عبدالرشید شکور بی بی سی اردو ڈاٹ کام فیصل آباد

انضام الحق بلے بازوں کی کارکردگی سے مایوس تھے

معین خان پر عدم اعتماد ظاہر کرتے ہوئے انضمام الحق کا کہنا تھا کہ پندرہ بیس ون ڈے اور ٹیسٹ میں معین خان کو موقع فراہم کیا گیا لیکن ان کی کارکردگی اچھی نہیں رہی لہذا ہمیں نئے وکٹ کیپر کو موقع فراہم کرینگے۔

یاد رہے کہ پاکستانی اسکواڈ میں نمبر دو وکٹ کیپر کے طور پر ذوالقرنین کو شامل کیا گیا ہے توقع ہے کہ انہیں کراچی میں ٹیسٹ کیپ دی جائے گی۔

انضمام الحق کے مطابق بالرز نے نہیں بلکہ بیٹسمینوں نے مایوس کیا کسی بھی بیٹسمین نے ٹیسٹ کی ضرورت کے مطابق وکٹ پر ٹھہر کر بڑی اننگز نہیں کھیلی اس کی ایک وجہ یہ بھی ہے کہ پاکستانی ٹیم اپریل کے بعد سے ٹیسٹ میچ نہیں کھیلی یہ پروفیشنل کرکٹ میں یہ کوئی عذر نہیں ہوتا۔

پاکستانی کپتان نے ٹیسٹ میں اسپیشلسٹ بیٹسمینوں اور بالرز کے بجائے آل راؤنڈرز پر انحصار کرنے کے فیصلے کا دفاع کرتے ہوئے کہا کہ شعیب ملک اور عبدالرزاق کو ٹیسٹ میں اس لیے کھلایا گیا کہ وہ اس وقت فارم میں ہیں اور ون ڈے میں اچھی کارکردگی کا مظاہرہ کرتے آرہے ہیں اور شعیب ملک کو چھٹے بیٹسمین کے طور پر کھلایا گیا تھا۔

عبدالرزاق کو بھی اسٹاک بالر کی حیثیت سے کھلایا گیا ٹیم کو شبیر احمد کی کمی محسوس ہورہی ہے۔ کراچی میں بولنگ اور بیٹنگ میں بھی تبدیلیاں کی جائیں گی۔

انضمام الحق نے اوپنر توفیق عمر کی ٹیم میں واپسی کا بھی عندیہ دیا ہے۔