آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
شام کے شہر حلب میں باغیوں کے خلاف فضائی کارروائی کا دوبارہ آغاز
شام میں انسانی حقوق کے کارکنوں کا کہنا ہے کہ شامی حکومت کے طیاروں نے تین ہفتوں میں پہلی بار حلب میں باغیوں کے زیرِ قبضہ مشرقی علاقوں میں بمباری کی ہے۔
برطانیہ میں قائم انسانی حقوق کی تنظیم سیرئین آبزرویٹری کے مطابق اس بمباری میں کم سے کم پانچ افراد ہلاک ہوئے ہیں۔
واضح رہے کہ شامی حکومت اور اس کے اتحادی روس نے رواں برس اکتوبر کے اوائل میں حلب میں عام شہریوں اور باغیوں کو حلب چھوڑنے کی اجازت دینے کے لیے فضائی حملوں کو روک دیا تھا۔
ادھر روس نے حلب میں فضائی حملے دوبارہ شروع کرنے کی تردید کی ہے تاہم اس کا کہنا ہے کہ اس نے شام کے دیگر علاقوں میں سر گرم جہادی گروپوں کے خلاف میزائل حملوں کا آغاز کیا ہے۔
شام میں موجود روسی بحری بیٹرے سے ایس یو 33 نامی لڑاکا طیاروں نے بحیرۂ روم کے مشرق سے پہلی بار فضائی کارروائی کا آغاز کیا ہے۔
End of سب سے زیادہ پڑھی جانے والی
روس کے ذرائع ابلاغ پر دکھائی جانے والی فوٹیج میں ان طیاروں کو بمبوں کی بجائے فضا سے فضا مار کرنے والوں میزائلوں سے لیس دکھایا گیا ہے۔
شامی افواج نے دو ہفتوں کے محاصرے کے بعد رواں برس 22 ستمبر کو حلب کے مشرق میں باغیوں کے زیرِ قبضہ علاقوں پر ایک بڑی کارروائی کا آغاز کیا تھا۔
اس کارروائی کے بعد شامی افواج نے ایران کے حمایت یافتہ شیعہ ملیشیا اور روس کے فضائی حملوں کی مدد سے باغیوں کو کئی مقامات سے دور دراز علاقوں میں دھکیل دیا تھا۔
شامی حکومت کے باغیوں نے اکتوبر کے آخر میں حکومتی محاصرے کو توڑنے کی کوشش میں جوائی حملہ کیا تھا تاہم ابتدائی کامیابی کے بعد ان کی پیش قدمی سست ہو گئی تھی۔
روس کے وزیرِ دفاع نے صدر ولایمر پوتن کو منگل کو دی جانے والی بریفنگ میں خود کو دولتِ اسلامیہ کہلانے والی شدت پسند تنظیم اور فتح الشام، جس نے بعد میں اپنا نام تبدیل کرکے النصرا اتحاد رکھ لیا تھا کے خلاف حلب میں کیے جانے والے 'بڑے آپریشن' کا ذکر نہیں کیا۔
اقوامِ متحدہ کا کہنا ہے کہ کئی ہفتوں کی فضائی بمباری اور شیلنگ کی وجہ سے حلب کے مشرق میں 700 سے زائد عام شہری ہلاک ہو گئے تھے جب کہ راکٹ حملوں کی وجہ سے حکومت کے زیرِ قبضہ علاقوں میں بھی سینکڑوں افراد ہلاک ہوئے تھے۔
خیال رہے کہ شام میں پانچ برس سے جاری لڑائی میں اب تک 250,000 سے زیادہ افراد ہلاک اور تقریباً ایک کروڑ 20 لاکھ نقل مکانی پر مجبور ہو چکے ہیں۔
