عبدالرشید شکور بی بی سی اردو ڈاٹ کام کراچی

ٹیم میں اختلافات بدستور موجود ہیں

شعیب اختر ڈرہم کاؤنٹی سے معاہدہ ختم کرکے پاکستان آئے ہیں اور انہوں نے اپنی فٹنس سے متعلق شکوک و شبہات دور کردیئے ہیں۔ لیکن دوسری جانب یہ بات تشویش کا باعث ہے کہ شعیب اختر اور کپتان انضمام الحق کے تعلقات بدستور ناخوشگوار ہیں اور قومی کیمپ میں بھی ان کے درمیان سخت جملوں کا تبادلہ ہوا ہے۔

عام تاثر یہ ہے کہ اگر ان دونوں کے درمیان تعلقات اسی طرح کشیدہ رہے تو اس کا نقصان پاکستان ٹیم کو ہوگا۔ اس صورتحال میں پاکستان کرکٹ بورڈ اور ٹیم مینیجمنٹ کی ذمہ داری ہے کہ وہ تماشا دیکھنے کے بجائے معاملے کو سلجھائے۔

ٹیم کا پیس اٹیک شعیب اختر محمد سمیع اور شبیر احمد پر مشتمل ہے ۔ محمد سمیع کے بارے میں بھی یہ بتایا گیا ہے کہ وہ فٹ ہیں۔ البتہ عمر گل کمر کی تکلیف کے سبب ٹیم میں جگہ بنانے میں کامیاب نہیں ہوسکے ہیں۔

ٹیم میں تین آل راؤنڈرز شعیب ملک ، عبدالرزاق اور رانا نوید الحسن کو شامل کیا گیا ہے۔ وکٹ کیپنگ گلوز حسب معمول معین خان کے ہاتھوں میں رہیں گے۔

چیف سلیکٹر وسیم باری نے ٹیم میں لیگ اسپنر دانش کنیریا کی شمولیت کا دفاع کرتے ہوئے کہا کہ سری لنکا میں وکٹیں ٹرننگ ہوسکتی ہیں ایسے میں اگر ٹیم میں اسپیشلسٹ لیگ اسپنر کی موجودگی کارآمد ثابت ہوگی۔ وسیم باری کا کہنا ہے کہ دانش کنیریا نے اس انگلش سیزن میں شاندار بولنگ کی ہے۔

عمران نذیر کو دوبارہ موقع دینے کے بارے میں وسیم باری کہتے ہیں کہ ڈومیسٹک سیزن میں ان کی کارکردگی اچھی رہی انہیں فیلڈنگ کی اضافی خصوصیت کی وجہ سے ٹیم میں شامل کیاگیا ہے۔ ان کے علاوہ ٹیم میں اوپنر کے طور پر عمران فرحت اور یاسرحمید شامل ہیں ۔

پاکستان ٹیم کی مڈل آرڈر بیٹنگ کا بوجھ کپتان انضمام الحق ، یوسف یوحنا اور یونس خان کے شانوں پر ہے ۔ یونس خان پر سلیکٹرز نے ایک بار پھر اعتماد کیا ہے جبکہ یوسف یوحنا کو نائب کپتان برقرار رکھا گیا ہے۔

ایشیا کپ سولہ جولائی سے سری لنکا میں شروع ہوگا جس میں پاکستان کو اپنے اعزاز کا دفاع کرنا ہے۔ ٹورنامنٹ میں پاکستان ٹیم کا اصل مقابلہ بھارت اور سری لنکا سے ہوگا۔ مقابلے میں شریک دیگر ٹیمیں بنگلہ دیش، متحدہ عرب امارات اور ہانگ کانگ ہیں۔