پاکستانی ون ڈے ٹیم کا اعلان: افتخار، عابد، رضوان اِن، حفیظ، حسن آؤٹ
،تصویر کا ذریعہGetty Images
پاکستانی ٹیم کے چیف سیلیکٹر اور ہیڈ کوچ مصباح الحق نے سری لنکا کے خلاف تین میچوں کی ون ڈے سیریز کے لیے 16 رکنی ٹیم کا اعلان کردیا ہے۔
ورلڈ کپ کھیلنے والی ٹیم میں شامل محمد حفیظ اور حسن علی ٹیم میں جگہ بنانے میں کامیاب نہیں ہوسکے جبکہ عابد علی، افتخار احمد، عثمان شنواری، محمد نواز اور محمد رضوان کی ٹیم میں واپسی ہوئی ہے۔
یہ پہلی مرتبہ ہے کہ مصباح الحق نے بطور چیف سلیکٹر قومی کرکٹ ٹیم کا انتخاب کیا ہے۔
مزید پڑھیں
سنیچر کے روز لاہور میں ایک پریس کانفرنس میں مصباح الحق نے وضاحت کی کہ حسن علی کو کمر کی تکلیف کے باعث ٹیم میں شامل نہیں کیا گیا۔
End of سب سے زیادہ پڑھی جانے والی
،تصویر کا ذریعہGetty Images
خیال رہے کہ پاکستان کرکٹ بورڈ نے اس سال محمد حفیظ کو سینٹرل کنٹریکٹ نہیں دیا تھا۔ بعد ازاں انھیں قومی ٹیم کے کیمپ میں بھی شامل نہیں کیا گیا تھا جس سے ان کے مستقبل پر سوالیہ نشان لگ گیا ہے۔
تاہم مصباح الحق کا کہنا تھا کہ اس سیریز میں ایسے کھلاڑیوں کو موقع دیا جا رہا ہے جنھیں اس سے پہلے تسلسل کے ساتھ مواقع نہیں مل سکے۔ انھوں نے کہا کہ ’کسی کے لیے دروازہ بند نہیں کیا، دروازہ اب بھی کھلا ہے۔‘
عابد علی جنھیں ورلڈ کپ کی ٹیم میں شامل کرنے کے بعد حیران کن طور پر ڈراپ کردیا گیا تھا، ٹیم میں دوبارہ جگہ بنانے میں کامیاب ہوگئے ہیں۔
افتخار احمد کی شمولیت سے متعلق ایک سوال کا جواب دیتے ہوئے مصباح کا کہنا تھا کہ افتخار احمد کی ڈومیسٹک کرکٹ میں اچھی کارکاردگی اور آف سپن بولنگ ان کی ٹیم میں شمولیت کی وجہ بنی۔
انھوں نے کہا کہ ’اس سے قبل افتخار کی ٹیم میں جگہ اس لیے نہیں بن پاتی تھی کیونکہ ان کے رول میں ہمارے پاس محمد حفیظ اور شعیب ملک جیسے کھلاڑی موجود تھے۔‘
،تصویر کا ذریعہGetty Images
افتخار احمد نے اب تک ایک ٹیسٹ ایک ٹی ٹوئنٹی اوردو ون ڈے انٹرنیشنل میچوں میں پاکستان کی نمائندگی کی ہے تاہم وہ آخری بار ون ڈے انٹرنیشنل چار سال پہلے 2015 میں انگلینڈ کے خلاف شارجہ میں کھیلے تھے۔
ورلڈ کپ میں خاطر خواہ کارکردگی نہ دکھانے والے فخر زمان کو بھی ٹیم میں برقرار رکھنے کا فیصلہ کیا گیا ہے۔ مصباح کہتے ہیں کہ کسی کو دس میچوں کی فارم کی بنیاد پر نظر انداز نہیں کیا جا سکتا۔ انھوں نے کہا ’اس وقت ان (فخر زمان) کی فارم کافی اچھی ہے۔‘
پاکستانی ون ڈے ٹیم ان 16 کھلاڑیوں پر مشتمل ہے: سرفراز احمد ( کپتان ) امام الحق، عابدعلی، فخر زمان، بابراعظم، حارث سہیل، افتخار احمد، آصف علی، عماد وسیم، شاداب خان، محمد رضوان، محمد نواز، وہاب ریاض، محمد عامر، عثمان شنواری اور محمد حسنین۔
پاکستان اور سری لنکا کے درمیان تینوں ون ڈے انٹرنیشنل کراچی میں 27 ستمبر، 29 ستمبر اور دو اکتوبر کو کھیلے جائیں گے جس کے بعد ٹی ٹوئنٹی سیریز کے میچز لاہور میں پانچ سات اور نو اکتوبر کو ہونگے۔
ٹی ٹوئنٹی سیریز کے لیے پاکستانی ٹیم کا اعلان ون ڈے سیریز کے دوران کیا جائے گا۔
