پاک بھارت کرکٹ تعلقات کی تاریخ میں دس مارچ دو ہزار چار کو اس لئے یاد رکھا جائے گا کہ گزشتہ تقریباً چودہ برس میں پہلی بار بھارتی کرکٹ ٹیم نے پاکستان کے خلاف پاکستان میں نبرد آزما ہونے کے لئے سرحد عبور کی۔ اس تاریخی دورے میں غیرسرکاری میچوں کے علاوہ دنیائے کرکٹ کے روایتی حریف پانچ ایک روزہ اور تین ٹیسٹ میچوں میں ایک دوسرے کے مدمقابل ہوں گے۔ اس سیریز کے بارے میں نہ صرف دونوں ملکوں کے عوام میں زبردست دلچسپی اور جوش و خروش پایا جاتا ہے بلکہ دنیائے کرکٹ کی نظریں بھی اس پر جمی ہوئی ہیں۔ بی بی سی اردو سروس نے اپنے سامعین اور قارئین کی دلچسپی کو مدِنظر رکھتے ہوئے مختلف اقدامات کئے ہیں: پاکستان کے مایہ ناز آلراؤنڈر اور فاتح عالمی کپ عمران خان اس سیریز کے تمام میچوں پر تبصرہ کریں گے جو بی بی سی اردو سروس کی نشریات اور بی بی سی اردو ڈاٹ کام کے اوراق پر شائع کیا جائے گا۔ رنز بنانے کی مشین کہلانے اور سٹروکس کے لئے کلائی کے عمدہ استعمال کے لیے شہرت رکھنے والے ظہیر عباس، اور لِٹل ماسٹر کا خطاب پانے والے پاکستان کرکٹ ٹیم کے سابق کپتان حنیف محمد بھی سیریز کے دوران تبصرے کریں گے۔ اس کے علاوہ ہمارے نامہ نگار میچ کے دوران موجود رہیں گے جو میچ کے تازہ ترین احوال، دلچسپ مناظر اور کہانیوں کو ہمارے سامعین اور قارئین تک پہنچائیں گے۔ اس سیریز کے لئے بی بی سی اردو ڈاٹ کام نے ’ڈسک ٹاپ سکور بورڈ‘ بھی تیار کیا ہے جو آپ کے کمپیوٹر پر میچ کی لمحہ لمحہ روداد پیش کرتا رہے گا۔ کرکٹرز عمران خان، ظہیر عباس اور حنیف محمد پاک بھارت سیریز پر بی بی سی اردو ڈاٹ کام کے لئے خصوصی تبصرے کریں گے۔ | 
یہ صفحہ دوست کو ای میل کیجیئے
پرِنٹ کریں
