 |  مائیک ٹائسن پہلے بھی لڑائی کے متعدد واقعات میں ملوث رہ چکے ہیں |
سابق ہیوی ویٹ باکسنگ چیمپئین مائیک ٹائسن کو ایک کار کو نقصان پہنچانے کے الزام میں گرفتار کر لیا گیا ہے۔ان پر الزام ہے کہ انہوں نے دانستہ ایک کار کے بونٹ پر چھلانگیں لگائیں۔ کار کے ڈرائیور کے مطابق یہ واقعہ ستائیس نومبر کی رات ایریزونا کے ایک نائٹ کلب کے باہر پیش آیا۔ پولیس کےذرائع کا کہنا ہے کہ مائیک ٹائسن منگل کو اپنے وکیل کے ہمراہ تھانے میں پیش ہوئے۔ انہیں بعد ازاں رہا کر دیا گیا۔ اڑتیس سالہ ٹائسن پہلے بھی لڑائی کے متعدد واقعات میں ملوث رہ چکے ہیں۔ کار کے ڈرائیور نے اپنے بیان میں کہا تھا کہ ٹائسن نے اس وقت کار کی بونٹ پر چھلانگ لگا دی جب اس نے کلب کے سامنے راہگیروں کو راستہ دینے کے لیے گاڑی روکی۔ اس کا کہنا تھا ’ میں صرف اپنی کار کی مرمت کروانا چاہتا ہوں‘۔ ایسوسی ایٹڈ پریس کے مطابق مائیک ٹائسن دس روز کے اندر عدالت مںی حاضر ہوں گے۔ | 
یہ صفحہ دوست کو ای میل کیجیئے
پرِنٹ کریں
