Хатна аксар ҳолларда тиббий тайёрловдан ўтмаган кекса аёл тарафидан амалга оширилади

Лондон полицияси аёлларни хатна қилдиришга маъсул ҳар қандай кишини маҳкама қаршисига олиб келувчи маълумот учун 20 минг фунт стерлинг (қарийиб 40 минг америка доллари) миқдорида мукофот таклиф этган.

Ушбу кампания ёзги таътилларнинг бошланиши билан йўлга қўйиладиган. Британияда асосан Африкаликлар жамоаларидаги ёш қизлар айниқса мана шу таътиллар пайти хавф остида деб кўрилади.

Қизлар суннат қилинганда уларнинг жинсий аъзолари ичидаги ўсимтанинг учидан бир оз кесилади.

Ҳисоб -китобларга кўра, Британия бўйича 7 мингга қадар қизларга хатнанинг айни кўриниши хавф солади.

Кўринишидан ота-оналар қизларини хатна қилдириш учун узун ёзги таътилни танлашади. Шунда суннат қилдирилган қизлар мактабга қайтгунларигача тузалиб кетишлари мумкин бўлади.

Полициянинг ишонишича, қизлар хатна қилдириш учун нафақат хорижга жўнатиладилар,балки бу иш Британиянинг ўзида ҳам амалга оширилади.

2003 йил жорий этилган янги қонунда нафақат аёлларни суннат қилдиришни тақиқловчи 1985 йилги қонун такрорланади, балки болани хориж олиб бориб, ушбу ишни амалга оширувчи одамларга қарши жиноий иш очилиши ҳам назарда тутилади.

Янги қонунга биноан ҳали бирор кишига жиноий иш очилгани йўқ.

"Бу яширин равишда амалга оширилади,-дейди Полициянинг Болаларни таҳқирлашга қарши кураш бўлими раҳбари Аластайр Жефрей айни борадаги маълумотлар учун мукофот берилиши ҳақида эълон қиларкан,-шунинг учун ҳам бундай ишларни очиш жуда қийин".

"Бундай амал болани таҳқирлашдир. Унга қарши кураш ҳеч кимнинг маданиятига ҳужум қилиш эмас, бу- болаларни таҳқирлашнинг ўта шафқатсиз кўринишига қўл урувчиларга қарши ҳужумдир",-дейди у.

	Одатда 4 ёшдан 13 ёшгача бўлган қизлар хатна қилинади

Покизаликни сақлаш амали

Қизларни хатна қилдириш Британияда асосан Африкалик мусулмон жамоалари ичида кузатилади.

Ислом олимлари Қуръонда бу амалларни оқлаш учун асос йўқлигини айтишаркан, бир неча бор танқидий чиқишлар қилишганди.

Аммо, кўплаб оилалар қизларини суннат қилдиришни вояга етиш жараёнининг бир қисми ва қизларининг покизалигини таъминлашнинг ягона йўли сифатида кўришади.

Лондоннинг Сомалиликлар жамоаси ёшлари билан ишловчи аёллардан бири ушбу анъананинг жамоа ичида ниҳоятда чуқур илдиз отгани, у ҳатто ўзларини суннат қилдиришни истовчи қизларга дуч келганини айтган.

"Сиз жамоанинг бир қисми бўлишни хоҳлайсиз.Сиз турмушга чиқишни истайсиз ва ўзингизни "ифлос" деб кўришларини истамайсиз",-дейди Лейла Ҳусайн.

Аёлларни хатна қилишнинг турли кўринишлари мавжуд. Айрим ҳолларда аёлнинг ташқи жинсий аъзоси бутунлай олиб ташланади.

Хатна аксар ҳолатларда тиббий тайёрловдан ўтмаган кекса аёл тарафидан амалга оширилади.

Оғриқсизлантирувчи уколдан камдан-кам фойдаланилади ва амалиёт ўта оддий асбоблар- олмос ва ҳатто бир парча шиша воситасида ҳам амалга оширилади.

Натижада қизлар қисқа ва узоқ муддатли оқибатлардан азият чекишлари мумкин. Уларнинг соғлиғига инфексия тушиш хавфидан ташқари узоқ муддатли руҳий таъсир ва ҳатто пуштсизлик таҳдид қилиши мумкин.

Баъзан эса, бундан-да оғирроқ оқибатлар кузатилади.

90 фоиз аёллари суннат қилдирилувчи Миср ўтган ой 12 ёшли қизалоқ вафот этиши ортидан хатнага мутлақ тақиқ жорий этган.

Сиз бу ҳақда нима деб ўйлайсиз? Аёлларни хатна қилдириш амалларидан қанчалар хабардорсиз?

Фикрларингизни ўнг томондаги махсус формамиз орқали қолдиришингиз ва ё [email protected] га мактуб йўллашингиз мумкин.