ان خواتین کی تربیت ٹھیک اسی طرح کی جائے گی جیسے ان مرد حضرات کی جو پولیس میں بھرتی کے لئے آگے آئیں گے۔یہ خواتین لوگوں کو گرفتار بھی کر سکیں گی، انہیں تفتیش کے طریقے بھی سکھائے جائیں گےاور گشت کرنے کا سلیقہ بھی سمجھایا جائے گا۔

افغانستان میں پولیس کی تربیت کے ذمہ دار ٹام موسل کہتے ہیں کہ پہلی مرتبہ خواتین کو پولیس کی بنیادی تربیت کے کسی کورس میں شامل کیا گیا ہے۔

انیس سو چھیانوے سے سن دو ہزار ایک کے دوران عورتوں پر کام کرنے یا ان کے سکول جانے پر پابندی تھی۔

عورتوں کے کورس میں شامل ہونے کے حوالے سے ایک تقریب سے خطاب کرتے ہوئے امورِ خواتین کی نائب وزیر ڈاکٹر ثریا رحیم نے کہا کہ اگرچہ خواتین پر طالبان کے لگائے ہوئے نفسیاتی زخم ابھی بھرے نہیں ہیں لیکن اس وقت پولیس میں عورتوں کی ضرورت جتنی اب ہے پہلے نہیں تھی۔

انہوں نےن کہا ’افغانستان میں عبوری حکومت کے قیام کے ساتھ افغانستان میں خواتین کی زندگیوں میں بے پناہ تبدیلیاں آ رہی ہیں اور ہم یہ سب دیکھ رہے ہیں۔‘

ان کا کہنا تھا کہ جب تک عورتیں ہر شعبہ ہائے زندگی میں اپنا کردار ادا نہیں کریں گی، افغانستان ترقی نہیں کر پائے گا۔

پولیس میں بھرتی ہونے والی سات کی سات افغان خواتین بیوہ ہیں اور اس ملازمت سے وہ اپنے خاندان کی پرورش کریں گی۔

ایک خاتون حانث گل کہتی ہیں ’طالبان کے دور میں میری ملازمت ختم ہوگئی تھی اور مجھے گھر میں بند کر دیا گیا تھا لیکن اب افغانستان کے حالات بہتر ہو رہے ہیں اور ہمارے لئے کام کرنے کے مواقع بڑھ رہے ہیں۔‘

افغان پولیس میں پہلے بھی عورتیں کام کرتی رہی ہیں لیکن ان میں سے اکثر کو روسی قبضے کے دوران بھرتی کیا گیا تھا جو پندرہ برس قبل ختم ہو گیا تھا۔ وہ عورتیں بھی طالبان کے خاتمے کے بعد کام کر رہی ہیں۔