صلاح الدین بی بی سی اردوڈاٹ کام، دِلیّ

کمبلے بھارت کے سب سے زیادہ وِکٹیں لینے والے کھلاڑی بن گئے

دو ٹیسٹ میچوں کی سیریز میں ہندوستان کو ایک صفر سے سبقت حاصل ہوگئی ہے۔ بائیں بازو کے گیند باز عرفان پٹھان نے بہترین گیند بازی کا مظاہرہ کرتے ہوئے گيارہ وکٹیں حاصل کیں۔ انہیں مین آف دی میچ کا اعزاز ملا۔

ٹیسٹ کرکٹ کا درجہ حاصل کرنے کے بعد بنگلہ دیش کی ٹیم کا یہ تینتیسواں میچ تھا۔ اور ڈھاکہ کے اس ٹیسٹ میں اسکی یہ تیسویں شکست ہے۔ وہ انیس بار ایک اننگز سے ہار چکے ہیں۔

پہلی اننگز میں بنگلہ دیش کی ٹیم 184 رنز بنا کر آوٹ ہوگئی تھی۔ جواب میں ہندوستان نے 526 رنز اسکور کیے لیکن دوسری باری میں بنگلہ دیش کی ٹیم صرف 202 رن ہی بنا سکی۔

بائيں بازو کے ہندوستانی گيند باز عرفان پٹھان نے اپنے کیریئر کی بہترین گیند بازی کرتے ہے ہوئے میچ میں گيارہ وکٹیں لیں۔ انہوں نے پہلی اننگز میں پانچ اور اور دوسری میں چھ کھلاڑیوں کو آؤٹ کیا۔

عرفان پٹھان دس وکٹیں لینے والے ہندوستان کے سب سے کم عمر کے کھلاڑی بن گۓ ہیں۔

ڈھاکہ میں کھیلا گیا یہ ٹیسٹ میچ ہندوستانی کھلاڑیوں کی طرف سے بنائے گئے ریکارڈوں کی وجہ سے یاد کیا جائے گا۔

اسی میچ میں سچن تندولکر نے اپنے کیریئر کی 34 ویں سنچری بنائی اور سنیل گواسکر کے ٹیسٹ میچوں میں سب سے زیادہ سینچری بنانے کے ریکارڈ کو برابر کیا۔

سچن کی یہ چوتھی ڈبل سینچری تھی جس میں انہوں نے 248 رنز اسکور کیۓ۔ تندولکر ٹیسٹ کھیلنے والی تمام ٹیموں کے خلاف سینچری بنانے والے دنیا کے تیسرے کھلاڑی ہیں۔ اس سے قبل یہ کارنامہ جنوبی افریقہ کے گيری کرسٹن اور آسٹریلیا کے اسٹیو وا انجام دے چکے ہیں۔

اسپنر انیل کمبلے نے بھی اس میچ میں ایک نیا کارنامہ انجام دیا ہے۔ کمبلے 435 ٹیسٹ وکٹیں حاصل کرنے والے پہلے ہندوستانی کھلاڑی بن گۓ ہیں۔ انہوں نے کپل دیو کا سب سے زیادہ 434 وکٹیں لینے کا ریکارڈ توڑا ہے۔

تیزگیند باز ظہیر خان نے گیارہویں بلے باز کے چیثیت سے 75 رنز اسکور کیۓ۔ ظہیر خان کی بلے باز کی حیثیت سے جہاں یہ سب سے اچھی کار کردگي ہے وہیں دنیا کے وہ پہلے کھلاڑی ہیں جنہوں نے گیارہویں نمبر پر بیٹنگ کرتے ہوۓ اتنے رنز اسکور کیۓ ہوں۔