عبدالرشید شکور بی بی سی اردو ڈاٹ کام کراچی

کرکٹ کوچ باب ولمر نے سب کھلاڑیوں کو فٹ قرار دیا ہے

وسیم باری کی سربراہی میں قائم سلیکشن کمیٹی نے کوچ باب وولمر سے مشورے کے بعد جن کھلاڑیوں کو منتخب کیا ہے ان میں انضمام الحق کپتان ، عمران نذیر ، عمران فرحت ، یوسف یوحنا، یونس خان ، یاسر حمید، معین خان ، محمد سمیع ، شبیراحمد ، عبدالرزاق ،شعیب اختر ، شعیب ملک ، رانا نوید الحسن اور دانش کنیریا شامل ہیں ۔

کوچ باب وولمر نے شعیب اختر سمیت تمام کھلاڑیوں کو فٹ قرار دیا ہے البتہ کمر کی تکلیف کے سبب عمرگل ٹیم میں جگہ نہیں بناسکے ہیں۔

شعیب اختر کی ٹیم میں شمولیت سے وہ خدشات غلط ثابت ہوگئے ہیں جو ان کی فٹنس کے بارے میں ظاہر کئے جا رہے تھے۔

ایشیا کپ سولہ جولائی سے سری لنکا میں ہوگا پاکستان ٹیم اعزاز کا دفاع کرے گی اس نے2000 ء میں آخری بار ڈھاکہ میں کھیلا گیا ایشیا کپ جیتا تھا۔