга қарши кураш масаласини муҳокама этишади.
Бундан ташқари, минтақа иқтисодини янада тараққий топтириш масаласида сўз юритишади.
Расмий хабарда айтилишича, Лиза Кёртис Мирзиёев билан учрашуви чоғида АҚШ раҳбарияти Ўзбекистоннинг минтақавий хавфсизлик ва барқарорликни мустаҳкамлашда тутган ўрнини юксак қадрлашини таъкидлаган.
Америка Қўшма Штатлари Ўзбекистон билан узоқ истиқболга мўлжалланган муносабатларни янги босқичга кўтаришдан манфаатдор эканини қайд этган.
Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02
