کاشف قمر بی بی سی اردو سروس

میانداد کے چھکے کی برتری عالمی کپ میں سچن کے چکھے سے ختم ہوئی

کم از کم برٹش میڈیکل جرنل کی ایک تحقیق کے مطابق یہی ہوا ہے۔ تحقیق میں کہا گیا ہے کہ جیتنے اور ہارنے میں بڑا کردار دماغی طور پر مضبوطی کا ہوتا ہے۔

رپورٹ کے مطابق شارجہ میں 1986 کے آسٹریلیشیا کپ میں نمایاں جیت کے بعد پاکستان لگاتار میچز جیتتا رہا۔

اُس وقت سے حالیہ پاک بھارت سیریز تک پاکستان نے چوالیس ایک روزہ اور تین ٹیسٹ میچوں میں میں بھارت کو شکست دی جبکہ بھارت اس کے مقابلے میں پاکستان کو صرف ایک ٹیسٹ اور بائیس ایک روزہ میچوں میں شکست دے پایا۔

جریدے کے پاکستان میں نمائندے کامران عباسی نے کہا کہ شارجہ کے اس میچ میں پاکستان ہار رہا تھا لیکن جاوید میاں داد نے ہمت نہ ہاری اور تحقیق یہ بتاتی ہے کہ ان کے مشہور زمانہ چھکے نے پاکستانی ٹیم کو کچھ اس طرح کی نفسیاتی برتری دلائی جس سے بھارتی ٹیم سچن کی عالمی کپ میں دھواں دھار بیٹنگ سے پہلے تک نہ نکل پائی۔

کامران عباسی نے تحقیقی نتائج کا مزید ذکر کرتے ہوئے کہا کہ جب سچن تندولکر نے شعیب اختر کی گیندوں کو دھواں دھار طریقے سے باؤنڈری لائن کا راستہ دکھانا شروع کیا تو نہ صرف پوری پاکستانی ٹیم زبردست دباؤ میں آگئی بلکہ فتح کے ساتھ ہی بھارت مستقل ذہنی دباؤ سے بھی نکل آیا۔

کامران عباسی کے بقول اب پاکستانی ٹیم اسی طرح کے ذہنی دباؤ کا شکار دکھائی دیتی ہے۔

سچن کے چکھے سے یہ اثر ہوا کہ شعیب ہمیشہ سچن کو آؤٹ کرنے میں لگے رہتے ہیں

تاہم پاکستانی کوچ جاوید میانداد اس بات سے اتفاق نہیں کرتے اور ان کا کہنا ہے کہ عالمی کپ کے بعد سے پاکستانی ٹیم تعمیرنو کے مرحلے سے گزر رہی ہے اور اس میں بہت زیادہ بہتری آئی ہے۔

لیکن جاوید میانداد اس بات سے ضرور اتفاق کرتے ہیں کہ پاکستانی ٹیم کو ذہنی طور پر زیادہ مضبوط کھلاڑیوں کی ضرورت ہے۔ میانداد کے مطابق اس کی وجہ یہ ہے کہ پاکستان کی ڈومیسٹک کرکٹ کا ڈھانچہ اب کھلاڑیوں کی ذہنی پختگی میں کوئی کردار ادا نہیں کرتا جبکہ ماضی میں صورتحال ایسی نہیں تھی۔

میانداد کا یہ بھی کہنا تھا کہ گو موجودہ پاک بھارت سیریز کے دوران تو اس مشکل کا حل تلاش نہیں کیا جا سکتا لیکن سیریز کے بعد ضرور پاکستانی کرکٹ حکام اس مشکل کے ازالے کی کوشش کریں گے۔

اور اگر ایسا ہوجاتا ہے تو کون کہہ سکتا ہے کہ مستقبل میں کوئی اور تاریخی چھکا دونوں ملکوں میں کرکٹ کا توازن ایک بارپھر بدل دے۔