عبدالرشید شکور بی بی سی اردو ڈاٹ کام، کولمبو

محمد اظہرالدین

محمد اظہرالدین ایشیا کپ میں بھارت کے میچوں کا تازہ ترین احوال بھارتی ٹی وی چینل ”آج تک” کے لئے پیش کررہے ہیں۔ یہ اور بات ہے کہ ان کی اس واپسی پر آئی سی سی خوش نہیں ہے کیونکہ محمد اظہرالدین پر میچ فکسنگ میں ملوث ہونے کی بناء پر تاحیات پابندی عائد ہے۔

محمد اظہرالدین کی دمبولا کے رانگیری اسٹیڈیم میں موجودگی کو حیرت کی نظر سے دیکھا گیا ہے۔ وہ پریس باکس کے آگے اسٹینڈ میں بیٹھے تھے اور موبائل پربار بار کسی سے بات کررہے تھے، پتہ چلا کہ آج تک چینل کے ناظرین ان کے ماہرانہ تبصرے سن رہے ہیں۔

آج تک چینل کے سربراہ جی کرشنن نے اس بات کی تصدیق کی ہے کہ اظہرالدین ان کے لئے تبصرے کررہے ہیں۔ سری لنکن کرکٹ بورڈ کا کہنا ہے کہ محمد اظہرالدین کا ایکریڈیشن کارڈ اس لئے بنایا گیا ہے کہ ان پر آئی سی سی نے پابندی عائد نہیں کی تھی اور سری لنکن کرکٹ بورڈ اسے اپنے لئے کوئی مسئلہ نہیں سمجھتا۔

اسی طرح آئی سی سی کے ترجمان نے بھی یہ بات واضح کردی ہے کہ آئی سی سی کسی بھی ایسے کھلاڑی کو جس پرکرپشن کا الزام ہو میڈیا میں آنے سے نہیں روک سکتی لیکن اس شخص کو ممنوعہ علاقے میں جانے کی اجازت نہیں ہوسکتی۔ ان کا اشارہ ڈریسنگ روم اور پویلین کی طرف تھا۔

تاہم اطلاع یہ ہے کہ بھارت کے دورے پر آئے ہوئے آئی سی سی کے صدر احسان مانی اور چیف ایگزیکٹیو میلکم اسپیڈ اظہرالدین کو ایکریڈیشن کارڈ جاری کئے جانے اور تبصرے کرنے پر خوش نہیں ہیں۔