Путин расман ғолиб деб эълон қилинди

Россия Марказий Сайлов Комиссияси 18 мартда ўтган президент сайловларининг расмий натижаларини эълон қилган.

Унга мувофиқ, Путин 76,69 фоиз овоз билан ғалаба қозонган.

Путинга 56 миллион 430 минг 712 нафар сайловчилар овоз берган.

Бу унинг шахсий рекорди, бундан аввалги энг юқори кўрсаткични Путин 2004 йилдаги сайловларда 71,31 фоиз билан қўлга киритганди.

Янги президентлик муддати Путин учун тўртинчи муддатдир.

Учинчи ва тўртинчи муддатлар орасида Путин Россия бош вазири лавозимини эгаллаган.

Коммунистик партия номзоди Павел Грудинин сайловларда 11,77 фоиз овоз олиб, иккинчи ўринни эгаллаган.

Ашаддий миллатчи Владимир Жириновский эса 5,65 фоиз овоз билан учинчи.

Сайловларда "Фуқаролик ташаббуси" гуруҳидан номзод бўлган Ксения Собчак 1,68 фоиз овоз олган.

Мухолифатдан ягона номзод бўлмаган.

Коррупцияга қарши кураш жамғармаси раҳбари Алексей Навальный президентликка номзодини бир йил аввал илгари сурган, аммо тўланмаган қарздорлик боис сайлов комиссияси уни рўйхатга олмаган.

Россияда кейинги президент сайловлари 2024 йилда бўлиб ўтади.

Расман Путин унда номзод бўлолмайди, чунки Россия конституциясида кетма-кет икки мартадан ортиқ сайланиш мумкин эмас.

Унинг ўзи 2030 йилда ҳам сайловларда қатнашасизми, деган саволни "кулгили" деб атаган.

"Нима, мен 100 ёшгача бу ерда ўтирармидим? Йўқ" деб жавоб берган Путин.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek