شہزادی ڈیانا کی ساٹھویں سالگرہ کے موقعے پر شہزادہ ولیم اور ہیری کی جانب سے ان کے مجسمے کی رونمائی
،تصویر کا ذریعہDominic Lipinski
شہزادی ڈیانا کی ساٹھویں سالگرہ کے موقعے پر ان کے دونوں بیٹوں شہزادہ ولیم اور ہیری نے اپنی ماں کی مجسمے کی رونمائی کی ہے۔
اس موقع پر ان دونوں کا کہنا تھا کہ ’ہم ہر روز یہ تمنا کرتے ہیں کہ کاش وہ ہمارے ساتھ ہوتیں‘۔
دونوں بھائیوں کی جانب سے 2017 میں منظور کیا گیا یہ مسجمہ کینزینگٹن پیلس میں رکھا گیا ہے۔ ہیری، جو کہ اپنی بیگم ڈچس آف سسکس میگھن مرکل اور دو بچوں کے ساتھ اب مستقل طور پر امریکہ میں رہائش پزیر ہیں، اس مجسمے کی رونمائی کے لیے گزشتہ ہفتے برطانیہ پہنچے تھے تاکہ وہ تقریب سے پہلے قرنطینہ کا عرصہ پورا کرسکیں۔
رونمائی کے موقعے پر دونوں نے کہا کہ ’ہم ان کی محبت، ہمت اور کردار کو یاد کرتے ہیں۔ وہ خصوصیات جنھوں نے دنیا بھر میں ان گنت زندگیاں بدلیں۔‘
انھوں نے کہا کہ انھیں امید ہے کہ یہ مجسمہ ہمیشہ ان کی زندگی کی علامت کے طور پر دیکھا جائے گا۔
دونوں بھائیوں کو ہنستے مسکراتے اور تقریب میں موجود مہمانوں سے باتیں کرتے دیکھا گیا۔
شہزادہ ہیری اپنے بھائی کے ساتھ تعلقات میں تلخیوں کا ذکر کر چکے ہیں۔ رواں برس مارچ میں انھوں نے اوپرا ونفری کے انٹرویو میں کہا تھا کہ وہ دونوں ’مختلف راستوں پر ہیں‘۔
،تصویر کا ذریعہDominic Lipinski
یہ اپریل میں ان کے دادا ڈیوک آف ایڈنبرا پرنس فلپ کی وفات کے بعد پہلا موقع ہے جب دونوں بھائی کسی تقریب میں ساتھ نظر آئیں گے۔
End of سب سے زیادہ پڑھی جانے والی
شہزادہ ولیم اور ہیری کے رشتے کا مستقبل کیا ہوگا
ڈینیئیلا ریلف، شاہی نامہ نگار
2018 میں پرنس ہیری سے جب ان کے اپنے بھائی کے ساتھ تعلق کے بارے میں سوال کیا گیا تھا تو انھوں نے کہا تھا کہ 'ہم پوری زندگی کے لیے ایک دوسرے کے ساتھ پھنس کر رہ گئے ہیں‘۔
،تصویر کا ذریعہJohn Swannell/Camera Press
لیکن اس کے بعد بہت کچھ بدلا ہے۔ وہ ایک دوسرے کے ساتھ پھنسے ہوئے تو ہوسکتے ہیں لیکن دونوں بھائی بہت ہی مختلف سمت میں جا رہے ہیں۔
اس مجسمے کی رونمائی ایک ایسے وقت پر ہوئی ہے جب شاہی خاندان ایک مشکل وقت سے گزر رہا ہے۔ اس تقریب سے پہلے کہا گیا تھا کہ ولیم اور ہیری اس تقریب میں عوامی سطح پر یکجہتی کا مظاہرہ کریں گے لیکن دونوں کا قریبی تعلق ٹوٹ چکا ہے۔
ذرائع کا کہنا ہے کہ رابطوں کے فقدان کے علاوہ دونوں جانب سخت ناراضگی اور بھروسے کا فقدان بھی ہے۔
اگر ولیم اور ہیری کے انٹرویوز پر نظر ڈالی جائے تو یہ سوال ذہن میں آتا ہے کہ ’آخر بات یہاں تک پہنچی کیسے؟‘
،تصویر کا ذریعہPA Media
ہاں دونوں بھائیوں کے درمیان مقابلے کی فضا ہمیشہ سے رہی ہے اور نوک جھونک بھی چلتی رہے ہے، اس کے علاوہ دونوں ایک دوسرے سے بحث بھی کرتے رہے ہیں۔
لیکن اس سب کے باوجود دونوں میں ایک تعلق نظر ضرور آتا تھا۔
یہ بھی پڑھیے
دونوں کا غم ایک تھا، اور انھوں نے ایک دوسرے کے بارے میں جو بھی کہا اس میں محبت اور شفقت نظر آتی تھی۔ لیکن حالیہ برسوں میں دونوں کے درمیان وہ اٹوٹ رشتہ بکھرتا نظر آیا ہے۔
