سچن ٹنڈولکر کہنی میں تکلیف کی وجہ سے نیٹ ویسٹ ٹرافی میں حصہ نہیں لے سکیں گے۔

سچن ٹنڈولکر کہنی کی تکلیف میں مبتلا ہیں اور اسی کی وجہ سے وہ ہالینڈ میں ہونے والے تین ملکی ٹورنامنٹ میں بھی حصہ نہیں لے سکے تھے اور ان کی جگہ آل رونڈر روہن گواسکر کو ٹیم میں شامل کیا گیاتھا۔

بھارتی مایہ ناز بیٹسمین سچن ٹنڈولکر کو کہنی میں تکلیف بھارت سے روانہ ہونے سے پہلے ہی تھی لیکن انہوں نے اس کو معمولی درد سمجھ کر نظر انداز کیا۔ ہالینڈ پہنچ کر جب یہ تکلیف زیادہ ہو گئی تو پھر ڈاکٹروں نے اسے ’ٹینس ایلبو‘ قرار دے کر ٹنڈولکر کو مزید کھیلنے سے منع کر دیا ۔

انڈیا کی ٹیم انگلینڈ پہنچ چکی ہے اور اتوار کو نوٹنگھم میں نیٹ پریکٹیس کی لیکن سچن ٹنڈولکر بیٹنگ پریکٹیس کرنے کے قابل نہ تھے ۔ البتہ انہوں نے لیگ سپن بولنگ کی۔

سچن ٹنڈولکر کو امید ہے کہ پانچ ستمبر سے ہونے والی آئی سی سی ٹرافی تک وہ فٹ ہو جائیں گے۔

بھارتی مینیجر گوتم داس گپتا نے کہا ہے کہ سچن ٹنڈولکر کی جگہ کوئی متبادل کھلاڑی نہیں بلایا جائے گا کیونکہ ان کو پورا یقین ہے کہ وہ آئی سی سی سے پہلے فٹ ہو جائیں گے۔