 | | | | | | | ||||||||||||||||||||||||||||||||||
| | |||||||||||||||||||||||||||||||||||||||
|
سیف گیمز: بھارت کی برتری | |||||||||||||||||||||||||||||||||||||||
سیف گيمز کے چھٹے دن نسبتاًّ کم کھیلوں میں میڈلز کے لیے مقابلے ہوئے لیکن اس کے باوجود بھارت نے اپنے طلائی تمغوں میں مزید اضافہ کیا۔ اضافہ تو پاکستان کےگولڈ میڈلز میں بھی ہوا مگر اس کامقابلہ بھارتی میڈلز کے ساتھ ممکن نہیں کیونکہ اتوار کو بھارتی پیراک خواتین نے بھارت کے مرد پیراکوں کے نقش قدم پر چلتے ہوئے تمام مقابلے جیت لئے۔ پاکستان سپورٹس کمپلکس اسلام آباد کے سوئمنگ پول پر اتوار کو خواتین کے پیراکی کے مقابلے منعقد ہوئے جس دوران پول کے باہری جنگلے کو قناتوں سے ڈھکا گیا تھا۔ مقابلوں کے دوران پول پر مردوں کا داخلہ مکمل طور پر بند تھا یہاں تک کہ بھارتی اور دیگر ممالک کے مرد کوچ بھی اندر نہیں جھانک سکتے تھے۔ خواتین کی پیراکی میں پانچ مقابلے ہوئے۔ پچاس میڑ فری سٹائل میں بھارتی پیراک ریشماں ملت نے گولڈ میڈل حاصل کرنے کے ساتھ ایک نیا ریکارڈ بھی بنایا۔ ریشماں ملت نے مقررہ فاصلہ اٹھائیس اعشاریہ سینتالیس سیکنڈ میں طے کر کے اپنی بہن نشا ملت کا ریکارڈ توڑ دیا۔ سورانجنی ودیاناتھن نے نہ صرف بھارت کے لیے دوسرا گولڈ میڈل جیتا بلکہ نیا سیف ریکارڈ بھی بنایا۔ سو میڑ بیک سٹروک کے ایونٹ میں بھارتی پیراک خاتون سومی سیرک نے نیا سیف ریکارڈ بنایا۔ پاکستان کی گولڈن گرل کا خطاب پانے والی کرن خان نے سلور میڈل حاصل کیا اور پاکستان کی رباب رضا نے برونز میڈل حاصل کیا۔ بھارتی پیراک بھاونہ شرما نے سو میڑ بریسٹ سٹروک میں سونے کا تمغہ جاصل کیا۔ چار ضرب دوسو میڑ فری سٹائل ریلے میں بھارتی پیراک خواتین نے پہلی پوزیشن کے ساتھ نیا ریکارڈ بھی بنایا اور اس طرح سیف گیمز کے چھٹے روز چار نئے سیف ریکارڈز بنے۔ اس ایونٹ میں پاکستانی ٹیم دوسرے نمبر پر رہی۔ پاکستانی پیراک کرن خان کا کہنا تھا کہ ’بھارتی پیراکوں کو جو سہولتیں میسر ہیں وہ سہولتیں ہمیں حاصل نہیں اور یہی وجہ ہے کہ ہم گولڈ میڈل نہیں جیت پاتیں‘۔ نشانہ بازی کے مقابلوں میں بھارتی نشانہ بازوں کی اجارہ داری چھٹے روز بھی قائم رہی۔ سینٹر فائر پسٹل میں بھارتی نشانہ باز جسپال رانا فاتح رہے۔ اس مقابلے کے ٹیم ایونٹ میں بھی بھارتی ٹیم نےگولڈ میڈل جیتا۔ پچاس میڑ سپورٹس رائفل پرون میں بھارتی خواتین کی ٹیم جیتی۔ جبکہ اس کے انفرادی مقابلے میں بھارت کی راج کماری فاتح رہیں اور یوں چاروں گولڈ میڈل بھارت کے حصے آئے۔ اتوار کو اتھلیٹکس مین صرف ایک ہی مقابلہ ہوا۔ میراتھن دوڑ میں سری لنکن اتھلیٹ انورادھ کورے نے گولڈ اور ان کے ہم وطن اجیتھ بنڈارا نے سلور میڈل حاصل کیا۔ بھارت نے مزید دوگولڈ میڈل ٹیبل ٹینس کے مینز ڈبلز اور وومین ڈبلز میں حاصل کئے۔ پاکستان نے اتوار کو دو گولڈ میڈل ویٹ لفٹنگ میں حاصل کئے۔ ایک سو پانچ کلوگرام سے زائد ویٹ کیٹیگری میں پاکستان کے عالم دین نے سب سے زیادہ ویٹ اٹھا کر پاکستان کو طلائی تمغہ دلایا۔ بھارتی ویٹ لفٹر وپن دوسرے نمبر پر رہے۔ تائی کوانڈو میں چار مقابلے ہوئے جن میں نہ تو کوئی بھارتی نہ ہی پاکستانی گولڈ میڈل حاصل کر سکا۔ یہ چاروں گولڈ میڈل نیپالی کھلاڑیوں نے حاصل کئے جن میں ایک نیپالی خاتون بھی شامل ہیں۔ میڈل ٹیلی کے مطابق بھارت چھ روز میں اب تک ایک سو سولہ میڈلز حاصل کر چکا ہے جن میں اڑسٹھ طلائی، تیس میڈل چاندی اور اٹھارہ کانسی کے ہیں۔ پاکستان بدستور دوسرے نمبر پر ہے۔ اس نے مجموعی طور پر چھیانوے میڈل حاصل کئے ہیں جن میں چوبیس طلائی، انتالیس چاندی اور تینتیس کانسی کے ہیں۔ اتوار کو تائی کوانڈو میں چار گولڈ حاصل کرنے کے بعد نیپال کے پاس اب چھ گولڈ میڈل ہیں اور تین سلور اور بارہ برونز۔ تمغوں کی مجموجی تعداد کے اعتبار سے نیپال پانچویں سے چوتھی پوزیشن پر پہنچ گیا ہے۔ بنگلا دیش کے مجموعی میڈل تو اکتیس ہیں تاہم ان میں طلائی صرف تین ہیں۔ افغانستان تین سلور اور انیس برونز کے ساتھ بائیس میڈل حاصل کر چکا ہے۔ بھوٹان ایک سلور اور دو برونز میڈل ہی پر اکتفا کئے ہوئے ہے جبکہ مالدیپ ابھی بھی صفر پر کھڑا ہے۔ پیر کے روز سیف گيمز کا فٹ بال کا فائنل پاکستان اور بھارت کے درمیان کھیلا جائےگا اس مقابلے پر سب کی نگاہیں جمی ہیں۔ | 
| |||||||||||||||||||||||||||||||||||||||
| ||||||||||||||||||||||||||||||||||||||||
| ||||||||||||||||||||||||||||||||||||||||
یہ صفحہ دوست کو ای میل کیجیئے
پرِنٹ کریں
