Германия: Фелдшер ишини камайтириш учун 10 кишини ўлдиргандан сўнг умрбод қамоқ жазосига ҳукм қилинди
Сурат манбаси, Getty Images
- Author, Табби Уилсон
- Ўқилиш вақти: 2 дақ
Германияда 10 беморни ўлдириш ва яна 27 кишини ўлдиришга уринишда айбланиб, паллиатив тиббий ёрдам кўрсатувчи фелдшер умрбод қамоқ жазосига ҳукм қилинди.
Қораловчилар, исми ошкор қилинмаган фелдшер, тунги навбатдаги иш ҳажмини енгиллаштириш учун, асосан қария беморларга оғриқ қолдирувчи ёки тинчлантирувчи воситаларни инъекция қилган деб даъво қилишган.
Жиноятлар 2023 йил декабр ва 2024 йил май ойлари ўртасида Ғарбий Германиядаги Вюрзелен шаҳридаги шифохонада содир этилган.
Терговчилар унинг фаолияти давомида бошқа бир нечта шубҳали ҳолатларни кўриб чиқаётганлиги ҳақида хабар беришди.
Франс-Пресс (AFP) ахборот агентлигининг маълумотларига кўра, исми ошкор қилинмаган эркак 2007 йилда фелдшерлик бўйича ўқишни тугатгандан сўнг, 2020 йилдан бери Вюрзелен шифохонасида ишлаган.
Қороловчилар Аахен шаҳридаги маҳкамага айтишишларича, у "ғазаб" ва беморларга нисбатан ғамхўрлик ҳис-туйғусини кўрсатмаган ҳолда ўзини инсон тақдирини белгиловчи ролда тутганликда айбланган.
Маҳкамага айтилишича, у тунги навбатда бўлган пайти ишини енгиллаштириш учун беморларга катта миқдорда морфин ва мидазолам, яъни тинчлантирувчи дори воситаларни инъекция қилган.
У 2024 йилда ҳибсга олинган.
U tungi navbatda bo‘lgan payti ish yukini yengillashtirish uchun bemorlarga katta miqdorda morfin va midazolam, ya’ni tinchlantiruvchi dori vositalarni inyeksiya qilgan.
Умрбод қамоқ жазосини тайинлашда маҳкама, бу шахснинг жинояти "ўта оғир шаклда" содир этилганини таъкидлаб, унга 15 йил қамоқ жазосидан сўнг муддатидан олдин озодликка чиқиш ҳуқуқини бермади.
У маҳкама қароридан шикоят қилиши мумкин.
Қораловчилар AFPга қўшимча қурбонларни аниқлаш учун жасадлар эксгумация қилинаётганини айтишди, бу ўз навбатида ўша шахс яна маҳкамага тортилиши мумкинлигини белгилайди.
Ушбу жиноий иш, 2019 йилда Германиянинг шимолидаги иккита касалхонада 85 беморни ўлдиришда айбланиб, умрбод қамоқ жазосига ҳукм қилинган собиқ фельдшер Ниэлс Хегелнинг ишига ўхшайди.
Маҳкама 1999 ва 2005 йиллар орасида у ўз қарамоғида бўлганларга юрак дорисининг ўлимга олиб келувчи дозаларини берганлигини аниқлаган.
У Германиянинг яқин тарихидаги энг кўп қотиллик содир этган шахс ҳисобланади.
