صدر ٹرمپ: امریکی انتخاب 2020 ملتوی کر دیں، ’فراڈ‘ کا خدشہ ہے

صدر ٹرمپ نے کہا ہے کہ نومبر میں ہونے والے صدارتی انتخابات کو ملتوی کیا جائے۔ انھوں نے کہا کہ ڈاک کے ذریعے زیادہ ووٹنگ کی وجہ سے فراڈ اور غلط نتائج آ سکتے ہیں۔

انھوں نے مشورہ دیا کہ اس وقت تک انتخابات ملتوی رہیں جب تک لوگ ’مناسب اور محفوظ‘ طریقے ووٹ نہیں ڈال سکتے۔

صدر ٹرمپ کے دعوے کی سچائی ثابت کرنے کے لیے کوئی ثبوت نہیں ہے لیکن وہ کافی عرصے سے ڈاک کے ذریعے ووٹنگ کے خلاف بات کرتے رہے ہیں۔ ان کا کہنا ہے کہ اس سے دھاندلی ہو سکتی ہے۔

امریکی ریاستیں چاہتی ہیں کہ کورونا وائرس کی وبا سے ہونے والی صحت کے متعلق تشویش کی وجہ سے ڈاک کے ذریعے ووٹنگ آسان ہوگی۔

اپنی ایک ٹویٹ میں صدر ٹرمپ نے لکھا: ’یونیورسل میل اِن ووٹنگ 2020 نومبر کے ووٹ کو تاریخ کا سب سے زیادہ غلط اور دھوکے والا الیکشن بنا دے گی اور یہ امریکہ کے لیے ایک بڑی شرمندگی ہو گی۔‘

انھوں نے کہا کہ ’ڈیموکریٹس ووٹنگ میں غیر ملکی اثر و رسوخ کی بات کرتے ہیں، لیکن وہ جانتے ہیں کہ ’میل۔ان‘ ووٹنگ غیر ممالک کے لیے ریس میں داخلے کا آسان طریقہ ہے۔‘

انھوں نے کہا کہ ڈاک کے ذریعے ووٹنگ ان علاقوں کے لیے پہلے ہی تباہ کن آفت ثابت ہو رہی ہے جہاں اس کا تجربہ کیا گیا ہے۔

اس ماہ کے آغاز میں چھ امریکی ریاستیں نومبر میں ہونے والے انتخابات ڈاک کے ذریعے کرانے کا منصوبہ بنا رہی تھیں۔

یہ ریاستیں اپنے تمام ووٹرز کو ڈاک کے ذریعے بیلٹ پیپر بھیجیں گی، جو یا تو ڈاک کے ذریعے واپس آئے گا یا پھر الیکشن کے دن مجوزہ مقامات پر واپس کر دیا جائے گا۔ اگرچہ کچھ ’ان پرسن‘ یا بذاتِ خود ووٹنگ کی سہولت بھی موجود ہے لیکن وہ محدود حالات میں ہی ہے۔

امریکہ کی تقریباً آدھی ریاستیں ووٹروں کو ڈاک کے ذریعے درخواست پر ووٹ ڈالنے کی اجازت دیتی ہیں۔

جون میں نیو یارک نے ڈیموکریٹک پارٹی کے صدر کے امیدوار کے پرائمری پول میں ڈاک کے ذریعے ووٹ ڈالنے کی اجازت دی تھی۔ لیکن بیلٹ پیپر کی گنتی میں بہت زیادہ تاخیر ہوئی تھی اور نتائج ابھی معلوم نہیں ہیں۔

امریکی میڈیا کی رپورٹس کے مطابق ایسی بھی تشویش پائی جاتی ہے کہ بہت سے پیلٹ کی گنتی بھی نہیں ہو گی کیونکہ وہ صحیح طریقے سے بھرے ہی نہیں گئے یا ان پر وہ نشان نہیں ہو گا جن سے پتہ چلے کہ یہ ووٹنگ کے سرکاری طور پر بند ہونے سے پہلے بھیجے گئے تھے۔

صدر ٹرمپ کی تجویز پر ردِ عمل ظاہر کرتے ہوئے نیو میکسیکو کے ڈیموکریٹک سینیٹر ٹام اڈل نے کہا کہ ٹرمپ کسی بھی طرح الیکشن میں تاخیر نہیں کرا سکتے۔

انھوں نے کہا کہ یہ حقیقت ہی بہت جمہوری عمل پر ایک بہت سنگین اور سفاک حملہ ہے کہ وہ ایسا تجویز کر رہے ہیں۔ انھوں نے کہا کہ کانگریس کے سبھی اراکین، اور انتظامیہ کو اس کے متعلق کھل کے بات کرنی چاہیئے۔