You’re viewing a text-only version of this website that uses less data. View the main version of the website including all images and videos.
Қирғизистон: Умрадан қайтган яна 3 кишида коронавирус аниқланди - O'zbekiston, Qirg'iziston
- Author, Шоҳруҳ Соипов
- Role, Ўш, Қирғизистон
Ўш вилоятига қарашли Новқат туманида яшовчи уч кишида короновирус аниқланган.
Улар ҳам зиёратидан қайтган.
Бу ҳақда 20 март куни Қирғизистон соғлиқни сақлаш вазири Космосбек Чолпонбаев Бишкекдаги матбуот анжуманида маълум қилди.
Унинг сўзларига кўра, вирусга чалинганларда касаллик симптомсиз бўлган.
"Улар клиник белгиларга эга эмас, шунчаки лаборотория текширувлари ижобий натижани кўрсатди. Беморлар ҳозир ҳудудий касалхонанинг юқумли касалликлар бўлимида. Текширувлардан ўтиб, барча диагнози аниқланмоқда", - дейди вазир.
Қирғизистонда коронавирус билан боғлиқ илк уч ҳолат 18 март куни тасдиқланган.
Улар 12 март куни Шаржа-Бишкек йўналиши бўйича Умра зиёратидан келган, Жалолободнинг Сузоқ тумани яшовчилари экани айтилган.
Соғлиқни сақлаш вазири Космосбек Чолпонбаев коронавирусга чалинган уч нафар сузоқликликлар Ҳалқаро соғлиқ ташкилоти қоидасида кўрсатилган шароитда даволанаётганини қўшимча қилди.
"Улар касалхонада изоляция хонасида даволанишяпти. Касаллик тарқаб кетмаслиги учун вирусга, бактерияга қарши дорилай бошладик. Уларнинг тана ҳарорати кўтарилиб, тушяпти. Беморларнинг аҳволи қониарли", - дея баёнот берди вазир.
Вирусга чалинганлар билан Умра зиёратидан қайтган 142 одамнинг барчаси тиббий кузатувга олинган, шифохона ётқизилган.
Шу билан бирга хориждан келган 386 одам ҳам карантин остида.
Икки кун аввал коронавирус аниқланган Жалолободнинг Сузоқ туманининг Благовешенка, Ўрта Осиё ва Бўстон қишлоқларида фавқулотда ҳолат эълон қилинган эди.
Жума куни уч кишининг вирусга чалингани аниқланган Ўш вилоятининг Новқат туманида ҳам фавқулодда ҳолат жорий этилган.
Қирғизстон парламенти депутатлари коронавирус янада кенг тарқалишининг олдини олиш мақсадида републикада зудлик билан фавқулодда холат эълон қилиш кераклигини таклиф қилишмоқда.
