عبدالرشید شکور بی بی سی اردو ڈاٹ کام کولمبو

	سنگاکارا پاکستان کے خلاف ڈبل سنچری بھی بنا چکے ہیں

جب سنگاکارا سے پاکستان کے خلاف بنائی گئی تین سنچریوں میں سے کسی ایک اچھی اننگز کا چناؤ کرنے کے لیئے کہا گیا تو ان کا جواب تھا بے شک185 رنز کی یہ اننگز بھی بڑی اہم ہے لیکن کراچی ٹیسٹ کی سنچری اس لیئے انہیں اچھی لگتی ہے کہ وہ انہوں نے مشکل صورتحال میں کھیلی تھی۔ سری لنکن ٹیم کو دوسو رنز کے خسارے کا سامنا تھا گوکہ وہ ٹیسٹ پاکستان جیت گیا تھا لیکن کڑے وقت میں انہوں نے سنچری بنائی تھی جو انہیں یاد ہے۔

کمار سنگاکارا پاکستان کے خلاف ڈبل سنچری بھی بناچکے ہیں۔ اپنی دوسری ڈبل سنچری پندرہ رنز کی کمی سے مکمل نہ کرنے کا انہیں افسوس ہے۔

185کی اننگز کے بارے میں وہ کہتے ہیں کہ دوسری اننگز میں وکٹ بیٹنگ کے لیئے آسان ہوگئی تھی وہ کپتان جے وردھنے کے82 رنز کو اپنی سنچری سے بھی قیمتی قراردیتے ہوئے کہتے ہیں کہ جے وردھنے کی سنچری ہونی چاہئے تھی۔ جے وردھنے اور64 رنز بنانے والے سماراویرا نے ان کا عمدگی سے ساتھ دیا اور انہیں پریشر سے دور رکھا۔

ٹیسٹ میں چار ہزار اور ون ڈے میں تقریبًا پانچ ہزار رنزبنانے والے سنگاکارا نے گروسنہا کے بعد خود کو قابل اعتماد ون ڈاؤن بیٹسمین ثابت کردکھایا ہے۔

سنگاکارا کا کہنا ہے کہ پاکستانی ٹیم کا کولمبو ٹیسٹ جیتنا بہت بڑی بات ہوگی کیونکہ اتنے بڑے ہدف کے تعاقب میں کسی بھی ٹیم کی وکٹیں گرتی رہتی ہیں اور پریشر اس پر رہتا ہے۔ اسوقت میچ سری لنکا کی گرفت میں ہے اور وہ جیت کے لیئے مرلی دھرن کی طرف دیکھ رہے ہیں لیکن تیز بولرز مالنگا اور فرویز ماہروف کو بھی نظرانداز نہیں کیا جاسکتا۔

ان کے خیال میں ماہروف اور اپل تھارنگا سری لنکن کرکٹ کا مستقبل ہیں ان میں بڑا کرکٹر بننے کی صلاحیت موجود ہے۔