لیکن کیوں؟
یہ بہت پیچیدہ اور ذاتی مسئلہ ہے لیکن اس رشتے کو اس بات سے بھی زیادہ مدد نہیں ملی کہ یہ عوامی نظروں میں رہا۔ شہزادہ ہیری کی بیگم میگھن، عملے، عوامی زندگی، شاہی ذمہ داریاں اور مستقبل کی سمت کے حوالے سے تنازعات رہے ہیں۔
،تصویر کا ذریعہMartin Keene / PA Wire
اس سب سے دونوں بھائیوں میں ایک ایسی خلیج پیدا ہوگئی جو کم ہونے کا نام ہی نہیں لے رہی۔
مصنف رابرٹ لیسی نے اس رشتے کا تجزیہ کیا ہے اور اپنی کتاب ’بیٹل آف برادرز میں لکھا ہے کہ 'ہمارے برطانوی شاہی خاندان کا بلکل پرفیکٹ ہونا مقصود ہی نہیں ہے۔ تو اگر دونوں بھائیوں میں مسئلے ہیں تو اس کا مطلب یہ نہیں کہ شاہی خاندان کی اہمیت یا قدر ختم ہو جائے گی۔ لیکن اگر اس سارے تنازعے سے کسی قسم کی مفاہمت سامنے آتی ہے تو اس میں ہم سب کے لیے ایک سبق ہوگا‘۔
لیکن کسی بھی قسم کی مفاہمت مشکل ثابت ہو رہی ہے کیونکہ زخم بہت گہرے ہیں۔ مجھے بتایا گیا ہے کہ ان کا حل تلاش کرنے میں وقت لگے گا۔
لیکن دونوں اپنی والدہ کو تاریخ لحاظ سے دی جانے والی اہمیت اور ان کے مجسمے کے لیے انتخاب کی گئی جگہ کہ موضوع پر یکجا ہیں۔
دونوں نے نہ صرف اس منصوبے کی منظوری دی بلکہ اسے آگے بڑھانے میں بھی اہم کردار ادا کیا ہے۔
،تصویر کا ذریعہAdam Butler / PA Wire
ڈیانا ایوارڈ کے چیف ایگزیکیٹو ٹیسی اوجو کا کہنا تھا کہ اس مجسمے کی رونمائی بہت ہی جذباتی عمل ہوگا کیوں کہ ان دونوں بیٹوں کی اپنی ماں سے متعلق یادیں نظر آئیں گی جو کہ بہت معنی خیز ہوگا۔ وہ کہتی ہیں ’ہم ڈیانا کو ان کی آنکھوں سے دیکھ سکیں گے۔‘
یہ بھی پڑھیے
برطانوی روزنامہ دی سن کے شاہی فوٹوگرافر آرتھر ایڈورڈز 45 برس سے شاہی خاندان کی تصاویر اپنے کیمرے میں قید کرتے آئے ہیں۔
وہ سب کچھ دیکھ چکے ہیں، ڈیانا کو ملنے والی عوامی محبت اور ان کی وفات کے بعد ان کے بچوں کو ملنے والا پیار اور ہمدردی۔ ان کے لیے اس مجسمے کی رونمائی اداسی لے کر آتی ہے۔
'آپ اس کو اس نظر سے دیکھ سکتے ہیں کہ اگر اس عمل سے ان دونوں کے درمیان مسائل ختم نہیں ہوئے تو پھر کوئی بھی چیز اسے ختم نہیں کرپائے گی۔
،تصویر کا ذریعہKensington Palace
’یہ ان کی ماں ہے، وہ انسان جسے وہ دنیا میں سب سے زیادہ پیار کرتے ہیں اور اگر وہ اس لمحے کی اہمیت کو سمجھ کر ہاتھ نہیں ملائیں گے، یا پھر ایک دوسرے سے کچھ اچھا نہیں کہیں گے تو پھر آپ کیا کرسکتے ہیں؟ پھر انتظار نہ ہی کریں تو بہتر ہے۔‘
اپنی ماں کے مجسمے کے ساتھ ہیری اور ولیم کے کینزینگٹن پیلس گارڈن کے مناظر جذباتی اور یادگار ہوں گے۔ یہ وہ جگہ ہے جہاں دونوں نے اپنا بچپن گزارا تھا۔
،تصویر کا ذریعہReuters
شہزادی ڈیانا کا اثر آج بھی شاہی خاندان پر واضح ہے، اور یہ مجسمہ اس بات کی تائید کرے گا۔ یہ لندن میں شاہی زیارت کی ایک نئی جگہ ہوگی۔
ولیم اور ہیری کو جاننے والوں کو یہی امید ہوگی کہ اپنی ماں کے سائے تلے دونوں بھائی اپنے مسائل اور مایوسی کو دور کر کے اپنے رشتے پر مرہم لگانا شروع کریں گے۔
