یہ صفحہ دوست کو ای میل کیجیئے		پرِنٹ کریں

شہریار توقیر ضیاء کی جگہ مقرر کیے گئے ہیں

پاکستان کرکٹ بورڈ کے نئے سربراہ شہر یار خان نے کہا ہے کہ ایڈمنسٹریشن اور اکاؤنٹس کا شفاف ہونا ضروری ہے تاہم انہوں نے کہا کہ ان کے خیال میں ’ہول سیل‘ تبدیلیاں نا مناسب ہوں گی۔

صدر پاکستان جنرل پرویز مشرف نے سابق سیکرٹری خارجہ شہریار خان کو پاکستان کرکٹ بورڈ کا نیا چیئرمین مقرر کیا ہے۔

چودہ دسمبر کو لیفٹیننٹ جنرل ریٹائرڈ توقیر ضیاء کرکٹ بورڈ کے چیئرمین کے عہدے کا چارج چھوڑ دیں گے تو شہریار خان ان کی جگہ لیں گے۔

شہر یار خان ہندوستان اور فرانس میں پاکستان کے سفیر رہ چکے ہیں اور پاکستان کرکٹ ٹیم کےمنیجر کے طور پر بھی کام کرچکے ہیں۔

انہوں نے بی بی سی اردو سے گفتگو کرتے ہوئے کہا کہ’ دباؤ آتے رہتے ہیں اور سفارشیں بھی اس کے علاوہ دوسررے مفادات بھی ہوتے ہیں لیکن گروپ بندی کو صاف کر کے انتظامیہ کو بالکل صاف کرنا ہوگا۔اور سب لوگوں کو میرٹ پر لینا ہو گا تاہم میرے خیال میں ’ہول سیل چینجز‘ ( مکمل تبدیلیاں) لانا نا مناسب ہو گا۔‘

توقیر ضیاء کا استعفیٰ اچانک اس وقت سامنے آیا جب انہوں نے ایک نجی چینل کو اپ لنکنگ لائسنس نہ ہونے کے باوجود، نیوزی لینڈ اور پاکستان کے درمیان ہونے والے میچ نشر کرنے کے حقوق دے دیے اور پہلا ایک روزہ میچ براہِ راست نشر نہیں ہوسکا، جس کے نتیجے میں نجی چینل اور سرکاری ٹی وی کے درمیان ایک تنازعہ پیدا ہو گیا۔

سابق سیکریٹری خارجہ شہریارخان کی تقرری سے وہ قیاس آرائیاں بھی ختم ہوگئیں جو توقیرضیاء کے استعفے کے بعد سے کرکٹ کے حلقوں میں ان کے جانشین کے بارے میں ہورہی تھیں۔

شہریار کون؟

شہر یار خان ہندوستان اور فرانس میں پاکستان کے سفیر رہ چکے ہیں اور پاکستان کرکٹ ٹیم کےمنیجر کے طور پر بھی کام کرچکے ہیں

اگرچہ ورلڈ کپ پاکستان کرکٹ ٹیم کے لئے کامیاب ثابت نہ ہوا لیکن انتظامی معاملات کے حوالے سے پاکستانی کرکٹ ٹیم شہریار خان کی موجودگی میں ہر قسم کے تنازعہ سے بچی رہی۔

شہریار خان نے ایک اور سوال کے جواب کہا ہے ’جو بھی ٹیم یہاں آنے پر آمادہ ہے اسے ہم پوری طرح یہ واضح کر دیں گے کہ ہم ان کی سکیورٹی کے ذمہ دار ہیں اس کے بعد یہ ہم پر چھوڑ دیا جانا چاہیے کہ میچ کہاں کہاں ہوں گے، کیوں کہ کسی ٹیم کا یہ کہنا نا مناسب ہے کہ وہ کراچی میں نہیں کھیلے گی یا پشاور میں نہیں کھیلے گی۔‘

شہریار خان بھارت کے شہر بھوپال کے ایک مشہور خاندان سے تعلق رکھتے ہیں اور اپنی اصول پسندی کے لئے مشہور ہیں۔