Шерали Жўраев чорак асрдан сўнг "Истиқлол" саройига қайтмоқда

Халқ суйган ҳофиз Шерали Жўраев қарийб чорак асрлик танаффусдан сўнг "Истиқлол" санъат саройида концерт бермоқчи. 2018 йилнинг январ ойида уч кун давом этадиган концерт чипталари пайшанба кунидан бошлаб сотувга чиқади.

Концерт ташкилотчиси "Мўъжиза медиа" томонидан ижтимоий тармоқларда тарқалган концерт афишасида унинг 19 чидан 22 январгача тўрт кун давом этиши мумкинлиги айтилган.

"Ўзбегим" номли концерт дастури жонли ижрода бўлиши кўрсатилган.

"Мўъжиза медиа" ходимининг айтишича, концерт афишалари шаҳар кўчаларига 10 кундан сўнг чиқарилади.

"Концертга рухсат олдик. Чипталарни пайшанбадан сотувга чиқарамиз. Нархи 20 минг сўмдан 200 минг сўмгача бўлади. Ҳозирча эълонларни интернетда берганмиз. Тошкент шаҳри кўчаларига афишаларни 10 кундан сўнг илсак керак. Рекламаларни илиш учун рухсат олиш ишлари ҳали якунланмади", дейди ташкилот ходими.

Унинг айтишича, Шерали Жўраев "Истиқлол" (собиқ "Халқалар дўстлиги") санъат саройида сўнгги бор 24 йил олдин концерт берган.

Ҳофизга яқин манбанинг Би-би-сига айтишича, Шерали Жўраев ўша вақти "Халқалар дўстлиги" деб юритилган саройда концерт бериши тақиқланган бўлса-да, стадионларда анча вақт концерт бериб юрган.

Ўзбекистон халқ артисти Шерали Жўраев мустақилликнинг илк йилларида Президент Ислом Каримовга яқин санъаткорлардан бўлган. Жўраевнинг Президент Каримов билан Маккага боргани ҳали ҳам эсланади.

Бироқ 1994 йилдан бошлаб Шерали Жўраевнинг марказий телевидениеларда кўрсатишга оғзаки тақиқ қўйилди.

Ҳофизнинг овози ҳатто радиоларларда ҳам бир муддат чиқмай қолди.

Бироқ кейинчалик Шерали Жўраев қўшиқлари марказий ва маҳаллий радиоларда қўйила бошлади.

Ҳофизнинг марказий телевиденида чиқишига тақиқ қўйилган бўлса-да, у ижоддан тўхтаб қолмаган.

Ислом Каримов вафотидан сўнг Шерали Жўраев марказий телевидениеларда кўриниш бера бошлади.

У Тошкентда ўтказилган "Ўзбегим" фестивалида тўпланганлар олдига чиқиб бир неча қўшиқ куйлади.