عبدالرشید شکور
بی بی سی اردو ڈاٹ کام، ملتان |  |
انڈین کرکٹ ٹیم پاکستان کے دورے میں جیت کی راہ پر گامزن ہونے کے ساتھ ساتھ فٹنس مسائل سے بھی دوچار ہے۔ اسے تازہ ترین دھچکہ فاسٹ بولر ظہیرخان کے ان فٹ ہونے کی صورت میں لگا ہے جو بائیں پیر کا مسل کھنچ جانے کی وجہ سے نہ صرف ملتان ٹیسٹ کی دوسری اننگز میں بولنگ نہیں کرسکے بلکہ وہ 2 اپریل سے لاہور میں شروع ہونے والا دوسرا ٹیسٹ بھی نہیں کھیل سکیں گے۔ ملتان ٹیسٹ کی پہلی اننگز میں ظہیرخان نے 23 اوورز میں 76 رنز کے عوض یوسف یوحنا کی وکٹ حاصل کی تھی۔ بھارتی ٹیم کے منیجر رتناکر شیٹھی کے مطابق ظہیرخان کی یہ گروئن انجری ہوسکتی ہے۔ ظہیرخان آسٹریلیا کے دورے میں بھی گروئن انجری کے سبب صرف ایک ٹیسٹ کھیل سکے تھے۔ فٹ ہونے کے بعد وہ پاکستان کے دورے کے لئے بھارتی ٹیم میں شامل کئے گئے ہیں لیکن ون ڈے سیریز میں ردھم نہ ہونے کے سبب انہیں مشکلات سے دوچار ہونا پڑا۔ ظہیرخان سے پہلے اشیش نہرا اور کپتان سورو گنگولی بھی ان فٹ ہوکر ٹیم سے باہر ہوچکے ہیں ۔ اشیش نہرا ہاتھ زخمی ہونے کے بعد وطن واپس جا چکے ہیں جبکہ گنگولی کمر کی تکلیف میں مبتلا ہونے کے نتیجے میں جمعرات کو دہلی روانہ ہورہے ہیں۔ | 
یہ صفحہ دوست کو ای میل کیجیئے
پرِنٹ کریں
