ترکی: کرپٹو کرنسی کی دو تجارتی کمپنیاں بند، تحقیقات اور گرفتاریاں
،تصویر کا ذریعہEPA
ترک حکام کا کہنا ہے کہ کرپٹو کرنسی کے پلیٹ فارم وی بٹ کوائن سے جڑے چار افراد کو گرفتار کر لیا گیا ہے۔ ان افراد پر فراڈ اور دھوکہ دہی کے الزامات ہیں۔
اس کارروائی سے کچھ گھنٹے پہلے ہی وی بٹ کوائن نے اچانک ہی اعلان کیا تھا کہ وہ مالی مجبوریوں کی وجہ سے اپنے آپریشنز بند کر رہی ہے۔
حکام نے اس پلیٹ فارم کے اکاؤنٹس کو بند کر دیا ہے اور سرکاری طور پر اس کی تحقیقات کرنے کا اعلان کیا ہے۔
یاد رہے کہ اسی ہفتے ایک اور کریپٹو کرنسی پلیٹ فارم تھوڈیکس کے مالک فاروق فاطی عزیر کے بھی وارنٹ گرفتاری بھی جاری کیے گئے تھے۔
مہمت نادر یاجک جو جنو مغربی شہر موگلہ میں پراسیکیوٹر ہیں کا کہنا ہے کہ جن چار افراد وی بٹ کوائن کے سلسلے میں گرفتار کیا گیا ہے وہ اس پلیٹ فارم کے منتظم اور اہلکار تھے۔
گذشتہ کچھ چرصے میں ترک شہریوں میں کرپٹو کرنسی کے استعمال میں اضافہ ہوا ہے۔ صارفین کا مقصد اپنے اثاثوں کو لیرا کی گراوٹ سے محفوظ کرنا تھا کیونکہ مقامی کرنسی کی قدر میں تیزی کمی دکھائی دیتی ہے۔ تاہم ترکی میں کرپٹو کرنسی کی مارکیٹ کے حوالے سے ابھی کوئی قوانین موجود نہیں ہیں۔
گذشتہ ہفتے ترکی نے کہا تھا کہ وہ 30 اپریل سے سامان اور مختلف خدمات کی ادائیگی کے لیے کرپٹو کرنسی کے استعمال پر پابندی عائد کرے گا۔
کریپٹو کرنسی پیلٹ فارم تھوڈیکس کے سی ای او پر 2 ارب ڈالر لے کر فرار کا الزام
راوں ہفتے ایک اور ترک پلیٹ فارم تھوڈیکس کو بھی بند کیا گیا تھا جس میں تین لاکھ نوے ہزار صارفین نے سرمایہ کاری کر رکھی تھی۔ ترکی نے اسی پلیٹ فارم کے بانی کے لیے بین الاقوامی وارنٹ گرفتاری جاری کیا ہے۔
End of سب سے زیادہ پڑھی جانے والی
ترک سرکاری میڈیا کی رپورٹ کے مطابق فاروق فاتح عزیر تین لاکھ 91 ہزار سرمایہ کاروں سے مبینہ طور پر 2 ارب ڈالر لے کر البانیہ فرار ہو گئے ہیں۔
فاروق فاطی عزیر کی کمپنی ’تھوڈیکس‘ سے مبینہ تعلقات کے الزام میں پولیس نے ترکی کے آٹھ شہروں میں اپنے چھاپوں میں 62 افراد کو گرفتار بھی کیا ہے۔
فاطی عزیر نے اپنے خلاف ان الزامات کو ’بے بنیاد‘ قرار دیتے ہوئے کہا ہے کہ وہ اپنے کام کے سلسلے میں البانیہ میں موجود ہیں۔
جمعے کو وی بٹ کوائن نے اپنی ویب سائٹ پر اعلان کیا تھا کہ اس نے اپنی تمام ضابطے اور دعوے پورے کرنے کے لیے تمام سرگرمیاں بند کر دی ہیں۔
ابھی فوری طور پر یہ معلوم نہیں ہو سکا کہ اس سے کتنے لوگ متاثر ہوئے ہیں۔
بیان میں کہا گیا ہے کہ کرپٹو منی انڈسٹری میں ‘حالیہ پیش رفت کی وجہ سے ہمارے آپریشنز میں توقع سے بہت زیادہ توسیع ہوئی ہے۔ ہم معذرت کے ساتھ سے بتانا چاہیں گے کہ یہ صورتحال ہمیں ایک بہت مشکل عمل میں لے گئی ہے۔ ‘
یہ بھی پڑھیے
اطلاعات کے مطابق ترکی کے وزیر داخلہ نے البانیہ میں اپنے ہم منصب سے فون پر بات کی ہے جبکہ ترکی وزارت انصاف نے البانیہ کے دارالحکومت تیرانا سے فاروق فاطی عزیر کی گرفتاری اور حوالگی کے لیے قانونی کارروائی بھی شروع کر دی ہے۔
انقرہ کی درخواست کے بعد انٹرپول نے فاطی عزیر کے لیے ریڈ نوٹس جاری کیا ہے۔
،تصویر کا ذریعہGetty Images
تھوڈیکس کے ساتھ کیا ہوا؟
بدھ کے روز حالات اس وقت خراب ہونے لگے جب تھوڈیکس نے ایک پُر اسرار پیغام پوسٹ کیا کہ ایک غیر متعین بیرونی سرمایہ کاری کو سنبھالنے کے لیے پانچ دن درکار ہیں۔ اس کے بعد اس نے تجارت کو معطل کر دیا۔
سرمایہ کاروں نے حکام سے رابطے شروع کر دیے اور گذشتہ ہفتے کے مقابلے تھوڈیکس کے خلاف شکایات کی شرح 1160 فیصد بڑھ گئی۔
جمعرات کے روز ترک سکیورٹی عہدیداروں نے استنبول کے ایئرپورٹ پر فاطی عزیر، جن کی عمر 27 سال بتائی جاتی ہے، کی ایک تصویر جاری کی، جس کے مطابق وہ کسی نامعلوم مقام کا سفر کر رہے تھے۔
بعد میں سکیورٹی ذرائع نے تصدیق کی کہ وہ منگل کے روز سے البانیہ میں ہیں۔
اسی دن تھوڈیکس کے ٹوئٹر اکاؤنٹ پر ایک پیغام میں عزیر فاطی نے ان الزامات کی تردید کی۔
انھوں نے اپنے پیغام میں کہا کہ وہ بیرون ملک غیر ملکی سرمایہ کاروں کے ساتھ ملاقاتوں کے لیے آئے ہیں اور ’چند دن‘ میں وہ ترکی واپس لوٹ جائیں گے اور عدالتی حکام سے تعاون کریں گے تاکہ سچ سامنے آ سکے۔
جمعے کے روز مقامی وقت کے چھ بجے پولیس نے استنبول سمیت آٹھ مختلف شہروں میں چھاپے مارے اور کمپنی کے ہیڈکوارٹر کی تلاشی لیتے ہوئے کمپیوٹر اور ڈیجیٹل مواد کو قبضے میں لے لیا۔
پولیس کے پاس مجموعی طور پر 78 مشتبہ افراد کی گرفتاری کے وارنٹ موجود ہیں جبکہ اب تک 62 افراد کو حراست میں لیا گیا ہے۔
حکام نے فاطی عزیر کے بنک اکاؤنٹس کو بھی منجمند کر دیا ہے۔
