محمد کیف 93 رن پر ناٹ آؤٹ رہے

بھارت کے پارٹ ٹائم سپنر وریندر سہواگ نے نیوزی لینڈ کی تین وکٹیں حاصل کی ہیں جبکہ ایک وکٹ ہربھجن سنگھ نے حاصل کی ہے۔

نیوزی لینڈ کی پہلی وکٹ 121 کے سکور پر گری جب وریندر سہواگ نے کپتان سٹیفن فلیمنگ کو اکسٹھ کے سکور پر آؤٹ کر دیا۔وریندر سہواگ نے اسی اوور میں نئے آنے والے بیٹسمین مارشل کو بھی آؤٹ کر دیا۔وریندر سہواگ نے تیسری وکٹ سٹائرس کو آؤٹ کر کے حاصل کی ہے۔

اوپنر نیتن ایسٹل ستر رنز بنا چکے ہیں اور ابھی آؤٹ نہیں ہوئے ہے۔ کپتان سٹیفن فلیمنگ 61 کے سکور پر آؤٹ ہوئے۔

بھارت کی جانب سے محمد کیف نے سب سے زیادہ سکور کیا۔ وہ ترانوے رن بنا کر ناٹ آؤٹ رہے۔ بھارت کے آؤٹ ہونے والے آخری کھلاڑی اشیش نہرا تھے جو بغیر کوئی رن بنائےملز کا دوسرا شکار بنے۔

نیوزی لینڈ کی جانب سے اورم نے چار، ویٹوری اور ملز نے دو، دو جبکہ شین بونڈ اور سٹائرس نے ایک، ایک وکٹ حاصل کی۔

بھارت کی ٹیم نے ٹاس جیت کر پہلے کھیلنے کا فیصلہ کیا اور سارو گنگولی اور وریندر سہواگ نے پہلی وکٹ کی شراکت میں بہّتر رن بنائے۔ سارو گنگولی اکتیس رن بنا کر جیکب اورم کی گیند پر ہمیش مارشل کے ہاتھوں کیچ آؤٹ ہوئے۔

وریندر سہواگ نے نصف سنچری سکور کی اور وہ تریسٹھ گیندوں پر پچھہتر رن بنا کر آؤٹ ہوئے۔ اس وقت بھارت کا سکور 155 تھا۔ اسی سکور پر راہول ڈراوڈ بنا کوئی رن بنائے ویٹوری کی گیند پر ایل بی ڈبلیو ہوگئے۔

بھارت کے آؤٹ ہونے والے چوتھے کھلاڑی یوراج سنگھ تھے جو بیس رن بنا کر ملز کی گیند پر آوٹ ہوئے۔ اس وقت بھارتی ٹیم کا سکور 185 رن تھا۔ بھارت کی پانچویں وکٹ 203 کے سکور پر گری جب ونوگوپال راؤ 8 رن بنا کر آؤٹ ہوئے۔ دھونی نےگیارہ رن بنائے انہیں سٹائرس نے آؤٹ کیا۔ اجیت اگرکار 6 جبکہ عرفان پٹھان 10 رن بنا کر آؤٹ ہوئے۔

بھارت: سارو گنگولی، سہواگ، محمد کیف، راہول ڈراوڈ، یوراج سنگھ، مہندر دھونی، جے پی یادو، اگرکار، ونو گوپال راؤ، اشیش نہرا، ہربھجن سنگھ

نیوزی لینڈ: لوئی ونسنٹ، سٹیفن فلیمنگ، ناتھن آسٹل، میکملن، ہمیش مارشل، سکاٹ سٹائرس، جیکب اورم، میکلم، ویٹوری، ملز، شین بونڈ، کرس کینز