پاکستان پہنچنے سے پہلے انڈین ٹیم نے وزیراعظم واجپئی سے ملاقات کی۔

انڈین کپتان کا کہنا تھا کہ یہ دورہ دونوں ملکوں کے درمیان خیر سگالی کا دورہ ہے اور وہ اپنے ساتھ وزیراعظم واجپئی کے نیک خواہشات لے کر آئیں ہیں۔

منگل کے روز لاہور پہنچنے کے بعد ایک اخباری کانفرنس میں صحافیوں سے بات کرتے ہوئے گنگولی نے کہا کہ وہ پاکستان سے اچھی یادیں لے کر جانا چاہتے ہیں۔
انہوں نہ کہا کہ ان کی ٹیم پر اس سیریز کے سلسلے میں کوئی دباؤ نہیں ہے اور دونوں ٹیمیں جیتنے کی پوزیشن میں ہیں۔

گنگولی نے اپنے ہوٹل میں اخبار نویسوں سے بات کرتے ہوئے پاکستان کی روایتی طور پر بہتر باؤلنگ کے بارے میں ایک سوال کے جواب میں کہا کہ وہ یہ مانتے ہیں کہ پاکستانی باؤلنگ کو بہتر تصور کیا جاتا ہے لیکن وہ ہر باؤلر کو میرٹ پر کھیلیں گے۔

پاکستانی فاسٹ باؤلر شعیب اختر کے بارے میں ایک سوال پر گنگولی کا کہنا تھا کہ ان کی ٹیم نے کسی ایک باؤلر کو کھیلنے کےلئے کوئی مخصوص حکمت عملی نہیں بنائی اور یہ کہ وہ ’ہٹ کرنے والی بال کو ہٹ کریں گے۔‘