حولہ قتلِ عام میں فوج اور ملیشیا کا ہاتھ: یو این

اقوامِ متحدہ کے تحقیق کاروں کا کہنا ہے کہ مئی میں شام کے شہر حولہ میں ایک سو آٹھ افراد کے قتل میں شام کی فوج اور ملیشیا دونوں کا ہاتھ تھا۔

دوسری جانب شام میں حکومت مخالف کارکنوں کا کہنا ہے کہ ملک کے دوسرے بڑے شہر حلب کے قریبی علاقے عزاز میں جنگی طیاروں کی بمباری سے تیس افراد ہلاک ہوگئے ہیں۔

کلِک حولہ قتل عام بین الاقوامی مداخلت کے لیے کیا گیا: شام

کلِک حولہ قتل عام: سلامتی کونسل کی شدید مذمت

پچیس اور چھبیس مئی کو حولہ میں ہونے والے قتلِ عام کو شام میں مارچ دو ہزار گیارہ سے لے کر اب تک عام شہریوں پر ہونے والا سب سے خوفناک حملہ کہا جا رہا ہے۔

اقوامِ متحدہ کی انسانی حقوق کی کونسل کی تشکیل کردہ انکوائری رپورٹ میں کہا گیا ہے کہ حکومتی فوج اور حزبِ مخالف کے گروہوں نے جنگی جرائم کیے ہیں۔ رپورٹ میں الزام لگایا گیا ہے کہ شام کی حکومت نے اعلیٰ سطح پر انسانی حقوق کی ان خلاف ورزیوں کی منظوری دی تھی۔

ایک سو دو صفحات پر مشتمل رپورٹ میں کہا گیا ہے کہ ان خلاف ورزیوں میں قتل، اذیت اور جنسی تشدد شامل ہے۔ رپورٹ میں حزبِ مخالف کی فورسز کو بھی جنگی جرائم کا ذمہ دار ٹھہرایا گیا ہے لیکن اتنا نہیں جتنا کہ حکومتی فورسز کو۔

عزاز پر فضائی حملہ

بمباری کے نتیجے میں دس مکانات مکمل طور پر تباہ ہوئے ہیں

شامی باغیوں کے مطابق بدھ کو عزاز پر ہونے والی بمباری میں وہ عمارت بھی نشانہ بنی ہے جہاں ان گیارہ لبنانیوں کو رکھا گیا تھا جنہیں باغیوں نے یرغمال بنایا ہوا ہے۔

ایک باغی کمانڈر نے لبنانی ٹی وی چینل سے بات کرتے ہوئے کہا کہ ’وہ لوگ جس عمارت میں تھے اسے بھی نشانہ بنایا گیا ہے‘۔ اطلاعات کے مطابق حملے کے بعد چار یرغمالی لاپتہ ہیں جبکہ بقیہ زخمی ہوئے ہیں۔

خبر رساں ادارے اے ایف پی کے لیے کام کرنے والے ایک مقامی صحافی کے مطابق بمباری کے نتیجے میں دس مکانات مکمل طور پر تباہ ہوئے ہیں اور لوگ چیختے چلاتے ملبے سے زخمیوں اور لاشوں کو نکالتے دکھائی دیے ہیں۔

ایک مقامی شخص نے اے ایف پی کو بتایا کہ ’تمام مکانات میں عورتیں اور بچے موجود تھے جو رمضان کی وجہ سے محوِ خواب تھے‘۔

عزاز نامی قصبہ حلب سے تیس میل دور ترک سرحد سے چند میل کے فاصلے پر واقع ہے اور باغیوں کے مطابق زخمیوں کو نزدیکی فیلڈ ہسپتال کے علاوہ سرحد پار ترک علاقے میں بھی لے جایا گیا ہے۔

یہ واضح نہیں کہ عزاز میں باغی افواج موجود ہیں یا نہیں تاہم ایسوسی ایٹڈ پریس کے مطابق باغیوں کے مراکز قصبے کے قریب ہی واقع ہیں۔

شام کے بحران پر غور کے لیے اسلامی ملکوں کی تنظیم او آئی سی کا اجلاس بدھ کوسعودی عرب کی میزبانی میں مکہ میں ہو رہا ہے۔ امکان ہے کہ اجلاس میں شام کی او آئی سی کی رکنیت معطل کرنے پر غور ہوگا تاہم ایران نے اس تجویز کی شدید مخالفت کی ہے۔

شام کی رکنیت معطل کرنے کی تجویز کی منظوری کے لیے ستاون رکنی تنظیم کے دو تہائی ارکان کی حمایت ضروری ہے۔

سعودی عرب نے کھل کر شام کے باغیوں کو ہتھیار فراہم کرنے کا مطالبہ کیا ہے جبکہ ایران کا الزام ہے کہ سعودی عرب، قطر اور ترکی شامی صدر بشار الاسد کے مخالفین کی مالی اور عسکری مدد کر رہے ہیں۔