عبدالرشیدشکور
بی بی سی اردو ڈاٹ کام، ملتان |  |
بھارتی کرکٹ ٹیم کے لئے یہ خبر کسی طور بھی اچھی نہیں ہوسکتی کہ اسے ملتان کے بعد لاہور ٹیسٹ میں بھی اپنے کپتان سورو گنگولی کی خدمات حاصل نہیں ہونگی ۔ سوروگنگولی کو کمر کی تکلیف کا علاج کرانے کے لئے بھارت جانا پڑرہا ہے اور یہ بات طے نہیں کہ وہ دوبارہ پاکستان آکر ٹیم میں شامل ہوسکیں گے۔ اس کا انحصار ان کے مکمل فٹ ہونے پر ہوگا۔ اگر وہ فٹ ہوگئے تو وہ راولپنڈی ٹیسٹ میں بھارتی ٹیم کی قیادت کے قابل ہوسکیں گے۔ سوروگنگولی پاکستان کے خلاف لاہور میں کھیلے گئے پانچویں اور آخری ون ڈے انٹرنیشنل میں اپنے ہم منصب انضمام الحق کا تیز شاٹ روکنے کی کوشش میں گرپڑے تھے اور انہیں کمر کی شدید تکلیف کے نتیجے میں اسٹریچر پر میدان سے باہر لیجایا گیا تھا۔ ملتان ٹیسٹ میں ان کی جگہ راہول ڈریوڈ بھارتی ٹیم کی قیادت کررہے ہیں ۔ بھارتی ٹیم کے منیجر رتناکر شیٹھی کے مطابق گنگولی کی ایم آر آئی رپورٹ صحیح ہے لیکن بھارتی کپتان کی حالت میں بہتری نہیں آرہی ہے لہذا انہیں مکمل علاج کے لئے وطن واپس بھیجا جارہا ہے۔ بھارتی ٹیم منیجمنٹ نے گنگولی کے متبادل کے طور پر محمد کیف کا نام تجویز کیا ہے ۔ محمد کیف پاکستان کے خلاف ون ڈے سیریز کھیلنے والی ٹیم میں شامل تھے ۔ | 
یہ صفحہ دوست کو ای میل کیجیئے
پرِنٹ کریں
