 |  ’کراچی اور پشاور میں مداحوں کو مایوس نہیں کرنا چاہیے‘ |
پاکستان نے کہا ہے کہ وہ بھارت کے ساتھ ہونے والی کرکٹ سیریز میں کراچی اور پشاور کے متنازعہ مقامات پر میچ کھیلنا چاہتا ہے۔ گزشتہ سال جنوبی افریقہ اور نیوزی لینڈ نے سلامتی کے پیش نظر ان شہرو ں میں میچ کھیلنے سے انکار کر دیا تھا۔ پاکستان کرکٹ کنٹرول بورڈ کے سربراہ شہریار خان نے کہا ہے کہ ان شہروں میں کرکٹ کے لاکھوں مداحوں کو مایوس نہیں کرنا چاہیے۔ دونوں ممالک کے کرکٹ بورڈوں نے ابھی میچوں کی تواریخ اور مقامات کا فیصلہ کرنا ہے۔ بھارت مارچ اور اپریل کے دوران پاکستان میں میچ کھیلے گا جو چودہ سال میں اس کا پہلا دورہ ہوگا۔ شہریار خان نے جمعہ کو بھارت کے سفیر شو شنکر مینن سے ملاقات کی۔ بھارت کی خبر رساں ایجنسی پریس ٹرٹ آف انڈیا نے مینن کے حوالے سے بتایا کہ دونوں ممالک کے درمیان کرکٹ میچوں کی شروعات مثبت پیش رفت ہے اور یہ کہ وہ دلچسپ مقابلے دیکھنے کے خواہشمند ہیں۔ سن دو ہزار دو میں کراچی میں بم دھماکے کے باعث نیوزی لینڈ کی ٹیم دورہ ادھورا چھوڑ کر واپس چلی گئی تھی۔ کراچی میں گزشتہ ہفتوں میں بھی دھماکے ہوئے ہیں۔ تاہم سن دو ہزار تین میں بنگلہ دیش کی ٹیم نے ان دونوں شہروں میں میچ کھیلے تھے اور کوئی ناخوشگوار واقعہ پیش نہیں آیا تھا۔ پاکستان کرکٹ بورڈ کے ترجمان سمیع الحسن نے کہا ہے کہ کراچی اور پشاور میچوں کے انعقاد کے لئے بالکل محفوظ ہیں۔ انہوں نے کہا کہ یہ بات سلامتی کے بارے میں بھارت کے تین رکنی وفد کو بھی آئندہ ماہ پاکستان آنے پر بتائی جائے گی۔ | 
یہ صفحہ دوست کو ای میل کیجیئے
پرِنٹ کریں
