یونان: مسافر اب بھی کشتی پر پھنسے ہوئے ہیں

اس اطالوی کشتی میں 120 افراد اب بھی شدید سردی میں امدادی کارروائیوں کا انتظار کر رہے ہیں جس میں یونانی جزیرے کورفو کے قریب آگ لگ گئی تھی۔

طوفانی ہواؤں کے باوجود ہیلی کاپٹر امدادی کارروائیاں جاری رکھے ہوئے ہیں اور لوگوں کو کشتی سے نکال رہے ہیں۔

یونانی حکام نے کہا ہے کہ اتوار کو کشی کے عرشے پر آگ لگ جانے کے بعد پیر کی صبح تک اس پر سوار کل 478 میں سے 356 افراد کو پہلے ہی نکالا جا چکا ہے۔

حکام کے مطابق ایک شخص، جس نے کشتی سے چھلانگ لگائی تھی، ہلاک ہو گیا ہے، جب کہ ایک اور زخمی ہے۔

نورمن اٹلانٹک نامی کشتی یونان میں پاترس سے اٹلی کے شہر انکونا جا رہی تھی۔ اطلاعات کے مطابق آگ عرشے پر لگی اور پھر دوسرے حصوں تک پھیل گئی۔

مسافروں نے کہا ہے کہ اس کے بعد افراتفری شروع ہو گئی۔ اس کے بعد انھیں عرشے پر یخ بستہ ہواؤں میں امدادی کارروائی کا انتظار کرنا پڑا۔

کشتی کے ایک خانسامے کی بیوی نے نامہ نگاروں کو بتایا کہ انھوں نے اپنے خاوند کو فون پر کہتے سنا، ’میں سانس نہیں لے سکتا۔ ہم سب چوہوں کی طرح جل مریں گے۔ خدایا ہمیں بچا۔‘

ایک اور مسافر نے یونانی ٹیلی وی چینل میگا کو بتایا: ’ہم باہر ہیں۔ ہمیں بہت سردی لگ رہی ہے، کشتی دھویں سے بھری ہوئی ہے، اور یہ اب بھی جل رہی ہے۔ فرش ابل رہا ہے، کیبنوں کے نیچے پانچ بجے سے آگ لگی ہوئی ہے۔ امدادی کشتیاں واپس چلی گئی ہیں اور ہم اب بھی یہیں ہیں۔ وہ ہمیں ساتھ نہیں لے جا سکیں۔‘

ہیلی کاپٹروں لوگوں کو کشتی سے نکال کر لا رہے ہیں۔ اکثر لوگوں کو نزدیکی بحری جہازوں اور کشتیوں پر منتقل کر دیا گیا ہے، تاہم بعض لوگوں کو براہِ راست ہسپتال پہنچایا گیا ہے تاکہ انھیں طبی امداد دی جا سکے۔ ان میں سے اکثر لوگ شدید ٹھنڈ کا شکار ہوئے ہیں۔

بحری جہازوں نے اس کشتی کے آس پاس گھیرا ڈال دیا تھا تاکہ اسے لہروں سے بچایا جا سکے اور امدادی کارروائیوں میں مدد دی جا سکے۔

حکام کے مطابق کشتی پر سوار اکثر افراد یونانی ہیں، البتہ بعض مسافر اٹلی، ترکی، البانیہ، جرمنی اور دوسرے ملکوں سے تعلق رکھتے ہیں۔

ابھی تک یہ معلوم نہیں ہو سکا کہ آگ کیسے لگی۔