 |  ڈالمیا بھارتیہ کرکٹ بورڈ کے سربراہ بھی ہیں |
2006 میں قطر میں ہونے والی ایشیائی کھیلوں میں پہلی بار کرکٹ بھی شامل ہوگا۔ اس بات کا اعلان اولمپک کونسل آف ایشیا کے جنرل سکرٹری رندھیر سنگھ نے کیا۔ کرکٹ کے علاوہ شطرنج کو بھی ایشیائی کھیلوں میں پہلی بار شامل کیا جا رہا ہے۔ اطلاعات کے مطابق چھ ممالک کی کرکٹ ٹیمیں اس مقابلے میں حصہ لیں گی۔ خیال کیا جاتا ہے کہ یہ مقابلہ سری لنکا میں 16 جولائی کو شروع ہونے والے ایشیا کپ کی طرز پر کھیلا جائےگا۔ سری لنکا میں ہونے والے مقابلے میں چار ٹیسٹ کرکٹ کھیلنے والی ٹیموں کے علاوہ متحدہ عرب امارات اور ہانگ کانگ کی ٹیمیں بھی حصہ لے رہی ہیں۔ رندھیر سنگھ نے بتایا کہ مقابلے کا تفصیلی پروگرام بنانے کے لئے ایشیائی کرکٹ کونسل کے سربراہ جگموہن ڈالمیا کے ساتھ بات چیت کی جائےگی۔ انہوں نے کہا کہ انہیں امید ہے کہ تمام ممالک اپنے بہترین کھلاڑیوں کو مقابلے میں حصہ لینے کے لیے بھیجیں گے۔ 1998 میں ہونے والی دولت مشترکہ کھیلوں میں کرکٹ کا مقابلہ ہوا تھا جس میں جنوبی افریقہ نے آسٹریلیا کو ہرایا تھا۔ اولمپک کھیلوں میں کرکٹ 1900 میں آخری بار کھیلا گیا تھا۔ اس مقابلے میں برطانیہ نے فرانس کو ہرا کر سونے کا تمغہ جیتا تھا۔ | 
یہ صفحہ دوست کو ای میل کیجیئے
پرِنٹ کریں
