عبدالرشید شکور بی بی سی اردو ڈاٹ کام کولمبو

روی کے رکشے میں کئی کھلاڑی بیٹھے ہیں

یہ سری لنکا کے دارالحکومت میں روز کا معمول ہے لیکن اسی تاج ہوٹل کے باہر اپنے مہمانوں کا منتظر ایک رکشہ ڈرائیور ایسا بھی ہے جس کی نظر نہ ان کی جیبوں پر رہتی ہے اور نہ ہی وہ کسی مساج یا ڈسکو کی تشہیر کرتا ہے بلکہ اس کی تمام تر گفتگو صرف اور صرف کرکٹ کے بارے میں رہتی ہے۔

تاج ہوٹل میں ٹھہرنے والا شاید ہی کوئی کرکٹ رپورٹر یا فوٹوگرافر ایسا ہو جو نفیر کے رکشہ میں نہ بیٹھاہو۔ان لوگوں کے لیے نفیر اجنبی ہے اور نہ نفیر کے لیے یہ لوگ۔

روی یا نفیر دلچسپ شخصیت کا مالک ہے وہ آپ کو نہ صرف اسٹیڈیم لے جاتا ہے بلکہ منی چینجر اور خریداری کا معاملہ ہو تو نفیر خوشی خوشی حاضر ہے۔

نفیر کی زندگی جہد مسلسل سے عبارت رہی ہے۔ اس نے کولمبو کے ایک غیرمسلم گھرانے میں آنکھ کھولی لیکن بعد میں اسلام قبول کرتے ہوئے ایک مسلم خاتون سے شادی کرلی یوں وہ روی سے عیسیٰ دین نفیر ہوگیا۔ کچھ لوگوں کے لیے وہ نفیر ہے لیکن کرکٹ کی کوریج کے لیے آنے والے رپورٹرز اور فوٹوگرافرز اسے روی کے نام سے ہی جانتے ہیں۔

روی کرکٹ کے بہت بڑے مداح ہیں

نفیر کا کہنا ہے کہ ایک انگریز فوٹوگرافر نے اس کے بیٹے کا شوق دیکھ کر اسے لیپ ٹاپ دیا تھا جبکہ اس سلسلے میں بھارتی اسپنر انیل کمبلے نے اس کی بڑی مدد کی۔

نفیر اپنے مسافروں کووہ تین تصویریں ضرور دکھاتا ہے جو اس نے اپنے رکشہ میں لگا رکھی ہیں جن میں وہ اور اس کا بڑا بیٹا مرلی دھرن اور انیل کمبلے کے ساتھ کھڑے ہیں۔ نفیر رکشہ میں بیٹھنے والوں کو اس کی اہمیت بتاتے ہوئے کہتا ہے کہ اس رکشہ میں سری لنکا اور کئی دوسری ٹیموں کے کرکٹرز بھی بیٹھ چکے ہیں دوسرے لفظوں میں آپ بہت خوش قسمت ہیں جو اس کے رکشہ میں بیٹھے ہیں۔ وہ بتاتاہے کہ سری لنکن بولر چمندا واس کو وہ اپنے رکشہ میں اسٹیڈیم سے اس کے گھر لے جاچکا ہے لیکن نفیر رکشہ چلاتے ہوئے دیگر ڈرائیوروں کے مقابلے میں زیادہ محتاط رہتا ہے کیونکہ اسے پتہ ہے کہ ایک رکشہ ڈرائیور کی غفلت کے نتیجے میں زمبابوے کے ہیتھ اسٹریک کا کندھا اترگیا تھا۔

نفیر کا کہنا ہے کہ کرکٹ اس کے دل ودماغ پر چھائی ہوئی ہے اور وہ اس سے دور نہیں رہ سکتا کیونکہ کرکٹ کی یہ قربت اسے ہردم خوش اور مطمئن رکھے ہوئے ہے۔