عبدالرشید شکور بی بی سی اردو ڈاٹ کام، کراچی

کرکٹ بورڈ شعیب اخترکی فٹنس کے لئے فکر مند

پاکستان کرکٹ بورڈ کے ترجمان نے بی بی سی کو بتایا کہ شعیب اختر کو بھیجے گئے خط میں انہیں یاد دلایا گیا ہے کہ ان کی میڈیکل رپورٹس کے مطابق وہ فٹ نہیں تھے اور انہوں نے انگلینڈ میں تین ہفتے آرام کرنے کے بجائے میچ کھیل کر وعدے کی خلاف ورزی کی ہے

خط میں کہا گیا ہے کہ اگر وہ کاؤنٹی کنٹریکٹ بچانے کی کوشش کررہے ہیں تو وہ خود پر ظلم کررہے ہیں ۔

پاکستان کرکٹ بورڈ کے چیئرمین شہریار خان نے ہفتے کے روز بی بی سی سے بات کرتے ہوئے اس بات پر سخت ناراضگی ظاہر کی تھی کہ شعیب اختر نے انگلینڈ جانے سے قبل ان سے وعدہ کیا تھا کہ وہ پہلے تین ہفتے آرام کی مدت پوری کریں گے اور پھر میچ کھیلیں گے لیکن انہوں نے ایسا نہیں کیا۔

مبصرین کا کہنا ہے کہ شعیب اختر بھارت کے خلاف پنڈی ٹیسٹ میں زخمی ہوئے تھے جس کے بعد کاؤنٹی کرکٹ کھیلنے تک وہ آرام کرنے کی تین چار ہفتے کی مدت پوری کرچکے ہیں۔