ٹسے چی لوپ: ایشیا میں منشیات کے 70 ارب ڈالر کے کاروبار پر حاوی شخص گرفتار
،تصویر کا ذریعہGetty Images
یورپی ملک نیدرلینڈز میں پولیس نے دنیا بھر میں منشیات کا کاروبار کرنے والے سب سے بڑے گروہوں میں سے ایک کے سرغنہ کو حراست میں لے لیا ہے جس کی گرفتاری کے وارنٹ آسٹریلوی حکومت نے جاری کیے تھے۔
چینی نژاد کینیڈین شہری ٹسے چی لوپ کے بارے میں کہا جاتا ہے کہ وہ ’دی کمپنی‘ نامی گروہ کے سرغنہ ہیں جو ایشیا بھر میں غیر قانونی منشیات کے 70 ارب ڈالر کاروبار پر حاوی ہیں۔
ٹسے چی لوپ کا نام انتہائی مطلوب افراد کی فہرست میں شامل ہے اور ان کو ایمسٹرڈیم کے ہوائی اڈے سے حراست میں لیا گیا۔
اب توقع ہے کہ آسٹریلیا ان کی نیدرلینڈ سے ملک بدری کی درخواست کرے گا تاکہ آسٹریلیا میں ان کے خلاف مقدمہ چلایا جا سکے۔
مزید پڑھیے
End of سب سے زیادہ پڑھی جانے والی
آسٹریلیا کی سرکاری پولیس کا خیال ہے کہ ’دی کمپنی‘، جو کہ ’سام گور سینڈیکیٹ‘ کے نام سے بھی جانی جاتی ہے، ملک میں آنے والی منشیات میں سے 70 فیصد کی ذمہ دار ہے۔
ٹسے چی لوپ کا ان کے وسیع نیٹ ورک کے باعث معروف میکسیکن ڈرگ لارڈ ’ایل چاپو‘ سے موازنہ کیا جاتا ہے۔
خبروں کے مطابق آسٹریلوی پولیس 56 سالہ ٹسے چی لوپ کا ایک دہائی سے تعاقب کر رہی تھی اور انھیں جمعے کو اس وقت حراست میں لے لیا گیا جب وہ کینیڈا جانے والی پرواز پر چڑھنے والے تھے۔
پولیس کی جانب سے جاری کیے گئے بیان میں ان کا نام نہیں لیا گیا البتہ کہا گیا کہ ملزم کی حراست کے لیے وارنٹس 2019 میں جاری کیے گئے تھے اور نیدرلینڈز میں حکام نے عالمی پولیس انٹرپول کے نوٹس پر یہ کارروائی کی۔
،تصویر کا ذریعہGetty Images
ولندیزی پولیس کے ترجمان نے ٹسے چی لوپ کی گرفتاری کے بعد کہا کہ ان کا نام پہلے سے ہی مطلوبہ افراد کی فہرست میں شامل تھا اور ملنے والی معلومات کے بعد ان کو حراست میں لیا گیا ہے۔
خبر رساں ادارے روئٹرز نے دو سال قبل ٹسے چی لوپ کے بارے میں ایک تحقیقی رپورٹ شائع کی تھی جس میں انھیں 'ایشیا کا سب سے مطلوبہ شخص' قرار دیا گیا تھا۔
روئٹرز نے اقوامِ متحدہ کے حوالے سے بتایا تھا کہ صرف میتھ کی فروخت سے ہی اس سنڈیکیٹ کا منافع سنہ 2018 میں 17 ارب ڈالر تک ہو سکتا ہے۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
ٹسے چی لوپ کو گرفتار کرنے کے لیے ایشیا کی 20 کے قریب سرکاری ایجنسیوں نے آپریشن کیا۔
خبروں کے مطابق حالیہ برسوں میں ٹسے چی لوپ مکاؤ، ہانگ کانگ اور تائیوان منتقل ہوئے۔ ماضی میں انھوں نے امریکہ کی جیل میں منشیات کی ترسیل کے معاملے میں نو سال جیل میں گزارے ہیں۔
آسٹریلوی میڈیا نے ان کی گرفتاری کو ملک کی پولیس کے لیے دو دہائیوں میں ’سب سے اہم گرفتاری‘ قرار دیا۔
