عبدالرشید شکور بی بی سی اردو ڈاٹ کام، کراچی

شہریارخان گزشتہ سال پی سی بی کے چیئرمین مقرر کئے گئے تھے

شہریارخان گزشتہ سال لیفٹننٹ جنرل توقیرضیاء کی جگہ پاکستان کرکٹ بورڈ کی ایڈہاک کمیٹی کے چیئرمین مقرر کئے گئے تھے۔ وہ ایک سابق تجربہ کار سفارتکار ہیں۔ دلچسپ بات یہ ہے کہ1999ء میں جب پاکستانی ٹیم نے بھارت کا دورہ کیا تھا تو وہ اس ٹیم کے مینیجر تھے اور اب وہ پاکستان کرکٹ بورڈ کے سربراہ کی حیثیت سے بھارت گئے ہیں۔

شہریارخان بھارت میں بھارتی کرکٹ بورڈ کے عہدیداران سے ملاقات میں آئندہ سال پاکستانی ٹیم کے دورۂ بھارت کے شیڈول کو بھی حتمی شکل دیں گے جو بقول ان کے طے پاچکا ہے اور صرف شہروں کے بارے میں فیصلہ ہونا ہے کہ میچز کہاں کہاں ہوں گے۔ شہریارخان کا کہنا ہے کہ پاکستان کرکٹ بورڈ کے دورے میں دو کے بجائے ایک وارم اپ میچ کھیلنے کے بارے میں درخواست بھارتی کرکٹ بورڈ نے مان لی ہے۔ یہ دورہ25 فروری سے9 اپریل تک ہوگا۔

شہریارخان کے مطابق بھارتی کرکٹ بورڈ نے75 ویں سالگرہ کے موقع پر سری لنکا اور بنگلہ دیش کے کرکٹ بورڈ کے سربراہان کو بھی مدعو کیا ہے اس موقع پر آئی سی سی کے اگلے سال کے مصروف شیڈول پر بھی بات ہوگی اور دوسال بعد ہونے والے ایشیا کپ کی تاریخ بھی طے کی جائے گی۔